PAUDI ubala biambilu bibidi ebi, ntshiepi tshidi tshipetangana ne mmuenenu webe? Bantu ba bungi batu bamona ne: mêyi a Shaula wa ku Tâso udibu babikila kabidi ne: mupostolo Paulo aa mmêyi adi akankamija. (Bienzedi 17:26, 27) Mu Bible mudi mêyi makuabu a mushidu eu. Tshilejilu, Yezu wakenza disambila divua difila dishindika dia ne: bayidi bende bavua mua kufika ku dimanya Nzambi ne kupeta mabenesha ende.​—Yone 17:3.

Kadi, bena nkindi bu mudi Philon bavua bobu ne wabu mmuenenu wa malu. Bavua bela meji ne: katuena mua kumanya Nzambi nansha kakese bualu malu ende kaatu umvuika to. Kadi tudi mua kupetela bulelela penyi?

Bible udi uleja patoke ne: kudi amue malu adi atangila Nzambi adi makole bua bantu kuumvua. Tshilejilu, bantu kabena mua kumanya bule bua tshikondo tshia dikalaku dia Nzambi, bualabale bua lungenyi luende ne ndondo wa meji ende to. Bidi bipitshila ngumvuilu wa bantu. Kadi, ngikadilu ya Nzambi eyi kayena itupangisha bua kumumanya to. Nunku, tuetu tuelelangana meji pa malu manene aa  bidi mua kutuambuluisha bua ‘kusemena pabuipi ne Nzambi.’ (Yakobo 4:8) Tukonkononayi bilejilu bikese bia malu atudi katuyi mua kumvua aa. Pashishe netumone ngikadilu ya Nzambi itudi mua kumvua bimpe.

DIKALAKU DIA NZAMBI DIA TSHIENDELELE: Bible udi ulongesha ne: Nzambi udiku bua “kashidi ne kashidi.” (Musambu 90:2, MMM) Mu mêyi mukuabu, Nzambi katu ne mbangilu ne kakuikala ne nshikidilu to. Bilondeshile mudi bantu bela meji, ‘bungi bua bidimu biende kabuena mua kumanyibua.’​—Yobo 36:26.

Mudibi mua kukuambuluisha: Nzambi mmulaye bua kukupesha muoyo wa tshiendelele wewe mufike ku dimumanya bushuwa. (Yone 17:3) Mmunyi muvua mulayi eu mua kuikala mulelela bu Nzambi kayi ushala ne muoyo kashidi? Anu “Mukalenge wa tshiendelele” ke udi mua kukumbaja mulayi eu.​—1 Timote 1:17.

LUNGENYI LUA NZAMBI: Bible udi ulongesha ne: “lungenyi luende kaluena kujingulula,” bualu meji ende mmapite etu kule ne kule. (Yeshaya 40:28; 55:9, MMM) Bible udi wela lukonko ludi lueleshisha meji elu: ‘Mmuntu kayi udi mumanye meji a Mukelenge bua kumuyisha yeye?’​—1 Kolinto 2:16.

Mudibi mua kukuambuluisha: Nzambi udi ukumbana kuteleja miliyo ne miliyo ya masambila musangu umue. (Musambu 65:2) Utu kabidi mumaye patu mushamusha wonso ukuluka panshi. Lungenyi lua Nzambi ludi mua kupata bua bungi bua malu, bimupangisha bua kuteleja masambila ebe anyi? Tòo, bualu lungenyi luende kaluena ne mikalu. Bualu bua mushinga mbua ne: wewe ‘udi ne mushinga mupite wa mishamisha ya bungi’ ku mêsu kuende.​—Matayi 10:29, 31.

NJILA YA NZAMBI: Bible udi uleja ne: muntu kena mua ‘kujingulula mudimu wa Nzambi wakenzaye ku tshibangidilu tshia buloba too ne ku nshikidilu kuabu.’ (Muambi 3:11) Nunku, katuakumanya malu onso pa bidi bitangila Nzambi to. Kakuena muntu udi mua “kulondolola” meji adi mu njila ya Nzambi to. (Lomo 11:33) Kadi Nzambi mmusue kumanyisha njila yende kudi bantu badi basue kumusankisha.​—Amosa 3:7.

Mudibi mua kukuambuluisha: Wewe ubala Bible ne umulonga, kuakulekela kulonga malu mapiamapia adi atangila Nzambi ne njila yende to. Ebi bidi biumvuija ne: tudi mua kusemena pabuipi ne Tatu wetu wa mu diulu bua kashidi.

Bu mutudi katuyi mua kumvua bimpe imue ngikadilu ya Nzambi, kabiena bisua kumvuija ne: katuena mua kufika ku dimumanya to. Bible udi ne malu a bungi adi atuambuluisha bua kumanya Nzambi bimpe. Tukonkononayi bimue bilejilu:

DÎNA DIA NZAMBI: Bible udi utulongesha ne: Nzambi mmudinyike dîna. Udi wamba ne: ‘Meme ndi Yehowa, adi ndîna dianyi.’ Dîna dia Nzambi didi disanganyibua mu Bible misangu mitue ku 7 000 kupita mêna makuabu adimu.​—Yeshaya 42:8.

Mudibi mua kukuambuluisha: Yezu wakamba mu disambila diende dia tshilejilu ne: “Tatu wetu udi mu diulu, banemeke dina diebe.” (Matayi 6:9) Udiku kabidi mua kutela dîna dia Nzambi mu masambila ebe anyi? Yehowa mmusue kusungila muntu yonso udi unemeka dîna diende.​—Lomo 10:13.

MUABA UDI NZAMBI MUSOMBELE: Bible udi ulongesha ne: kudi miaba ibidi: muaba udikauyi umueneka udi bifukibua bia mu nyuma bisombele ne buloba ne tshibuashibuashi bitudi tumona ne mêsu. (Yone 8:23; 1 Kolinto 15:44) Mu Bible, muaku “diulu” utu misangu ya bungi uleja muaba wa mu nyuma. Mu “diulu” amu ke muaba udi Mufuki musombele.​—1 Bakelenge 8:43.

Mudibi mua kukuambuluisha: Udi mumvue tshidi  Nzambi bimpe menemene. Mufuki ki mbukole budi kabuyi bumueneka budi miaba yonso ne mu bintu bionso to. Yehowa mmuntu mulelela udi musombele pa muaba mumanyike. Kabidi “kakuena tshifukibua tshidi tshisokome ku mêsu kuende.”​—Ebelu 4:13.

BUMUNTU BUA NZAMBI: Bible udi ulongesha ne: Yehowa udi ne ngikadilu milenga. “Nzambi udi dinanga.” (1 Yone 4:8) Kena mua kushima to. (Tito 1:2) Kena ne kansungansunga, mmuule tente ne luse, uditeka pa muaba wa bakuabu ne katu ukuata tshiji lubilu. (Ekesode 34:6; Bienzedi 10:34) Bantu ba bungi badi mua kukema padibu bumvua ne: Mufuki mmusue kudia “bulunda bujalame” ne bantu badi bamunemeka.​—Musambu 25:14.

Mudibi mua kukuambuluisha: Udi mua kulua mulunda wa Yehowa. (Yakobo 2:23) Nunku, wewe mumanye bumuntu bua Yehowa, udi mua kumvua miyuki ya mu Bible bimpe.

Bible udi uleja bimpe tshidi Yehowa Nzambi. Mbipepele bua kumanya tshidiye. Mufuki mmusue bua ufike ku dimumanya. Dîyi diende didi diamba ne: ‘biwamukeba, neumupete.’ (1 Kulondolola 28:9) Kuenaku mua kubala Bible ne kuelangana meji a malu adimu bua ufike ku dimanya Nzambi anyi? Wewe wenza nunku, Bible udi ulaya ne: Nzambi ‘neasemene pabuipi nebe.’​—Yakobo 4:8.

Udi mua kudiebeja ne: ‘Meme tshiyi mumvue malu onso adi atangila Mufuki, mmunyi mundi mua kulua mulunda wende?’ Tukonkononabi bualu ebu: Mulunda wa munganga wa pa muoyo udiku muenzejibue bua kupeta diplome dia bumunganga anyi? Nansha kakese! Mulunda wa munganga udi mua kuikala ne wende mudimu udiye wenza mushilangane ne wa munganga. Kadi badi mua kuikala anu balunda ba pa muoyo. Tshia mushinga ntshia se: mulunda wa munganga mmumanye bumuntu bua munganga, tshidiye musue ne tshidiye kayi musue. Bia muomumue, Bible udi mua kukuambuluisha bua kumanya bumuntu bua Yehowa anu muudi musue, bua kukolesha bulunda buebe nende.

Bible kena wakula malu a Mufuki pa mutu pa mutu to, kadi udi ne malu a bungi adi mua kutuambuluisha bua kufika ku dimanya Nzambi. Udiku musue kulonga malu a bungi adi atangila Yehowa Nzambi anyi? Bantemu ba Yehowa badi balongesha bantu Bible tshianana ku mbanza yabu kabayi bafuta makuta. Tudi tukulomba bua kukeba Bantemu ba Yehowa ba muaba uudi musombele anyi buela mu site wetu wa www.dan124.com, ku Enternete.