DILONGESHA DIA 09
Semena kudi Nzambi mu disambila
Ukadi mumvuaku dijinga dia wa kukuludika mu bualu kampanda anyi? Udi ne nkonko ya mushinga iudi musue bua bakuandamune anyi? Udi dijinga ne busambi ne dikankamija anyi? Udi musue kuikala pabuipi ne Yehowa anyi? Disambila didi mua kukuambuluisha bua kukumbaja malu onso aa. Kadi mmushindu kayi muimpe utudi mua kusambila? Nzambi utu uteleja masambila onso anyi? Ntshinyi tshiudi mua kuenza bua Nzambi kuteleja masambila ebe? Tukonkonone malu aa.
1. Nnganyi utudi ne bua kusambila? Tudi mua kusambila bua malu kayi?
Yezu uvua mutulongeshe ne: tudi ne bua kusambila anu Tatu wetu wa mu diulu. Yeye muine uvua usambila anu Yehowa. Wakamba ne: “Nunku, nudi ne bua kusambila mushindu eu: ‘Tatu wetu udi mu diulu . . .’” (Matayi 6:9) Patudi tulomba Yehowa mu disambila, tudi tukolesha bulunda buetu nende.
Tudi mua kusambila bua bualu buonso butudi nabu dijinga. Kadi bua Nzambi kuandamuna masambila etu, mbimpe masambila au ikale apetangana ne tshidiye musue. “Tshintu tshionso tshitudi tulomba bilondeshile disua [dia Nzambi], udi utumvua.” (1 Yone 5:14) Yezu uvua mufile bilejilu bia malu mimpe atudi mua kulomba mu disambila. (Balayi Matayi 6:9-13.) Tuetu bamane kuleja Nzambi malu atudi nawu ku muoyo mu disambila, katupu muoyo bua kumuela tuasakidila bua bionso bidiye mutuenzele ne kumulomba bua bantu bakuabu to.
2. Tudi ne bua kusambila mushindu kayi?
Bible udi utukankamija bua ‘kupumuna mioyo yetu kumpala kua Nzambi.’ (Misambu 62:8) Nanku mbimpe tuikale tuela masambila etu ne muoyo wetu wonso mujima. Tudi mua kusambila ne dîyi dikole anyi munda munda, bikale mushindu wonso udi uleja kanemu. Tudi mua kusambila dîba kayi dionso nansha muaba kayi wonso.
3. Mmunyi mutu Nzambi wandamuna masambila etu?
Yehowa utu wandamuna masambila etu mu mishindu ya bungi. Mmutupeshe Dîyi diende mu Bible ditu ditupetesha mandamuna a nkonko yetu misangu yonso. Kubala Dîyi dia Nzambi kudi mua “[kuvuija] muntu udi kayi ne dimanya muena meji.” (Misambu 19:7; balayi Yakobo 1:5.) Nzambi udi mua kutupesha ditalala dia mu lungenyi patudi tutuilangana ne ntatu. Udi kabidi mua kusaka batendeledi bende bua kutuambuluisha tshikondo tshitudi dijinga ne diambuluisha.
BUELA MU BUONDOKE
Mona muudi mua kuela masambila a muoyo mujima adi asankisha Nzambi ne mudi disambila mua kukuambuluisha.
4. Tshidi Nzambi utulomba bua kutelejaye masambila etu
Ntshinyi tshidi mua kutujadikila ne: Nzambi neateleje masambila etu anyi kakuateleja? Tangilayi FILME.
Yehowa mmusue bua tuikale tumulomba yeye mu masambila etu. Balayi Misambu 65:2, pashishe nuandamune nkonko eyi:
-
Udi umona munyi: “Muteleji wa disambila” mmusue bua wewe kumulomba mu disambila anyi? Bua tshinyi?
Tuetu basue bua Nzambi ateleje masambila etu, mbimpe tuenze muetu muonso bua kutumikila mikenji yende. Balayi Mika 3:4 ne 1 Petelo 3:12, pashishe nuandamune lukonko elu:
-
Mmalu kayi atudi ne bua kuenza bua Yehowa kutelejaye masambila etu?
Patu mvita yenzeka, bantu batu baluishangana batu basambila balomba bonso ditshimuna. Mbia meji bua kutekemena ne: Nzambi neandamune masambila au anyi?
5. Masambila etu ikale afumina mu muoyo wetu
Mbalongeshe bamue bua kuikala kuambulula masambila amue amue ku muaku ku muaku. Kadi Nzambi mmusue bua tuikale tusambila mushindu au anyi? Balayi Matayi 6:7, pashishe nuandamune lukonko elu:
-
Ntshinyi tshiudi mua kuenza bua kubenga ‘kuambulula malu amue amue’ mu masambila ebe?
Udi mua kuelangana meji dituku dionso a bualu kampanda buimpe budi Yehowa mukuenzele, wewe kumuela tuasakidila bua bualu abu. Wewe muenze nanku matuku onso a mu lumingu, neufike ku disambila bua malu 7 mashilangane kuyi muambulule malu amue amue to.
Tatu muimpe utu musue bua muanende ikale umuambila malu a mu muoyo wende. Bia muomumue, Yehowa mmusue bua tuikale tumuambila malu a mu muoyo wetu mu disambila
6. Disambila ndipa dia Nzambi
Mmushindu kayi udi disambila ditukolesha mu bikondo bimpe nansha mu bikondo bikole? Tangilayi FILME.
Bible udi uleja ne: disambila didi mua kutupetesha ditalala dilelela mu lungenyi. Balayi Filipoyi 4:6, 7, pashishe nuandamune nkonko eyi:
-
Nansha mutu disambila kadiyi dijikija ntatu yetu misangu yonso, mmushindu kayi udidi dituambuluisha?
-
Udi musue kusambila bua malu kayi?
Udi mumanye anyi?
Muaku “amen” udi umvuija “bikale nanku” anyi “menemene.” Katshia anu kutshivuabu bafunda Bible aku too ne lelu, batu anu bamba “amen” ku ndekelu kua masambila.—1 Kulondolola 16:36.
7. Keba dîba dia kusambila
Misangu mikuabu, bua bia bungi bia kuenza bidi mua kutufikila bua kupua muoyo bua kusambila. Ntshinyi tshidi tshileja ne: Yezu uvua wangata disambila ne mushinga wa bungi? Balayi Matayi 14:23 ne Mâko 1:35, pashishe nuandamune nkonko eyi:
-
Ntshinyi tshivua Yezu wenza bua kupeta dîba dia kusambila?
-
Ndîba kayi diudi mua kupeta mpunga wa kusambila?
BAMUE BATU BAMBA NE: “Kusambila kakuena anu ne diambuluisha to, kudi kukushiya anu musulakane patupu.”
-
Wewe udi wamba tshinyi?
TSHIA KUKUATA
Patudi tusambila ne muoyo mujima, tudi tusemena pabuipi ne Yehowa Nzambi, tupeta ditalala mu lungenyi, ne bukole butudi nabu dijinga bua kumusankisha.
Diambulula
-
Nnganyi utudi ne bua kusambila?
-
Tudi ne bua kusambila mushindu kayi?
-
Disambila didi ne diambuluisha kayi?
BIA KUTANGILA KABIDI
Mona mandamuna a nkonko itu bantu batamba kuela bua disambila.
“Malu muanda mutekete audi ne bua kumanya bua disambila” (Tshibumba tshia Nsentedi tshia 1/1/2011)
Mona malu manene adi atusaka bua kusambila ne mushindu utudi mua kulengeja masambila etu.
“Bua tshinyi mbimpe kusambila?” (Tshiena-bualu tshia mu jw.org)
Mona tshidi Bible ulongesha bua muntu utudi ne bua kuikala tusambila.
“Mbimpe ngikale ntuma masambila anyi kudi bansantu anyi?” (Tshiena-bualu tshia mu jw.org)
Mu filme wa musambu eu, dimuenena bikala muaba anyi dîba ni bidi ne mushinga bua kushisha kusambila.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
