Bantemu ba Yehowa batu benza mudimu munene wa kuyisha ne wa kuambuluisha badi mu ntatu mu matunga mapite pa 200. Kadi anu matunga matue ku 35 a ku matunga onso aa ke atu benamu bafila mapa bungi bukumbane bua kudijikijilabu majinga abu onso mu midimu eyi bimpe. Mmunyi mutubu bapeta makuta bua kuendesha midimu yetu mu matunga mapele?

Bena mu Kasumbu kaludiki ka Bantemu ba Yehowa batu bakonkonona midimu ne majinga a mu nyuma a bena Kristo nabu ba pa buloba bujima. Makuta atubu bapeta batu baatula mu bulongame ne meji onso bilondeshile programe. Betele kampanda yeye mupete mapa bungi bupite buvuaye ujinga bua midimu ya mu ditunga didiye utangila, udi ufila mapa a pa mutu au bua bambuluishe matunga adi mapangile. Ngenzelu eu udi upetangana ne tshiakenza bena Kristo ba kumpala bavua bambuluishangana bua ‘kukumbajijangana.’ (2 Kolinto 8:14) Bavua bangata bintu biabu bia pa mutu bua kukumbajija ku bivua bena Kristo bakuabu bapangile.

Bana betu batu bapeta mapa a pa mutu a kudi Betele mikuabu batu bumvua mushindu kayi? Tshilejilu, tshitupa tshinene tshia bantu ba mu Tanzanie batu badia anu tubiakudia tua makuta mashadile ku 4 000 Fc ku dituku. Bakangata makuta a kudi Betele mikuabu ayi bua kulongoluesha Nzubu wa Bukalenge wa tshisumbu tshia Mafinga. Bena mu tshisumbu atshi bakafunda ne: “Katshia anu batulongoluela Nzubu wa Bukalenge, bungi bua bantu badi babuela mu bisangilu mbulue kuvula bikole menemene! Tudi tuela bulongolodi bua Yehowa ne bana betu bonso ba pa buloba bujima tuasakidila wa manza ntente bua muoyo wabu wa kupangana udi mutupeteshishe muaba muimpe mulengele wa kutendelela.”

Tshipupu tshia korona ntshibueje bana betu bakuabu ba mu Sri Lanka mu biyole bia nzala. Munkatshi muabu mudi muanetu wa bakaji Imara Fernando ne muanende mutekete wa balume Enosh. Kadi anu bua mapa avua mafumine mu matunga makuabu, bobu ne bana betu bakuabu bakapeta diambuluisha divuabu bakengela. Bakafunda kamukanda ne: “Tudi tuela bana betu tuasakidila bua dinanga didibu batuleje mu bikondo bikole ebi. Tudi ne disanka pa diodi dia kuikala nabu petu mu dîku edi, ne tudi anu tusambila bua Yehowa ambuluishe bana betu bonso mu matuku a ku nshikidilu aa.”

Nansha bana betu basombele muaba kayi, muoyo utu ubasaka bua kuabanyangana ne bakuabu bidibu nabi. Tshilejilu, Enosh wakadienzela kashete kavuaye wela makuta a yeye pende kufila bua kuambuluisha nawu mêku adi mu lutatu. Muanetu Guadalupe Álvarez utu pende ne muoyo wa kupangana wa muomumue. Mmusombele mu Mexique mudi anu bakese bafutshibua difutu kabidi dishadile ku mudimu anyi bapeta anu tukuta tukese tua makasa ku midimu yabu. Nansha nanku, utu anu ufila muende mudiye mukokeshile. Mmufunde ne: “Ndi ngela Yehowa tuasakidila bua buimpe buende ne dinanga diende dia lulamatu. Ndi mumanye ne: nebasakidile mapa anyi aa ku a bana betu bakuabu bua kuambuluisha nawu bana betu badi mu lutatu.”

Betele itu ituma makuta miaba idibu nawu dijinga ayi itu ne disanka dia kuatuma. Muanetu Anthony Carvalho wa mu Komite wa filiale wa mu Brésil udi wamba ne: “Bidimu bia bungi kumpala, mudimu wa mu ditunga dietu uvua wenda anu ne makuta avua matunga makuabu atuambuluisha nawu. Bua dituambuluisha adi, mudimu wetu mmuye kumpala mu mushindu wa dikema. Kadi mpindieu mukadi malu a mpetu makananganaku mu ditunga dietu, tukadi petu ne diakalenga dia kuambuluisha bakuabu. Bana betu munemu badi batangidila mudimu wa diyisha mu tshipidi tshiawu tshia buloba bujima ne bajingulula tshidibu pabu mua kuenza bua kuambuluisha, bu bayidi ba Yezu bena muoyo wa didifla.”

Mmushindu kayi muimpe udi Bantemu ba Yehowa mua kuambuluisha bena Kristo nabu badi bakenga? Kabena batuma makuta abu musangu umue ku Betele ya matunga makuabu to, kadi badi baafila bu mapa bua mudimu wetu wa buloba bujima. Badi baafidila nanku mu tshisumbu mu kashete ka mapa kadibu bafunde ne: “Mudimu wetu wa buloba bujima” anyi baatumina mu donate.dan124.com. Tutu ne dianyisha dia bungi bua mapa onso aa.