Diambuluisha bena tshimuangi ku Mputu wa pankatshi
Bidimu bishale ebi bena tshimuangi ba bungi mbafume mu Afrike, mu Asie wa pankatshi, ne mu Asie wa ku Sud bua kuya ku Mputu. Bua kubambuluisha, malongolodi a mbulamatadi ne bena budisuile ba miaba idibu batudila badi babapesha bia kudia, miaba ya kusomba, ne babondopa.
Kadi bena tshimuangi kabena dijinga anu ne diambuluisha dia bintu bia ku mubidi to.Malu adi mabafikile adi atatshisha ba bungi ba kudibu mu lungenyi, ke bualu kayi badi kabidi dijinga ne dibasamba ne kupeta ditekemena. Bantemu ba Yehowa ba ku Mputu wa pankatshi badi badienzeja bua kukumbaja majinga aa padibu bateleja bena tshimuangi ne babambila malu a mu Bible adi abasamba.
Busambi bua mu Bible
Katshia ku ngondo wa 8 mu 2015, Bantemu ba mu bisumbu bipite pa 300 ba mu ditunga dia Autriche ne dia Allemagne mbadienzeje bikole menemene bua kusamba bena tshimuangi. Mbamone ne: bena tshimuangi badi batamba kuanyisha bua kupeta mandamuna adi Bible ufila bua nkonko eyi:
Kumbukila ku ngondo wa 8 too ne ku wa 10 mu 2015, Bantemu ba mu matunga aa mbalombeshe tone ya mikanda idi yumvuija Bible mipite pa inayi ku Betele wa ku Mputu wa pankatshi ne mbayabanyine bena tshimuangi kabayi babalomba makuta.
Lutatu lua muakulu ki ndubimanyike
Bena tshimuangi ba bungi badi bakula anu muakulu wabu wa ku dibele nkayawu. Ke bualu kayi Bantemu badi bakuata mudimu ne site wa jw.org udi ne biena-bualu ne filme mu miakulu nkama ne nkama. Matthias ne Petra badi badifile bua kuyisha mu Erfurt, mu Allemagne badi bamba ne: “Misangu mikuabu tutu tuyukila ne bianza, foto, anyi bimfuanyi bizola.” Badi kabidi bakuata mudimu ne programe wa JW Language, programe wa dilonga miakulu udi wambuluisha Bantemu bua kuyisha mukenji wa mu Bible mu miakulu ya bena tshimuangi. Bakuabu pabu badi bakuata mudimu ne programe wa JW Library udi mu miakulu ya bungi bua kubadisha mvese ne kuleja filme.
Bipeta bia dikema
Ntemu mukuabu wa mu Schweinfurt, mu Allemagne, ne mukajende badi bamba ne: “Musumba wa bantu wakatunyunguluka. Mu mêba abidi ne tshitupa tshianana bena tshimuangi bakitaba mikanda mitue ku 360. Ba bungi ba kudibu bavua binyika mutu kakese bua kutuela tuasakidila.” Wolfgang udi mudifile bua kuyisha mu Diez, mu Allemagne, udi wamba ne: “Bena tshimuangi badi basanka padibu bamona muntu ubatabalela. Misangu mikuabu batu balomba mikanda mu miakulu itanu anyi isambombo.”
Bena tshimuangi ba bungi batu batuadija diakamue kubala mukanda, bakuabu pabu batu bapingana bua kuela Bantemu tuasakidila. Ilonca, Ntemu kampanda wa mu Berlin, mu Allemagne, udi wamba ne: “Bansongalume babidi bakangata mikanda. Tshitupa tshia dîba pashishe, bakapingana ne diampa bua kutupesha bu dipa. Bakalomba luse bua muvuabu kabayi ne tshintu tshikuabu tshivuabu mua kutupesha bua kuleja dianyisha diabu.”
“Tuasakidilayi! Tuasakidilayi wa bungi!”
Bena midimu ya diambuluishangana, bena mbulamatadi, ne bena mutumba batu banyisha malu adi bantemu baditatshisha bua kuenza ku budisuile. Muntu kampanda utu wenza midimu ya diambuluishangana udi utangila bena tshimuangi batue ku 300 wakamba ne: “Tuasakidilayi! Tuasakidilayi wa bungi bua munudi nuditatshisha bua benyi badiumvue bimpe!” Muena mudimu mukuabu pende wa mu tshitudilu tshia bena tshimuangi wakambila Bantemu ne: kupesha bena tshimuangi tshintu tshimpe tshia kubala mu muakulu wabu nkuimpe menemene, “bualu mpindieu kabena ne tshikuabu tshia kuenza anu kudia misangu isatu ku dituku.”
Marion ne bayende Stefan badi basombele mu Autriche bakumvuija mpulushi ibidi ivua milue kujadika ne: malu onso avua enda bimpe kipatshila ka mudimu wabu wa ku budisuile. Mpulushi eyi yakabela tuasakidila, kulombayi mikanda ibidi. Marion udi wamba ne: “Misangu ya bungi mpulushi itu ituela kalumbandi bua mudimu wetu.”
Mamu kampanda wa mu Autriche utu ne tshibidilu tshia kufila bintu mu tshitudilu kampanda uvua anu umona ne: Bantemu bavua badifila bua kuambuluisha bena tshimuangi nansha kuulu kuoku kuimpe anyi kubi. Dituku dikuabu wakabambila ne: “Bena tshimuangi badi bushuwa dijinga ne diambuluisha dia bintu bia ku mubidi. Kadi tshidibu natshi dijinga menemene nditekemena. Ke tshinudi nuenu nubapesha menemene.”