Bepēne abo Bene ne Mutyima tō mu Filipine

PANO ke padi kintu kya myaka dikumi, ba Gregorio ne Marilou, ba mulume ne mukaji ba myaka 30 ne kupita, badi bengila bu bapania mu Manila, koku bengila kabo kaji ka nshikije-dyuba. Byādi bikomo, ino babwenye kwibwingila. Kupwa bapa Marilou mwingilo wa kwendeja banki kwaādi wingila. Unena amba “mwingilo wetu muyampe wadi witulenja twikale mu būmi buyampe.” Na bubine bintu byādi byenda’nka biyampe, o mwanda bano balume ne mukaji balangile kūbaka kobo kobādi bafwatakanya mu muswelo muyampe ku makilometele 19 kutunduka kwa Manila. Beivwene na balupusa mwanda wa kupota mikanda ya lūbako ne kufuta lupeto ku kweji ne kweji mu bula bwa myaka dikumi.

“NĀMWENE AMBA NGIBANGA YEHOVA”

Marilou unena amba: “Kaji kami kapya kadi kanomba kitatyi kivule ne bukomo bine byadi bilengeja bupyasakane bwami bwa kwingila mingilo ya ku mushipiditu butyepe. Nāmwene amba ngibanga Yehova.” Ubweja’ko amba: “Nkyadipo kadi ne kibwanya kupa Yehova kitatyi kyonapēne kwadi kya kumwingidila wandi mwingilo.” Kya bulanda mu uno mwanda i kino amba, ba Gregorio ne Marilou betūdile’ko difuku dya kwisambila pa mwa kwingidijija  būmi bwabo. Gregorio unena amba: “Twadi tusaka kushinta ino ketwādipo tuyukile kintu kya kulonga. Twesambile pa mwa kwingidijija būmi bwetu ne pa mfulo mu mwingilo wa Yehova, nakampata potwadi ketwabutwile bana. Twalombele Yehova etuludike.”

Kitatyi kimo, baivwene mīsambo mivule yadi isambila pa kukengidila kokwa kusakilwa basapudi bavule ba Bulopwe. Gregorio unena amba “twamwene amba ino mīsambo yadi i malondololo a Yehova ku milombelo yetu.” Bano ba mulume ne mukaji balombele bininge pa mwanda wa lwitabijo lwabo, pa kwikala na bukankamane bwa kukwata butyibi boloke. Kikoleja kimo kyobadi nakyo i mwingilo wabo wa lūbako. Badi kala ke bafute lupeto lwa myaka isatu. Le badi bakulonga bika? Marilou unena amba: “Shi twaimikile mwingilo wetu, twadi ba kujimija bintu byonso byotwapotele kala​—ke na lupeto luvule kadi. Inoko twamwene kino bu butongi bwa kutūla kiswa-mutyima kya Yehova pa kifuko kibajinji pa kyaba kya masakila etu.” Pa kuvuluka binenwa bya mutumibwa Polo bya amba “nabudidilwamo,” baleka’byo kūbaka njibo ne kujimija kaji, bapotoloja bintu byabo bivule ne kuvilukila ku kakibundi ka mufula ka pa kisanga kya Palawan, ku kintu kya makilometele 480 kunshi kwa Manila.​—Fid. 3:8.

‘BEFUNDILE BYA KULONGA’

Kumeso kwa kuviluka, Gregorio ne Marilou beteakenye mwa kwikadila na būmi bupēla, ino kebadipo bayukile mwine mwadi mwa kwikadila bwabo būmi kutūla ne byobakafika kobenda. Marilou unena’mba, “byadi bikomo. Kekwadipo mudilo wa shinga, kutupu kintu kipēleja būmi. Pa kyaba kya kuteka mutyele mu kisuku kikwikwa ku mudilo wa shinga, twadi tukatyaba nkuni ya kuteka nayo. Nkyadipo nekyenda mu nsoko mikatampe, kudya ku leshitola, ne kubulwa bintu bikwabo biloñwanga mu kibundi kikatampe.” Inoko, bano ba mulume ne mukaji bakivulukanga kine kyobavilukile, kadi mwenda mafuku bashinta. Marilou unena amba: “Pano nsangedile kumona buya bwa bupangi, kimfwa ñenyenye ikela bufuku. Kadi, byadi bisangaja’po kashā kumona mapala a bantu basangale kitatyi kyotwibasapwila. Pa kwingidila kuno, ‘twi befunde bya kulonga’ pa kwikala na nsangaji.”​—Fid. 4:12.

Gregorio usekununa amba: “Kitatyi kyotwafikile kuno, kwadi’tu Batumoni baná kete. Basangele bininge kitatyi kyonadi nena mwisambo wa bantu bonso yenga ne yenga ne ponadi ñomba ñimbo ya Bulopwe na kyami kindadi.” Mu bula bwa mwaka umo, bano ba mulume ne mukaji bemwena mwadi mubaila kakisumpi ke kipwilo kikatampe kya basapudi 24. Gregorio unena amba: “Buswe bobetulombwele pa kino kipwilo bwetutengele bininge.” Banena dyalelo kukwatañana na myaka isamba ne kupita yobengile mu kibundi kitolwele amba: “Kekudipo kintu kidingakene na nsangaji itamba mu kwimwena kutama kwa ku mushipiditu. Pano tubamone amba būmi bwetu budi na kitungo.”

 ‘NATOMPELE NE KUMONA’MBA YEHOVA I MUYAMPE!’

Mu Filipine, kubwipi kwa batutu ne bakaka 3000 bavilukile ku bibundi kusakilwa basapudi bavule ba Bulopwe. Kintu kya bantu 500 mu bukata mwabo i bakaka bankungakaji. Twisambilei bidi pa kimfwa kya Karen.

Karen, udi pano na myaka isenselela ku 25, watamine mu Baggao, Cagayan. Paakidi nkasampe, wadi nyeke ulanga kutandabula mwingilo wandi. Unena amba: “Pa kuyuka’mba kubashala kitatyi kityetye ne amba bantu ba miswelo yonso basakilwa kwivwana musapu wa Bulopwe, nadi nsaka kwingila kokwa kusakilwa basapudi bavule.” Nansha byadi bimusoñanya bantu batyetye mu kyabo kisaka akafunde masomo malamala pa kyaba kya kuvilukila ku kifuko kampanda mwanda wa kusapula, Karen walombele Yehova amuludike. Kadi wesambile ne na boba badi bengila mu mwaba mwitolwele. Aye pa kubwanya myaka 18, wavilukila ku kibundi kidi mu makilometele 64 na yabo ntanda.

Kipwilo kityetye kyaendele’ko Karen kukakwatakanya kyadi na mwaba wa ngulu ku mukunkujo wa kalunga ka Pasifike. Karen uvuluka amba: “Pa kufika ku kipwilo kipya tutamba ku Baggao, twaendele lwendo lwa mafuku asatu, tukanda ne kutūka ngulu ne kwabuka minonga kintu kya misunsa 30 ne kupita.” Unena amba: “Pa kufika ku bifundwa bimo bya Bible, nadi ñenda mansá asamba, mpityija bufuku ku njibo ya kifundwa, bukya lubanga naenda monka mansá asamba pa kujokela ku njibo.” Lelo kwapele bipa? Karen ubweja’ko na mimungomungo amba, “kyaba kimo maulu adi ansansa, ino nadi ñendeja bifundwa bya Bible 18. Natompele ne kumona’mba Yehova i muyampe!”​—Mit. 34:8.

“NEFUNDILE KUKULUPILA MUDI YEHOVA”

Le i bika byakankamikile Sukhi, kaka nkungakaji wa myaka 40 ne musubu ushikatanga mu États-Unis, avilukile mu Filipine? Wakatenwe ku kitango kya kipindi mu 2011, kwine kobaipangwile ba mulume ne mukaji. Basekunwine muswelo obapotolweje bintu byabo bivule mwanda wa kuvilukila ku Meksike kukakwasha mu mwingilo wa busapudi. Sukhi unena’mba, “buno bwipangudi bwanengeje nangulukile pa bitungo byonadi nkyalangulukile’po dibajinji.” Sukhi wa ku India pa kuyuka’mba, kwadi kusakilwa bukwashi buvule pa kufikila bantu ba Punjabi bashikete mu Filipine, wakwata butyibi bwa kwenda kukebakwasha. Le wātenwe na bikoleja?

Sukhi unena’mba, “nakomenwe kukwata butyibi pa bintu bya kushala nabyo ne bya kupotoloja. Kadi, pa kupwa kwikala na būmi buyampe mu myaka 13 mu njibo yami mikatampe, naviluka na kisaka kyami ne kwikala mu kobo katyetye. Kebyadipo bipēla, ino wadi muswelo muyampe wa kwiteakanya mwa kwikadila na būmi bupēla.” Le wātenwe na makambakano’ka pa kupwa kuvilukila mu Filipine? Unena’mba, “nadi na bikoleja bikatampe bya  kwikala na moyo wa kutyina bishi ne malangalanga a kwikala ntanda-bene. Nefundile kukulupila mudi Yehova mu būmi bwami!” Le kwapele bipa’ka? Sukhi unena na mimungomungo amba: “Yehova witulombola’mba, ‘ntompei bidi shi nkikemupungulwilapo dyese.’ Namwene amba bino binenwa i bya bine kitatyi kyangipangwile mwine njibo amba, ‘le usa kwiya monka kitatyi’ka? Ngidi na bipangujo bivule.’ Bine, kino kyampele nsangaji mikatampe ne kuloelelwa pa kubwanya kukwasha bantu badi na nzala ya ku mushipiditu!” (Mal. 3:10) Sukhi ubweja’ko amba: “Bine, butyibi bwadi bukomo kukwata i bwa kuviluka. Ami pa kupwa kwibukwata, natulumukile pa kumona muswelo wampele Yehova bintu byonso.”

“NANEKENYE MOYO WAMI”

Sime, tutu musonge udi pano na myaka kubwipi kwa 40 wavilukile mu Filipine ne kukengila kaji ka mfutwa mivule mu ntanda ya pa Bukata bwa Kutunduka. Aye pa kufika, Sime wakankamikwa na mutadi wa kipindi ne mwisambo wa tutu wa mu Kitango Kyendeji atūle Yehova pa kifuko kibajinji mu būmi bwandi. Sime unena’mba, “ino pa kulangulukila pa kuleka kami kaji nadi ndotakanya bufuku.” Nansha nabya, walekele kaji kandi ne kujokela ku Filipine. Dyalelo, Sime ne wandi mukaji, Haidee, bengilanga mu Davao del Sur, kunshi kwa ntanda kwine kusakilwa basapudi ba Bulopwe bavule mwanda wa kusambakanya musapu mu mwaba mukatampe. Sime unena’mba, “kitatyi kyonjokela kunyuma bityetye, mfwijanga’ko pa kunekenya moyo wami wa kutyina kujimija kaji ne kutūla Yehova pa kifuko kibajinji. Kekudipo kintu nansha kimo kileta nsangaji mu būmi kipityile kwingidila Yehova ne bukomo bonso!”

“WETUPELE NSANGAJI MIKATAMPE!”

Ba Ramilo ne Juliet, ba mulume ne mukaji bapania ba myaka 30 ne musubu pa kuyuka’mba kudi kipwilo kimo kidi ku makilometele 30 na kwabo kisakilwa bukwashi, betumine abo bene kukekikwatakanya. Mu uno muswelo, ba Ramilo ne Juliet badi benda na tukutuku kukatanwa ku kupwila ne kutambila mu mwingilo wa busapudi nansha shi kūlu i kuyampe nansha kubi. Nansha byokudi bikoleja bya kwenda mu mashinda a ngulu ne bilalo bikobeke mu lwelele, i basangale kutandabula mwingilo wabo. Ramilo unena amba: “Ami ne wami mukaji twendejanga bifundwa bya Bible 11! Kwingidila kokwa kusakilwa basapudi bavule kulomba kwipāna, ino kwitupanga nsangaji mikatampe!”​—1 Kod. 15:58.

Le usaka kuyukila’ko bivule pa mwa kwingidila kokwa kusakilwa basapudi bavule ba Bulopwe mu yenu ntanda nansha mu ntanda ya bweni? Shi i amo, lombola mutadi wenu wa kipindi, ne kutanga kishinte kinena’mba, “Lelo Ubwanya ‘Kwabukila ku Masedonya’?” kidi mu Mwingilo Wetu wa Bulopwe wa Kweji 8, 2011.