Fuanyikijabi ne: udi ne disama dikole diudi ujinga ne: doktere akumpande. Udi ne bua kumanya doktere au bimpe, bualu muoyo webe udi mu bianza biende. Ki mbia meji bua kuanjiku kumanya bikala doktere au mmumanye bimpe kupandangana anyi?

Bia muomumue, mbia mushinga bua kukonkonona bimpe tshitendelelu tshiudi. Wewe muikale mu tshitendelelu kampanda, umanye ne: malanda ebe ne Nzambi ne muoyo webe wa tshiendelele bidi mu bianza biatshi.

Yezu wakatuleja amue malu adi mua kutuambuluisha bua kujingulula bikala tshitendelelu tshitudi tshilelela. Wakamba ne: “Mutshi wonso badi bawumanyina ku bimuma biawu.” (Luka 6:44) Tshilejilu, paudi ukonkonona bimpe tshitendelelu kampanda, mbimuma kayi biudi umona tshitendelelu atshi nabi? Bamfumu ba tshitendelelu atshi badiku batamba kuimanyina anu pa makuta anyi? Bantu badi momu badiku batumikila mikenji ya Nzambi idi itangila malu a mvita ne a bikadilu bilenga anyi? Kadi, kudiku tshitendelelu tshidi bantu mua kueyemena anyi? Tudi tukulomba bua wewe kukonkonona malu adi mu biena-bualu bidi bilonda ebi.