Padi ubavuluka Gail, utelelwe mu bishinte bibadikile, wadi ulanga’mba kakelwangapo nansha dimo lufu lwa mulumyandi Robert. Inoko pano, utengele kukemona nandi monka mu ntanda impya ilaile Leza. Unena’mba, “Kisonekwa kyonsenswe i kya Kusokwelwa 21:3, 4.” Kinena’mba: “Leza mwine ukekalanga nabo. Kadi ukapampulanga impolo yonso ku meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka. Bintu bya kala bibapu kupita.”

Gail unena’mba: “Uno mulao i munene myanda yonso. Untononanga nkwashe boba bafwidilwe muntu obasenswe, inoko kebadipo na lukulupilo lwa kukemona nandi monka.” Gail imwiendeje mungya nkulupilo yandi na kukwasha bakwabo na kwingila bu mwingidi wa kitayi kyonso, usapwila bakwabo mulao wa Leza wa mu mafuku a kumeso wa amba “lufu kelukekala’kopo dikwabo.”

Padi ye uno ubanena’mba ‘kebibwanikapo!’ Ino, tala kimfwa kya Yoba. Wābelele misongo ya mpanda mfwa. (Yoba 2:7) Yoba wāabila kufwa, inoko wādi ukikulupile’mba Leza udi na bukomo bwa kumujokeja ku būmi pano pa ntanda. Wānene na kikulupiji kyonso’mba: “Ii! shi uswele kumfya mu Kalunga-nyembo . . . Shi abe ukēte, nankyo nka kwitaba; nansha ukekalanga ne mutyima wa kuloelelwa ku mīngilo ya obe makasa.” (Yoba 14:13, 15) Yoba wādi ukulupile’mba Yehova usa kumuvuluka ne kwikala na mutyima wa kumujokeja ku būmi.

Panopano ponka, Leza usa kulonga’kyo—kudi Yoba ne ku bantu bakwabo kebabadika —pasa kwikala ino ntanda ke paladisa. (Luka 23:42, 43) Bible unena mu kisonekwa kya Bilongwa 24:15 amba: “Kukekalanga lusangukilo.” Kadi Yesu nandi wānene’mba, “Kemwakitulumukai kino’ki, mwanda nsá īyanga, boba bonso badi mu bibundu bakevwana diwi dyandi ne kutamba bakatamba’mo.” (Yoano 5:28, 29) Yoba ukemwena kufikidila kwa uno mulao. Ukekala na dyese dya kwitolela “ku mafuku a busongwalume bwandi” mwanda “umbidi wandi ukafufuma kutabuka wa bwanuke.” (Yoba 33:24, 25) Momukekadila ne bonso betabija mulao wa Leza wa kusangula bafwe pano pa ntanda.

Shi udi na bulanda bwa kufwilwa muntu osenswe, padi ino myanda yotwesamba keikapwididilapo bulanda bobe. Ino, shi ulangulukile pa milao ya Leza idi mu Bible, ukekala na lukulupilo lwa binebine ne na bukankamane.—1 Tesalonika 4:13.

Le usaka kuyukila’ko myanda mikwabo ya mwa kulwila na bulanda? Nansha padi udi na bipangujo bikwabo pa uno mwanda kimfwa, “Mwanda waka Leza ulekele’ko bibi ne masusu?” Shi i amo, nabya twela pa diteba dyetu jw.org, umone muletela Bible malondololo asenga kadi a kamweno.