Mua kutula makuta
Kutumikila mêyi manene a mu Bible nkuambuluishe bantu ba bungi bua kukepesha ntatu ya makuta.
LONGOLOLA MALU BIMPE
DÎYI DINENE DIA MU BIBLE: “Malu adi bantu badi benza mudimu ne muoyo mujima balongolola adi bushuwa afika ku dikumbana, kadi bantu bonso badi balubakana mbatangile bushuwa ku bupele.”—Nsumuinu 21:5.
TSHIDIDI DIUMVUIJA: Kulonda malu audi mulongolole ne muoyo mujima ke bualu bunene budi mua kukuambuluisha. Nunku, anji longolola malu bimpe kumpala kua kutula makuta. Manya ne: kuakusumba pamuapa tshintu tshionso tshiudi ujinga to. Nanku ikala utula makuta ne meji.
TSHIUDI MUA KUENZA:
-
Tula makuta anu bungi buudi mulongolole. Funda bungi bua bintu bionso biudi musue kusumba, ne bitapulula mu bitupa bishilangane. Pashishe ukosele tshitupa tshionso bungi bua makuta a kutula. Wewe mutule makuta mapite auvua mulongoluele tshitupa tshimue, wangate makuta a mu tshitupa tshikuabu bua kukumbaja muaba au. Tshilejilu, wewe mutule makuta a bungi bua kasolonyi kupita muuvua mulongolole, wangate mu auvua muteke bua tshintu tshidi katshiyi ne mushinga wa bungi bu mudi kuya kudia mu restoran.
-
Kubuedi mabanza tshianana tshianana to. Kuoku mushindu, epuka mabanza. Kadi ikala ulama makuta bua kusumba bintu biudi nabi dijinga. Biwikala ne karte ka kusumba naku bintu, dienzeja bua kufuta makuta a ngondo yonso mujima bua kabalu kukufutshisha makuta bu a tshia kasombela. Wewe musombe makuta, ulongolole muudi mua kuafuta, ne pashishe uafute bilondeshile muudi mulongolole amu too ne paudi ujikija dibanza.
Makebulula kampanda adi aleja ne: padi bantu basumba bintu ne karte batu ne tshibidilu tshia kutula makuta a bungi. Nunku wewe ne karte ka kusumba naku bintu, dielela mikalu.
DIMUKILA BIBIDILU BIBI
DÎYI DINENE DIA MU BIBLE: “Muena lulengu kena udima mu muvu wa mashika makole, nunku neikale ulombangana mu tshikondo tshia dinowa pikalaye kayi ne tshintu.”—Nsumuinu 20:4.
TSHIDIDI DIUMVUIJA: Lulengu ludi mua kulela bupele. Nunku ikala muenji wa mudimu, ne kuoku mushindu, wikale ulama makuta bua malu adi mua kulua kumpala.
TSHIUDI MUA KUENZA
-
Enza mudimu bikole. Ikala muenji wa mudimu wa tshisumi ne wa kueyemena bua ulame mudimu webe udi ukupetesha makuta. Bamfumu ba mudimu batu banange bantu batu benza mudimu bawenzelamu.
-
Ikala muena bululame. Kuikadi wiba mfumuebe wa mudimu to. Dipanga bululame didi mua kukunyangila lumu ne kulua kukupangisha bua kupeta mudimu mukuabu.
-
Kuikadi ne lukuka to. Wewe ukeba anu makuta wamba kufua, bidi mua kukusamisha ne kukunyangila malanda ne bakuabu. Manya ne: muoyo ke udi ne mushinga kupita makuta.
MÊYI MANENE MAKUABU A MU BIBLE
Dibadila Bible ku Enternete, mu site wa jw.org. Udiku mu miakulu nkama ya bungi
KUJIMIJI DÎBA NE MAKUTA KU BIBIDILU BIBI TO.
“Bualu mukuatshiki wa maluvu ne mudiavi nebabuele mu bupele, ne dibungila nedivuadike muntu mikusu.”—NSUMUINU 23:21.
KUSAMISHI MUTU BIKOLE BUA MAKUTA TO.
“Lekelayi kuditatshisha bua mioyo yenu bua tshinuikala mua kudia anyi bua tshinuikala mua kunua, anyi kuditatshisha bua mibidi yenu bua tshinuikala mua kuvuala.”—MATAYI 6:25.
KUIKADI NE DIALAKANA TO.
“Muntu udi walakana udi ne muoyo kuulu kuulu bua kupeta bubanji, kayi mumanye ne: bupele nebumukuate.”—NSUMUINU 28:22.
Mona bikuabu:
BIENA-BUALU BIKUABU
Muudi mua kutula makuta makese audi nawu
Lutatu lua makuta lua nunku ludi mua kukukebela tunyinganyinga, kadi mibelu mimpe ya meji idi mu Bible idi mua kukuambuluisha bua kumanya mua kutula makuta makese audi nawu.
MANDAMUNA A NKONKO YA MALU A MU BIBLE
Ntatu ya makuta ne mabanza—Bible udi mua kutuambuluisha anyi?
Makuta kaena mua kusumba disanka to, kadi mêyi manene a mu Bible adi mua kukuambuluisha mu malu a makuta.
