Bipangujo bya Batangi

Mu 2 Kodinda 6:14, i bāni batelwa na Polo mu kishima “bampikwa kwitabija”?

Tutanga mu 2 Kodinda 6:14 amba: “Kemukēkula mu kisense kya bampikwa kwitabija.” Shi tutale kungala ne kunshi, tukamona amba Polo wisambila pa bantu bakubulwa kubadilwa nansha dimo mu kipwilo kya bwine Kidishitu. Uno mwivwanino i mukwatañane na mavese makwabo a mu Bible atelele’mo Polo kishima “wampikwa kwitabija” nansha “bampikwa kwitabija.”

Kimfwa, Polo utopeka bene Kidishitu pa kwikoka kobādi bekokela mu kidye “kumeso kwa bampikwa kwitabija.” (1 Kodinda 6:6) Pano, bampikwa kwitabija i batyibi bādi bengila mu bidye bya balungu ba mu Kodinda. Mu mukanda wandi wa bubidi, Polo unena amba Satana i musabe meso a “boba bakubulwa kwitabija.” Meso a bano bampikwa kwitabija i mapūte “kyakupūta” kutyina bakamona myanda miyampe. Bampikwa kwitabija kebatelepo mutyima ku kwingidila Yehova, mwanda Polo wābadikile kushintulula’mba: “Muntu pa kukavundamukila kudi Yehova kyakupūta kikamufundulwa.”—2 Kodinda 3:16; 4:4.

Bampikwa kwitabija bamo i bekuje mu kujilula bijila ne mu kutōta bilezaleza. (2 Kodinda 6:15, 16) Inoko, ke bonsopo balwanga bengidi ba Yehova. Bamo basangelanga bubinebine. Bavule bene i besonge na bene Kidishitu ne basenswe kwikala nabo. (1 Kodinda 7:12-14; 10:27; 14:22-25; 1 Petelo 3:1, 2) Nanshi Polo wādi kyaba kyonso utela kishima “wampikwa kwitabija” pa yewa yense, monka motunenene’kyo kungala, kabadilwapo mu kipwilo kya bwine Kidishitu, kibundilwe na ba “kumwitabija Mfumwetu.”—Bilongwa 2:41; 5:14; 8:12, 13.

Musoñanya utanwa mu 2 Kodinda 6:14 i wa kamweno mu kuludika bene Kidishitu mu ngikadilo yonso ya mu būmi kadi divule upitulukwanga’mo pa kupāna madingi a tunangu ku bene Kidishitu bakimba mwinē pabo. (Mateo 19:4-6) Mwine Kidishitu mwipāne ne mubatyijibwe kakamonepo amba i biyampe kusonga nansha kusongwa na wampikwa kwitabija, mwanda misoñanya, bitungo, ne nkulupilo ya bampikwa kwitabija i bishile kulampe na bya mwine Kidishitu wa bine.

Shi ke pano, tukanena bika pa boba befunda Bible ne belungile na kipwilo kya bwine Kidishitu? Le basapudi bampikwa kubatyijibwa nabo? Lelo nabo i bampikwa kwitabija? Mhm.  Boba betabije bubinebine bwa myanda miyampe ne benda balumba ku kubatyijibwa kebafwaninwepo kutelwa bu bampikwa kwitabija. (Loma 10:10; 2 Kodinda 4:13) Kumeso kwa kubatyijibwa, Konilusa wātelelwe bu “muntu mutūkanye ne kutyina Leza.”—Bilongwa 10:2.

Lelo nanshi mwine Kidishitu mwipāne ufwaninwe kwinangila na muntu witabijibwe bu musapudi wampikwa kubatyijibwa mwanda wa kwisonga nandi, mwanda’po’tu madingi a Polo asonekelwe mu 2 Kodinda 6:14 keatalepo bano bantu? Mhm, ke kifwaninwepo. Mwanda waka? Mwanda madingi a Polo kudi bakaji ba bishala bene Kidishitu anena patōka’mba: “Wamone ne mwakusongelwa ku yewa wāswele, nanshi namo i monka mudi Mfumwetu.” (1 Kodinda 7:39) Mungya ano madingi, bene Kidishitu bepāne banenwe kukimba wa kwisonga nandi enka mu boba badi “mudi Mfumwetu.”

Le binenwa “mudi Mfumwetu” nansha bikwabo biifwene nabyo amba “mudi Kidishitu” bishintulula bika? Polo utela bantu bādi “mudi Kidishitu” ne “mudi Mfumwetu” mu Loma 16:8-10 ne mu Kolose 4:7. Shi utange ano mavese, ukamona amba bano bantu i ‘bakwashi ba mu mingilo,’ ‘betabijibwe,’ ‘banabetu baswedibwe,’ ‘bengidi ba binebine,’ ne ‘bapika netu.’

I kitatyi’ka kikalanga muntu ke ‘umpika mudi Mfumwetu’? I enka kyaba kyaitabija kulonga byobya biloñanga umpika ne kitatyi kyaipela aye mwine. Yesu ushintulula’mba: ‘Shi muntu usaka kunonda, nankyo ēpele aye mwine, atekune mutyi wandi wa masusu anonde.’ (Mateo 16:24) Muntu ushilulanga kulonda Kidishitu ne kukōkela bya binebine ku kiswa-mutyima kya Leza kitatyi kyaipāna aye mwine kudi Leza. Kupwa papo, wiyanga aye mwine kubatyijibwa ne kutombolwa bu mwingidi udi na mwimanino mwitabijibwe ku meso a Yehova Leza. * Shi ke pano, ‘kusonga mudi Mfumwetu’ i kusonga muntu ke mupwe kulombola amba i mwitabije bya binebine, muntu mwipāne bu “umpika wa Leza ne wa Mfumwetu Yesu Kidishitu.”—Yakoba 1:1.

Yewa wifunda Bible na Batumoni ba Yehova, wendelela senene ku mushipiditu, ufwaninwe kufwijibwa’ko. Inoko, kaikele kwipāna aye mwine kudi Yehova ne kwitūla mu būmi bwa kwingila ne kwisuminwa. Ukisakilwa kushinta bintu bimobimo. Ufwaninwe kuvuija kushinta konso kukatampe kulombwa pa kwipāna ne kubatyijibwa kumeso kwa kukimba kala kushinta kukwabo kukatampe, kimfwa kwa kusaka busongi.

Lelo i biyampe mwine Kidishitu enangile na muntu umweka bu wendelela kumeso senene mu kwifunda Bible, koku ulamine mulangwe wa kumwilaija amba shi wabatyijibwa ebiya ketwisonge nandi? Ke biyampepo. Kukanina kwa mutyima kwa mwifundi wa Bible kukokeja kuvutakanibwa shi wayuka amba mwine Kidishitu mwipāne usaka kwisonga nandi, ino i enka kupwa kwa kubatyijibwa kwandi.

Pavule, muntu wikalanga musapudi wampikwa kubatyijibwa enka mu bula bwa kitatyi kampanda kete, kutūla’nka ne pasa kwendelela kufika ne ku kubatyijibwa. O mwanda madingi adi kūlu’ku a kusonga enka mudi Mfumwetu ke mapityije’byopo kipimo. Le bikekala namani shi muntu wafikila pa kusonga nansha kusongwa, kadi i mutamine mu kisaka kya bwine Kidishitu, ke mulāle myaka ibala-inga mu kipwilo wingila bu musapudi wampikwa kubatyijibwa? Shi bidi nankyo, le kimukankeje kupāna būmi bwandi kudi Yehova i kika? Mwanda waka wikaka? Le kudi byaalakananga? Eyo, aye ke muntupo wampikwa kwitabija, inoko kakokejapo kutelwa bu muntu udi “mudi Mfumwetu.”

Madingi a Polo atala pa busongi adi na kamweno kotudi. (Isaya 48:17) Shi boba bakimba kwisonga i bepāne abo bonso kudi Yehova, mpiko yabo ya busongi ikekala na kyalwilo kikomo, kya ku mushipiditu. Bakekala na misoñanya ne bitungo bimo byonka. Kino kikabweja’ko nsangaji mu kijimba kyabo kya busongi. Kadi ‘kusonga enka mudi Mfumwetu’ i kulombola dikōkeji kudi Yehova, ne kino kyo kikaletela muntu madyese a nyeke, mwanda ‘kudi wa dikōkeji Yehova nandi ukekala wa dikōkeji.’—Mitōto 18:25.

[Kunshi kwa dyani]