Riwruok mar Joneno mag Jehova ma kindegi ne ochakore e giko higini mag 1800. E kindeno, grup matin mar jopuonjre Muma ma nodak Pittsburgh, Pennsylvania, Amerka, nochako nono Muma e yo matut. Ne gipimo puonj mag kanise koda gima Muma puonjo kuom adier. Ne gichako goyo gik ma ne gipuonjore e buge, gasede miuso, koda e gaset ma sani iluongo ni Ohinga mar Jarito—Malando Pinyruodh Jehova.

Achiel kuom jogo ma ne puonjore Muma kindeno niluongo ni Charles Taze Russell. Kata obedo ni Russell ema ne tayo tij puonjo ji Muma e kindeno kendo en ema ne ondiko The Watchtower mokwongo, ok en adier ni en ema nochako din mar Joneno mag Jehova. Gima duong’ ma ne Russell kod jopuonjre Muma ma ne iluongo ni Bible Students ne dwaro chopo, ne en konyo ji ng’eyo puonj mag Yesu Kristo kendo konyogi luwo ranyisi mar Jokristo mokwongo. Nikech Yesu e Jachak din mar Jokristo, en ema wakawo ni nochako riwruok marwa.—Jo Kolosai 1:18-20.