FUNDIJAI BENU BANA

Le I Ñeni’ka Yotubwanya Kuboila Kudi Ntapani?

Ntapani otubwanya kuboila’ko ñeni i uno omwene pa kifwatulo wisamba na Yesu. Uno ntapani wialakanyanga pa butapani bwandi. Wanena Yesu amba: “Umvuluka Mfumwami, popa pōkāya mu bulopwe bobe.” Enka na mobwaya kwikimwena pa kifwatulo, Yesu wisambanga na uno ntapani. Le uyukile byamulombola Yesu?​— * Yesu wamulaya amba: “I bine nakunena’mba: Dyalelo dino’di ukēkalanga nami mu Paladisa.”

Le ulanga, Paladisa ikekala namani?​—Pa kuyuka malondololo a bine, twisambilei bidi pa Paladisa yālongēle Leza ba Adama ne Eva, ba mwana-mulume ne mwana-mukaji babajinji. Le ino Paladisa yādi kwepi? Le yādi mūlu’ni nansha pano pa ntanda?​—

Shi ubanena amba yādi pano pa ntanda, udi na bubinga. Nanshi, kitatyi kyotulangulukila pa kwikala kwa ntapani “mu Paladisa,” tufwaninwe kuvuluka’mba ukekala pano pa ntanda kitatyi kyoikekala ke paladisa. Le ino Paladisa ikekala namani?​—Tutalei bidi.

Yehova Leza pa kupwa kupanga ba Adama ne Eva, ba mulume ne mukaji babajinji, Bible unena’mba wēbatūdile mu paladisa pano pa ntanda. Yāityilwe bu ‘budimi bwa Edena.’ Le ulanga, ‘budimi bwa Edena’ bwādi buyampe namani?​—Na bubine, kyādi kifuko kiyampe kadi kilumbuluke kwikala’mo kupita bifuko byo-byonso bidi’ko dyalelo!

Le ulanga’po namani? Le Yesu ukekala pano pa ntanda na ntapani weālakenye bubi bwandi?​—Mhm, Yesu ukekala bu Mulopwe momwa mūlu uludika Paladisa pano panshi. Nanshi, Yesu ukekala na ntapani mu buluji bwa kunena’mba, ukamusangula ku lufu ne kumukwatakanya mu Paladisa  pano panshi. Ino mwanda waka Yesu ukaleka muntu wādi ntapani ekale mu Paladisa?​—Twisambile bidi pa uno mwanda.

Na bubine, uno ntapani walongele bintu bibi. Inoko, midiyo ne midiyo ya bantu bakwabo bāikele’ko pano pa ntanda nabo balongele bintu bibi. Ino bavule mu bukata mwabo, bālongele bintu bibi mwanda kebāfundijibwepo myanda ya Yehova ne byaādi wibasakila kulonga.

O mwanda bantu pamo bwa bano, kubadila’mo ne ntapani wesambile na Yesu ku mutyi, bakasangwilwa ku būmi mu Paladisa pano pa ntanda. Bakafundijibwa kiswa-mutyima kya Leza. Penepa bakabwanya kukalombola’mba basenswe Yehova.

Le uyukile muswelo obakabwanya kulombola’mba bamuswele?​— I na kulonga byobya bibasakila Leza kulonga. Bine, i kyakutendelwa’po kashā kukekala mu Paladisa ne kwikala nyeke na bantu basenswe Yehova kadi besenswe abo bene na bene!

Tanga mu obe Bible

Luka 23:32-43

Ngalwilo 2:7-9

Kusokwelwa 21:3-5

[Kunshi kwa dyani]

[Kifwatulo pa paje 14]

[Kifwatulo pa paje 14]

[Kifwatulo pa paje 15]

[Kifwatulo pa paje 15]