Ikala Mukōkele Kadi Mukankamane Bwa Kidishitu

“Komejai’nka mityima yenu, ami uno napu kunekenya panopantanda.”—YOA. 16:33.

1. Kikōkeji kya Yesu kudi Leza kyādi kibwaninine muswelo’ka?

 YESU KIDISHITU wādi ulonga nyeke kiswa-mutyima kya Leza. Kāikelepo difuku nansha dimo na milangwe ya kuleka kukōkela Shandi wa mūlu. (Yoa. 4:34; Bah. 7:26) Ngikadilo yaādi’mo pano pa ntanda yādi ikokeja kumulengeja akomenwe kukōkela. Ku ngalwilo’tu kwa mwingilo wandi wa busapudi, balwana na Yesu, kubadila’mo ne Satana mwine, bādi basaka kumunekenya, kumūminija, nansha kumutonona Yesu aleke kukōkela. (Mat. 4:1-11; Luka 20:20-25) Bano balwana bakambakenye Yesu bininge na kumusanshija mu ñeni, ku mutyima, ne ku ngitu. Ku mfulo, byāmweka bu ababwanya na kumwipaya ku mutyi wa masusu. (Mat. 26:37, 38; Luka 22:44; Yoa. 19:1, 17, 18) Mu bino byonso, ne mu masusu makatampe mwine, Yesu wāikele “kukōkela [ne ku] lufu.”—Tanga Fidipai 2:8.

2, 3. Le i ñeni’ka yotuboila ku kikōkeji kya Yesu nansha ke paādi mu masusu?

² Byēmwenine Yesu paādi pano panshi bu muntu byāmufundije kikōkeji mu miswelo mikwabo. (Bah. 5:8) Bimweka’mba Yesu wādi usenswe bininge mwingilo wa Yehova kupita bikwabo. Kutabukidila, wādi wikele na Yehova umbula bwa kitatyi kilampe mpata ne kwikala “sendwe mwine mukata” mu kitatyi kya bupangi. (Nk. 8:30) Inoko kūminina kwaāūminine  mu lwitabijo koku upita mu matompo, kwālombwele bululame bwandi bwampikwa kipatu. Yesu Mwanā Leza wātamine ku mushipiditu. Lelo i ñeni’ka yotuboila ku bintu byaēmwenine?

³ Yesu, nansha byaādi muntu mubwaninine, ke pa bukomo bwandipo paālamine kikōkeji kibwaninine. Wādi ulomba Leza bukwashi mwanda wa ashale nyeke mukōkele. (Tanga Bahebelu 5:7.) Batwe netu, shi tusaka kulama kikōkeji, tufwaninwe kwikala betyepeje, ne balombela. Po pa mwanda, mutumibwa Polo wādingile Bene Kidishitu amba: “Mwikale ne uno mutyima uno mwenu munda wadi ne Kidishitu Yesu;” “[wēpelulwile] aye mwine, pa kukōkela ku lufu, nalo, kadi, e-ē! i lufu lonka lwa [mutyi wa masusu].” (Fid. 2:5-8) Būmi bwa Yesu bulombola’mba bantu babwanya kwikala na kikōkeji nansha shi badi umbukata mwa bantu babi. Shako, Yesu wādi mubwaninine, ino le bidi namani ku muntu wampikwa kubwaninina motwikadile’mu?

Tubwanya Kukōkela Nansha Byoketubwanininepo

4. Lelo kupangwa kotupangilwe na bwanapabo bwa kutonga kulombola bika?

⁴ Yehova wāpangile ba Adama ne Eva bu bipangwa bya ñeni bidi na bwanapabo bwa kutonga. Batwe babo bana netu tudi na buno bwanapabo. Le ko kunena namani? Ko kunena’mba tubwanya kutonga kulonga biyampe nansha bibi. Mu muneneno mukwabo, Leza i mwitupe bwanapabo botukokeja kutonga kumukōkela nansha kubulwa kumukōkela. Ino buno bwanapabo i bwitupe kiselwa kampanda kya kwishintulwila. Na bubine, butyibi botukwata i būmi nansha lufu kotudi. Kadi butala ne boba botudi nabo.

5. I bulwi’ka botudi nabo batwe bonso, ne tukokeja kunekenya namani?

⁵ Byotudi bantu bakubulwa kubwaninina, kikōkeji kekiilangapo akyo kine. Kukōkela bijila bya Leza kekupēlangapo nyeke. Polo wādi ulwa na uno mwanda. Wāsonekele amba: “Namone mukanda, ungi nao, wa mu byangitu byami, ke balu ne mukanda wa ku mutyima wami, unkokele monka mu bupika bwa mu mukanda wa bubi o udi mu byangitu byami.” (Loma 7:23) Shako, kukōkela kupēla shi kekulombepo kwipāna, kususuka, nansha myanda mikwabo mibi. Ino le tuloñanga namani shi “kilokoloko kya ngitu, ne kilokoloko kya meso” kilwanga na mutyima wetu wa kukōkela? Luno lupusa lubi lutambanga ku kubulwa kubwaninina ne ku ‘mushipiditu wa pano pa ntanda’ witujokolokele, kadi lupusa’lu i lukomo bininge. (1 Yoa. 2:16; 1 Kod. 2:12) Pa kwiukomena, tufwaninwe ‘kuteakanya mutyima’ kumeso kwa kutanwa na makambakano nansha na matompo ne kusumininwa amba tukakōkela Yehova, nansha shi tufikilwe na bika. (Mit. 78:8) Tudi na bimfwa bivule bya mu Bible bya bābwenye kukōkela mwanda bāteakenye mityima yabo.—Eza. 7:10; Dan. 1:8.

6, 7. Leta kimfwa kilombola’mba kifundwa kya kasuku kibwanya kwitukwasha tutonge bya ñeni.

⁶ Muswelo umo wa kuteakanya mutyima wetu i wa kwifunda na bupyasakane Bisonekwa ne mabuku esambila pa Bible. Wimone mu uno mwanda ulonda’ko. Langa bidi shi i kyolwa kyobe kya kulonga kifundwa kya kasuku. Ubapu kala kulomba Yehova akupe mushipiditu mwa kwingidijija byobya byowifunda mu Kinenwa kyandi. Kyolwa kya kesha udi na mpangiko ya kutala filime ku televijo. Nansha byoyukile amba mudi myanda ya busekese ne bukalabale, inoko ubaimvwana bantu bavule batendela’yo.

⁷ Ubavuluka madingi a Polo adi mu Efisesa 5:3 anena’mba: “Busekese, ne kujilula konso kwa bijila, ne kwabila kwine, kebikatelwa nansha dimo dine umbukata mwenu, mhm, e mufwaninwe bapandulwemo.” Kadi ubalanga ne madingi a Polo adi mu Fidipai 4:8. (Tanga.) Ubalangulukila pa madingi a ku mushipiditu, ne kwiipangula’mba, ‘Shi nate mutyima ne ñeni yami ku ino mpangiko, le nalonda kimfwa kya Yesu kya kukōkela Leza mu kamo ne kamo?’ Le ukalonga’po namani? Le ukasumininwa kutala filime’ya?

8. Mwanda waka tufwaninwe kwendelela kulama misoñanya ya mu mwikadilo ne ya ku mushipiditu?

⁸ Kuzobolola kusumininwa kotusuminwe kulama misoñanya ya mu mwikadilo ne ya ku  mushipiditu, padi na kulanga’mba twi bakomo bakomena kipwano kibi, kubadila’mo ne kipwano na bantu ba bikandangobo, ne makayo a bya busekese i kuluba. Batwe’ko, tufwaninwe kwilama ne kulama betu bana ku lupusa lubi lwa mushipiditu wa Satana. Bantu bengila na makompyuta balwanga na kukinga mashini abo akatwelwa na bishi bibi bidya myanda idi’mo, kona mwingidilo wa kompyuta, kusambakana’mo ne kwiengidija kealu na makompyuta makwabo. Ketwakakunuka mu kwikinga kotwikinga ku “byakyongo” bya Dyabola.—Ef. 6:11.

9. Mwanda waka tufwaninwe difuku ne difuku kukōkela Yehova?

⁹ Kisengele difuku ne difuku, tutanwanga na myanda ya kutonga kusangaja Yehova nansha kumusanshija. Shi tusaka kupanda, tufwaninwe kukōkela Leza ne kulonda misoñanya yandi myoloke. Tulombolanga’mba lwitabijo lwetu i lwa bine, potulonda kimfwa kya Kidishitu kya “kukōkela [ne ku] lufu.” Yehova uketupala mpalo potukōkela. Yesu wālaile amba: “Ino aye ukōminina pototo, ne pamfulo pene, nabya aye ukapandako.” (Mat. 24:13) Eyo, kino kilomba kutamija bukankamane bwa bine na mwātamijije’bo Yesu.—Mit. 31:24.

Yesu—Kimfwa Kikatampe kya Bukankamane

10. Lelo i mitabakano ya muswelo’ka yotukokeja kutanwa nayo, ne i bika byotukalonga?

¹⁰ Byotujokolokelwe na mwikadilo ne bilongwa bya ino ntanda, tusakilwa kukankamana kutyina kusambukilwa’byo. Bene Kidishitu batyinibwanga mbavu na ngikadila, bantu, lupeto, ne bipwilo bikokeja kwibalengeja basasuke mu mashinda moloke a Yehova. Bavule balwibwanga na ba mu kisaka. Mu matanda amo, masomo malamala akankamikanga bininge lufundijo lwa kwialamuna, kadi kupela kwikala’ko kwa Leza ko kubatāla. Ketudipo mwa kutadila bitupu ano makambakano otutanwa nao. Tufwaninwe kulonga’po kintu mwa kukomenena’o amba twilame. Kimfwa kya Yesu kitulombola muswelo wa kunekenya’o.

11. Lelo kumwekeja kimfwa kya Yesu kitupanga bukankamane namani?

¹¹ Yesu wānene bana bandi ba bwanga’mba: “Panopantanda mukamonanga byakwimususula byamalwa, nanshi komejai’nka mityima yenu, ami uno napu kunekenya panopantanda.” (Yoa. 16:33) Kālondelepo nansha dimo lupusa lwa ntanda. Kālekelepo ntanda imukankaje kufikidija mwingilo wandi wa busapudi nansha kuzobolola kusumininwa kwaādi usuminwe kulama misoñanya ya ku mushipiditu ne ya mu mwikadilo; mo motufwaninwe netu kulongela. Yesu wālombele pangala pa bandi bana ba bwanga’mba: “Kebadipo bwa bapano-pantanda, ehe, monka mo nkīkadile amiwa bu-wapanopantanda.” (Yoa. 17:16) Tubwanya netu kumona bukomo bwa kupaluka na ntanda shi twifunda ne kulangulukila pa kimfwa kya Kidishitu kya kininga.

Iula Bukankamane bwa Yesu

12-14. Leta bimfwa bilombola bukankamane bwa Yesu.

¹² Yesu wālombwele bukankamane bukatampe  mu mwingilo wandi. Pakulombola bukankamane bwa bu mwanā Leza, wāendele pampikwa moyo “kutwela mu njibo ya Leza wapangilemo boba badi bēpotelamo mu njibo, ne mesa a boba badi beshintyila lupeto weafulamwina panshi, ne bipona bīne kumo bya boba badi bēpota bankunda.” (Mat. 21:12) Pāile basola kumukwata Yesu mu bufuku bwandi bwa mfulo pano pa ntanda, waenda na bukankamane kobadi mwanda wa kukinga bandi bana bwanga kanena’mba: “Shi munsaka ami nankyo lekaiko bano bende.” (Yoa. 18:8) Kyaba pa kupita’po, wāsoñanya Petelo asomeke kipete, mu uno muswelo wālombwele amba kikulupiji kyandi kekidipo mu bya bulwi bya pano pa ntanda ino i mudi Yehova.—Yoa. 18:11.

¹³ Yesu wāsokwele patōka bafundiji ba bubela bampikwa buswe ba mu mafuku’a ne bufundiji bwabo bwine bwa bubela. Yesu webanena amba: “Yō! Yō! bānwe basonekeji, ne baFadiseo, malwa enu, bānwe banzanzangi! Mwanda mushitanga ku bulopwe bwa mūlu, mbā, ku bantu basaka kutwelamo, . . . byobya byakukila bulemeko bya mu mukanda-wabijila mwebivulaminwa byakoloka mu kidye, ne byakufwilako bantu lusa, ne byalwitabijo, . . . mukendanga panyuma pa kitomeno, ne pa lūvu, mundako muyūle makomwameso a kudimbañana ne byapupanuke byamalwa.” (Mat. 23:13, 23, 25) Bana ba bwanga ba Yesu nabo badi basakilwa kwikala na bukankamane, ke-pantu bendeji ba bipwilo bya bubela bādi bakwibapangapanga kufika ne ku kwipaya’mo bamo.—Mat. 23:34; 24:9.

¹⁴ Yesu wādi mukankamane ne kumeso kwa bademona kwine. Difuku dimo wētene na muntu mukwatwe na bibanda bikomo, kutupu muntu ukokeja kumukuta lukano. Yesu, ne moyo mwine mpika, wāpangile bibanda bivule byādi bisusula yewa mwana-mulume. (Mako 5:1-13) Dyalelo, Leza kapelepo Bene Kidishitu bukomo bwa kulonga bino bingelengele. Inoko, mu mwingilo wetu wa kusapula ne kufundija, tulwanga ku mushipiditu na Satana mwine ‘usabile meso a mutyima a boba bakubulwa kwitabija.’ (2 Kod. 4:4) Monka mobyāikadile kudi Yesu, “bya bulwi bwetu kebidipo bya bu-ngitu mhm, i bya bulobo bukatampe ku meso a Leza bya kututa ne bishimikwa bīne bya bukomo”—mfudijo mijīke miji ayo’ko ya bubela. (2 Kod. 10:4) Twifundanga bivule bya mu kimfwa kya Yesu, potwingidija bino byabulwi bya ku mushipiditu.

15. Lelo bukankamane bwa Yesu bwādi bwimanine paka?

¹⁵ Bukankamane bwa Yesu bwādi bwimanine pa lwitabijo, ke pa bikandangobopo. Ye mufwaninwe kwikadila ne bwetu. (Mako 4:40) I muswelo’ka otukekala na lwitabijo lwa bine? Pano napo, kimfwa kya Yesu kyo kitukwasha. Wādi na buyuki bwa mu Bisonekwa, kadi wādi wibikulupile bya binebine. Yesu wādi wingidija Kinenwa kya Leza, ke pamopo bwa lupete lwa ku ngitu, ino i pamo bwa lupete lwa ku mushipiditu. Kyaba kivule, wādi ubingija bufundiji bwandi na kunyemena ku Bisonekwa. Divule, kumeso kwa kunena mwanda, wādi ubadikila bidi amba: “Kisonekelwe’mba,” ko kunena’mba, i mu Kinenwa kya Leza. *

16. I muswelo’ka otukokeja kwikala na lwitabijo lukomo?

¹⁶ Pa kwikala na lwitabijo lubwanya kukomena matompo mu bu mwanā bwanga, tufwaninwe kutanga ne kwifunda Bible difuku ne difuku ne kupwila, ne kwikala na bubinebine mu mityima yetu ke kyalwilo kya  lwitabijo. (Loma 10:17) Tufwaninwe kadi kulanguluka—kulangulukila mpata—pa byobya byotufunda, kwibitweja twejē mu mityima yetu. Lwitabijo lūmi kete lo lubwanya kwitutwala ku bilongwa bya bukankamane. (Yak. 2:17) Kadi i biyampe tulombe mushipiditu sandu mwanda lwitabijo i kipindi kya kipa kya mushipiditu.—Ngat. 5:22.

17, 18. I muswelo’ka walombwele kaka umo nkasampe bukankamane ku masomo?

¹⁷ Kaka umo nkasampe witwa bu Kitty wemwenine muswelo ukokeja lwitabijo lwa bine kupāna bukankamane. Tamba pa bwanuke, wadi uyukile amba kafwaninwepo kufwa “bumvu īno myanda-miyampe” ku masomo, ne wadi uswele bininge kusapula bukamoni ku bakwabo ba ku masomo. (Loma 1:16) Mwaka ne mwaka, wadi usumininwa kufikila bakwabo na myanda miyampe, ino wadi wikaka mwanda kadipo na bukankamane. Kitatyi kyaadi ke nsongwa, waendele ku masomo angi. Wanena amba, “Pano, nsa kwenda kukakimba mikenga yonadi mbulwa.” Kitty walomba ekale na bukankamane na bwa Kidishitu, manwa, ne mukenga mwine.

¹⁸ Mu difuku’tu dyandi dibajinji ku masomo, banena bana ba masomo betele umo ne umo. Bavule batelele bipwilo byobendanga’mo, banena ne kunena’mba kebakilondanga nkulupilo yabo. Kitty wamona’mba uno o mukenga waadi ulomba. Pano ke aye wa kunena, wanena na kikulupiji amba, “Ami ne Kamoni wa Yehova, kadi Bible ye uludikanga būmi bwami ku mushipiditu ne mu mwikadilo.” Paadi ukisamba, bana ba masomo bamo ke bamukengula meso. Inoko bakwabo bamutejeje, kupwa bamwipangula bipangujo. Mwadimu watelele Kitty bu kimfwa kiyampe kya kulamata ku byakulupile. Kitty i musangale pa kuboila ñeni ku kimfwa kya bukankamane kya Yesu.

Lombola Lwitabijo ne Bukankamane na bwa Kidishitu

19. (a) Lelo kwikala na lwitabijo lwa bine kulomba bika ne bika? (b) I muswelo’ka o tukasangaja Yehova?

¹⁹ Batumibwa nabo bāyukile amba bilongwa byabo bya bukankamane bifwaninwe kwimanina pa lwitabijo. Bālombele Yesu amba: “Betuvudijijeko lwitabijo.” (Tanga Luka 17:5, 6.) Kwikala na lwitabijo lwa bine kulomba bivule, ke’nkapo kukulupila amba Leza udi’ko. Kino kilomba, kwikala na kikulupiji kikatampe mu kipwano kya na Yehova, pamo bwa kipwano kya mwanuke na shandi wa kanye ne buswe. Solomone wāsonekele ku bukomo bwa mushipiditu amba: “Abe wami mwana mwana-mulume, shi mutyima obe udi ne ñeni, nankyo mutyima wami ukasangala, ke wami kadi; eyo, mfyo yami ikasepelela, po ikesamba bintu byoloke milomo yobe.” (Nk. 23:15, 16) Muswelo umo onka, kulamata kotulamete na bukankamane ku misoñanya myoloke kusangajanga Yehova, ne kuyuka kino kwitukankamikanga. Nanshi, twiulei nyeke kimfwa kya Yesu, na kulamata na bukankamane ku boloke!

[Kunshi kwa dyani]

Le Ukokeja Kushintulula?

• Lelo i bika biketukwasha twikale bakōkele nansha byotudi bampikwa kubwaninina?

• Lelo lwitabijo lwa bine lwimaninanga paka, ne lukokeja kwitukwasha namani twikale bakankamane?

• I bika byotukamona shi twikale na kikōkeji ne shi tulombole bukankamane na bwa Kidishitu?

[Bipangujo bya Kifundwa]

[Kifwatulo pa paje 16]

Lelo wi ‘muteakanye mutyima’ kumeso mwanda wa kukomena matompo?

[Kifwatulo pa paje 18]

Pamo bwa Yesu, netu tubwanya kulombola bukankamane bwimanine pa lwitabijo