Bupolofeto bwa Bible Nsekununi ya Bine

“Nansha kintu kimo kine kyabulwa ku byonso bintu bilumbuluke byesambile Yehova Leza wenu pa mwanda wenu, mhm.”—YOSHUA 23:14.

LE BIBLE I MWISHILE NA MABUKU MAKWABO NAMANI? Bilumbu bya pa kala byādi bilaya myanda mikomo kwivwana kadi keikulupilwapo, kadi lubuko lwa malumba a ñenyenye lwa dyalelo nalo kelwabinepo. Bwifundi bwa kuyuka bintu bya kumeso bwimanine pa bintu bilongeka ano mafuku, kadi butompanga kulaya na dimodimo tutwa twa myaka kumeso binkumenkume bikalongeka. Inoko, bupolofeto bwa Bible bulombolanga kanda ne kanda kadi bufikidilanga nyeke, nansha shi bufumika tamba “byaba bya kalakala bintu kebyalongelwepo.”—Isaya 46:10.

KIMFWA: Mu myaka katwa ka busamba K.K.K., mupolofeto Danyele wāmwene kimonwa kyālaile kutyumunwa kwa bukidibukidi kwa Mede-Peleshia na Ngidiki. Kadi kyālaile amba pa kupwa’tu kwa mulopwe mushindañani wa Ngidiki kwikala “mukomo,” bulopwe bwandi bwādi bwa ‘kutyumunwa.’ Le i ani wādi wa kumupingakana? Danyele wāsonekele amba: “Malopwe aná akemana mu muzo’wa; ino nanshi ke na bukomokomo bwandipo, ehe.”—Danyele 8:5-8, 20-22.

BINENA BALEMBI BA MĀNGA: Myaka 200 ne kupita kupwa kwa mafuku a Danyele, Alekizandele Mukatampe waikala ke mulopwe wa Ngidiki. Mu bula bwa myaka 10, Alekizandele watyumuna Umbikalo wa Mede-Peleshia ne kutandabula umbikalo wa Ngidiki kufika ne ku Munonga wa Indus (witwa dyalelo bu Pakista). Ino wafwa mu kitulumukila aye’tu na myaka 32. Ku mfulo, divita dyālwilwe kubwipi na Ipisusa mu Azia Minele, dyo dyāvingakenye umbikalo wandi. Bashindañani baná ba dino divita bēabile mwenda mafuku Umbikalo wa Ngidiki. Inoko, kekudipo nansha umo wāfikile pa bukomo bwa Alekizandele.

LE ULANGA’PO NAMANI? Le kudi dibuku dikwabo didi na mānga ya bupolofeto bufikidile uno muswelo? Nansha i enka Bible kete?

[Bushintuludi pa paje 4]

“Mu Bible mudi bupolofeto . . . kebubadika kebubwanyapo kufikidila mu kitulumukila.”—A LAWYER EXAMINES THE BIBLE, DYA IRWIN H. LINTON

[Kutambile Kifwatulo pa paje 4]

© Robert Harding Picture Library/SuperStock