UMANYE ne: Yehowa neikaleku bua kukuambuluisha paudi wenda upingana kudiye. Neakuambuluishe bua kupita bimpe ne ntatu yebe, kujikija tunyinganyinga tuudi natu ku muoyo, ne bua kupeta ditalala dia mu lungenyi ne dia mu muoyo didi difumina ku dikala ne kondo ka muoyo kimpe. Dîba adi, udi mua kudiumvua kabidi ne muoyo wa kuenzela Yehowa mudimu pamue ne bena Kristo nebe bakuabu. Nsombelu webe neikale mufuanangane ne wa bamue bena Kristo ba mu bidimu lukama bua kumpala bavua mupostolo Petelo mufundile ne: “Nuvua bu mikoko, nupambuka; kadi mpindieu, nudi bapingane kudi mulami wa mikoko ne mutangidi wa anyima yenu.”—1 Petelo 2:25.

Kupingana kudi Yehowa ke bualu bua mushinga buudi mua kuenza. Bua tshinyi? Neusankishe mutshima wa Yehowa bikole. (Nsumuinu 27:11) Anu bu muudi mumanye, Yehowa udi ne mutuye udiumvua, nanku bitudi tuenza bidi mua kumusankisha anyi kumunyingalaja. Tshidibi, Yehowa katu utuenzeja bua tuetu kumunanga anyi kumuenzela mudimu to. (Dutelonome 30:19, 20) Mumanyi kampanda wa malu a mu Bible udi wamba ne: “Kakuena muntu udi mua kukangula muoyo webe to, udi ne bua kuwukangula wewe nkayebe.” Tuetu tuenzela Yehowa mudimu ne muoyo wa dinanga, tudi mua kuitaba bua kukangula tshibi tshia muoyo wetu. Tuetu benza nanku, tudi tumupesha dipa dia mushinga mukole, mmumue ne: muoyo wetu mutoke, ne tudi tuenza bua ikale ne disanka dia bungi menemene ku muoyo. Bushuwa, kakuena tshintu nansha tshimue tshitudi mua kufuanyikija ne disanka ditudi tupeta patudi tupesha Yehowa ntendelelu udi mumuakanyine.—Bienzedi 20:35; Buakabuluibua 4:11.

Kabidi paudi utuadijilula ntendelelu webe bu kumpala, majinga ebe a mu nyuma neakumbane. (Matayi 5:3) Mmushindu kayi? Bantu ba pa buloba bujima batu badiebeja ne: ‘Bua tshinyi tudi pa buloba?’ Badi ne nzala ya kumanya mandamuna a nkonko idi itangila tshipatshila tshia muoyo wetu. Bantu badi ne dijinga edi bualu Yehowa uvua mubafuke nadi. Ne uvua mutufuke bua kuikala kudiumvua bimpe patudi tumuenzela mudimu. Bushuwa, disanka ditudi tupeta bua dimanya ne: tudi tutendelela Yehowa bua dinanga kadiena kuambangana nadi.—Musambu 63:1-5.

Ikala mumanye ne: Yehowa mmusue bua upingane kudiye. Mmunyi muudi mua kujadika bualu ebu? Tangila malu aa: bua kufundabu malu adi mu broshire eu mbasambile bikole. Mbakutuadilaye pamuapa kudi mukulu kampanda anyi muena Kristo nebe mukuabu. Pashishe, wewe kumvua muoyo ukusaka bua kumubala ne kuenza malu adimu. Bionso ebi bidi bijadika mudi Yehowa kayi mukupue muoyo. Kadi udi ukusemeja kudiye ne dinanga dionso.—Yone 6:44.

Bidi bitukolesha ku muoyo bua kumanya ne: Yehowa kena upua basadidi bende badi bapambuke muoyo to. Ke tshivua muanetu wa bakaji mukuabu diende Donna mufike ku dijingulula. Udi wamba ne: “Mvua musesuke ku bulelela ku kakese ku kakese, kadi bivua bimfikila bua kuela meji pa tshidi Musambu wa 139:23, 24 wamba tshia ne: ‘Nzambi, utangile munda muanyi, umanye mutshima wanyi. Untete, umanye meji anyi. Umone ne malu mabi adi munda muanyi, undombole mu njila wa tshiendelele.’ Mvua mumanye ne: tshiena wa mu ba pa buloba to, tshitu mene muanji kudiumvua bimpe mu ba pa buloba to; ndi mumanye ne: mvua dijinga ne bulongolodi bua Yehowa. Ngakatuadija kumona ne: Yehowa kavua mundekele to; tshimvua natshi dijinga nnjila wa kualukila kudiye. Mpindieu ndi ne disanka bua mundi mualukile kudiye.”

Dijinga dietu dinene ndia ne: wewe pebe upeta kabidi “disanka dia Yehowa.” (Nehemiya 8:10) Kuakunyingalala musangu nansha umue bua muudi mupingane kudi Yehowa to.