Wifunde mu Kinenwa kya Leza

Le I Bika Bikalongeka mu Difuku dya Butyibi?

Kino kishinte kisambila pa bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisambila nobe pa ano malondololo.

1. Le Difuku dya Butyibi I Bika?

Enka na mokilombwedilwe pa kifwatulo kidi ku lundyo’ki, bantu bavule balañanga amba mu Difuku dya Butyibi, myuya midiyala ne midiyala ikaletwa kumeso a lupona lwa Leza, mwanda wa kutyibilwa mambo mungya bilongwa byabo bya pa kala—bamo bakapebwa mpalo ya būmi bwa mūlu, bakwabo nabo bakasusulwa mu kalunganyembo. Ino Bible ulombola’mba, kitungo kya Difuku dya Butyibi i kunyongolola bantu ku bukondame. (Mitōto 96:13) Leza wātongele Yesu ekale Mutyibi mwine ukalwīja muzo wa muntu boloke.—Tanga Isaya 11:1-5; Bilongwa 17:31.

2. Le Difuku dya Butyibi Dikajokeja Boloke Namani?

Adama muntu mubajinji pa kutombokela Leza ku kusaka, wātwejeje lutundu lwandi lonso mu bubi, masusu, ne mu lufu. (Loma 5:12) Pa kupwa buno bukondame, Yesu ukajokejeja ku būmi nansha kusangula midiyala ne midiyala ya bantu bafwile. Mukanda wa Kusokwelwa ulombola patōka amba kino kikalongeka mu buludiki bwa Kidishitu Yesu bwa myaka kanunu.—Tanga Kusokwelwa 20:4, 11, 12.

Boba bakasangulwa bakatyibilwa mambo, ke pa byobyapo byobālongele kumeso kwa kufwa, ino i pa byobya byobakalonga kitatyi kikasokolwa byobya bisonekelwe mu “mivungo” itelelwe mu Kusokwelwa shapita 20. (Loma 6:7) Mutumibwa Polo wānene amba mu boba bakasangulwa ne kupebwa mukenga wa kwifunda myanda ya Leza mudi “boloke, ne bampikwa koloka.”—Tanga Bilongwa 24:15.

  3. Le Difuku dya Butyibi Dikafikidija Bika?

Boba bafwile kumeso kwa kuyuka Yehova Leza ne kumwingidila, bakekala na mukenga wa kushinta ne kulonga biyampe. Shi bakashinte, lusangukilo lwabo lukalamuka ke ‘lusangukilo lwa būmi.’ Inoko, bantu bamo bakasangulwa, kebakasakepo kwifunda mashinda a Yehova. Lusangukilo lwabo lukalamuka ke ‘lusangukilo lwa kidye.’—Tanga Yoano 5:28, 29; Isaya 26:10; 65:20.

Ku mfulo kwa Difuku dilampe dya Butyibi dya myaka kanunu, Yehova ukalwija bantu ba kikōkeji ku bubwaninine bubajinjibajinji. (1 Kodinda 15:24-28) Bine kino i kyepelo kya kutendelwa kidi na bantu bonso ba kikōkeji! Pa ditompo dya mfulo, Leza ukakutulula Satana Dyabola mu lupongo, mwine mwakekala ukutyilwe myaka kanunu. Satana ukatompa monka kubombola bantu kudi Yehova, ino boba bakapela Satana bakekala na būmi bwa nyeke pano pa ntanda.—Tanga Isaya 25:8; Kusokwelwa 20:7-9.

4. Le I Difuku’ka Dikwabo dya Butyibi Dikamwena’mo Muzo wa Muntu?

Bible wingidije kadi kishima ‘difuku dya butyibi,’ mwanda wa kufunkila pa kinkumenkume kikafudija ngikadilo ya bintu ya dyalelo. Dino difuku dikafika mu kitulumukila’nka na mwāfikile Dilobe dya mu mafuku a Noa, dine dyātukije fututu lukongo lonso lubi. Na byadyese, bonakani bwafwena bwa konakanya “bantu bakubulwa bwine-Leza” bukasebela kisaka kipya kya pano panshi dishinda, mwine mukekala “boloke.”—Tanga 2 Petelo 3:6, 7, 13.

Shi usaka kuyukila’ko bivule, tala paje 213-215 wa dino dibuku, Lelo I Bika Bine Bifundija Bible?, dilupwilwe na Batumoni ba Yehova.

[Kifwatulo pa paje 16]

“Butyibi bwa Mfulo,” na Gustave Doré, 1832-1883

[Kutambile Kifwatulo]

Engravings by Doré