Le Bulanda I Kiyukeno kya Kupelwa na Leza?

LEZA wālombwele Isalela wa kala amba: “Nanshi kekukekalangapo bulanda umbukata mobe.” Mu mukanda wa bijila wēbapelwe, mwādi musoñanya wa kuta mutyima balanda ne kulekelela ba māpu. (Kupituluka 15:1-4, 7-10) Nanshi kekwādipo kufwaninwe kwikala mulanda mu Bene Isalela, mwanda Yehova wālaile kwibesela. Inoko, dine dyese’di dyādi dimanine pa kukōkela Mukanda wa bijila, mwine wākomenwe Bene Isalela kukōkela.

Kino kekyādipo’tu kishintulula amba boba badi na bintu bityetye bya ku ngitu i bapelwe na Leza, ne amba boba bādi na bivulevule i beselwe na Leza. Bengidi ba Leza bavule ba kikōkeji bādi balanda ku ngitu. Mupolofeto Amose wādi mukumbi bitupu ne mwapudi wa bipa bya bikuyu. (Amose 1:1; 7:14) Mu mafuku a mupolofeto Ediya, pāponene kipupo mu Isalela, Ediya wāpandile’tu ku kizaji kya mukaja mufu mulanda, wādi na tubukula ne tumāni byāvudijibwe mu kingelengele mu kitatyi kya kipupo’kya. Ne Ediya ne mukaja mufu kebādipo bampeta; ino Yehova wēbapele byonka byobādi basakilwa.—1 Balopwe 17:8-16.

Myanda ya kubulwa kulaya ikokeja kulandapaja muntu. Maakishida ne misongo nabyo bikokeja kulengeja muntu akomenwe kwingila mu mafuku kampanda nansha’tu lonso. Kadi lufu nalo lulengeja bana ke banshiye, mukaji nandi ke wa kishala. Nanshi ino ngikadilo imbi keilombolapo amba muntu i mupelwe na Leza. Nsekununi ya Naomi ne Luta i kimfwa kisenga pa mutyima kya buledi bwa buswe bwa Yehova ku bafudile. Nansha Naomi ne Luta byobāshele makasa pa kufwilwa balume babo, Yehova Leza wēbesele ne kwibakwatakanya mu bisakibwa byabo.—Luta 1:1-6; 2:2-12; 4:13-17.

I kimweke patōka amba bulanda ke kiyukenopo kya kupelwa na Leza. Boba bakōkele Yehova Leza bakulupile mu byānene Mulopwe Davida amba: “Nadi mwanuke, pano nakule; nanshi nkyamwenepo moloke kulekelelwa, nansha lukunwa lwandi kulomba bidibwa.”—Mitōto 37:25.

[Kifwatulo pa paje 8]

Nansha ba Naomi ne Luta byobādi balanda, Leza wēbesele ne kwibata mutyima na buswe