1. Ang’o momiyo Nyasaye nochweyo piny?

NYASAYE dwaro mondo piny obed ka maber ahinya. Jehova dwaro mondo piny opong’ gi ji mamor, kendo madak maonge tuoche. Muma wacho ni ‘Nyasaye nopidho puodho e Eden’ kendo ni ‘nomiyo yien duto mabeyo mar neno kendo maber mar chiemo odongi.’ Bang’ chweyo dichwo gi dhako mokwongo, Adam gi Hawa, Nyasaye ne oketogi e kar dak maberno kendo ne owacho nigi ni: “Nyuoluru kendo medreuru, upong’ piny, kendo ubedi gi loch kuome.” (Chakruok 1:28; 2:8, 9, 15) Kuom mano, Nyasaye ne dwaro ni mondo dhano obed gi nyithindo, giyar tong’ mag puodhono e piny mangima, kendo girit le ma ne nitie.

2. (a) Wang’eyo nade ni dwaro mar Nyasaye ne piny notimre? (b) Kaluwore gi Muma, joma nodag e piny nyaka chieng’ gin joma chalo nade?

² Be iparo ni dwaro mar Jehova Nyasaye ni mondo dhano odag e paradis e piny kae notimre? Nyasaye wacho ni, “Asewacho, kendo anami wachna mondo otimre.” (Isaiah 46:9-11; 55:11) Ee, Nyasaye notim dwaro mare! Owacho ni ‘nochweyo [piny] ok manono, to nolose mondo ji odagie.’ (Isaiah 45:18) Nyasaye ne dwaro ni jo  machalo nade ema mondo odag e piny? Kendo ne odwaro ni mondo gidag kuom kinde maromo nade? Muma dwoko kama: ‘Jo matir ginicham piny, mi ginidagie nyaka chieng.’—Zaburi 37:29; Fweny 21:3, 4.

3. Piny sani opong’ gi gik mage makelo lit, kendo mano miyo wabedo gi penjo mage?

³ Kuom adier, mani podi ok otimore. Ji sani bedo matuwo kendo tho; bende ginegore e lwenje. Nitie gima ne odhi marach. Kata kamano, kuom adier, Nyasaye ne ok dwar mondo piny obed kaka wanene ndalogi! Ang’o ma ne otimore? Ang’o momiyo dwaro mar Nyasaye podi ok otimore? Onge buk ma dhano ondiko manyalo nyisowa wechego, nikech chandruogno ne ochakore e polo.

4, 5. (a) Kuom adier, ng’ano ma ne oloso gi Hawa kotiyo gi thuol? (b) Ng’at ma ne kite ber nyalo lokore mabed jakuo e yo mane?

⁴ Buk mokwongo ei Muma wuoyo e wi ng’at ma ne kwedo Nyasaye ma ne odhi e puodho mar Eden. Jakwedeno iluongo ni “thuol,” kata kamano ok en mana le. Buk mogik ei Muma luonge ni “Jachien kendo Satan, ma wuondo piny ngima.” Iluonge bende ni ‘thuol machon.’ (Chakruok 3:1; Fweny 12:9) Malaikani nigi teko, kendo en chwech ma ok ne. Ne otiyo gi thuol mondo owuo kod Hawa, mana kaka ng’ato nyalo miyo onere ka gima dwonde wuok kuom kido moro molos. Nyaka bed ni malaikano ne nitie kane Nyasaye chweyo piny ne dhano.—Ayub 38:4, 7.

⁵ Nikech chwech mag Jehova duto beyo, kara ng’ano ma nochweyo “Jachien,” kata “Satan”? Dwoko mayot en ni achiel kuom yawuot Nyasaye ma malaike, ne olokore mobedo Jachien. Mano ne nyalo timore nade? Ng’e ni, kata sani, ng’at ma kinde moko ne kite ber kendo nohero  adiera, nyalo lokore ma bed jakuo. Mano timore nade? Onyalo weyo mondo gombo ma ok ber ochak dongo e chunye. Ka odhi nyime gi paro wachno, gombo marachno nyalo bedo maduong’ ahinya. Bang’e ka thuolo oneno, onyalo timo kaluwore gi gombo marachno ma osebedo ka en-go e paro.—Jakobo 1:13-15.

6. Wuod Nyasaye ma malaika ma nigi teko ne olokore nade ma obedo Satan kendo Jachien?

⁶ Ma e gima ne otimore gi Satan kendo Jachien. Nenore ni ne owinjo Nyasaye ka nyiso Adam gi Hawa ni mondo ginyuol nyithindo, kendo gipong’ piny kod nyithindgi. (Chakruok 1:27, 28) Nyaka bed ni Satan ne oparore ni, ‘Adiera dhano duto nyalo bedo joma lama kar lamo Nyasaye! ’ Kuom mano, ne ochako bedo gi gombo marach e chunye. Bang’e ne owuondo Hawa ka owachone miriambo e wi Nyasaye. (Chakruok 3:1-5) Mano ne omiyo obedo “Jachien,” tiende ni “Jaketh Nying.” Bende ne obedo “Satan,” tiende ni, “Jakwede.”

7. (a) Ang’o momiyo Adam gi Hawa ne otho? (b) Ang’o momiyo nyithind Adam duto ti kendo tho?

⁷ Satan kendo Jachien ne otiyo gi wuond kod miriambo mondo omi Adam gi Hawa owe winjo Nyasaye. (Chakruok 2:17; 3:6) Mano ne omiyo githo bang’e, mana kaka Nyasaye ne owacho ni notimre ka ok giwinje. (Chakruok 3:17-19) Nikech timo richo, Adam ne koro obedo ng’at morem, kendo nyithinde duto ne oyudo richo kuome. (Jo-Rumi 5:12) Wanyalo tiyo gi ranyisi mar bao ma itiyogo e loso matofali mondo walergo wachno e yo maber. Ka baono nigi mbala, matofali duto ma iloso e baono biro chalo nade? Matofaligo duto biro bedo gi mbala moro kuomgi. Kamano bende e kaka dhano chalo, waduto wayudo “mbala” moa kuom Adam. Mano e gimomiyo dhano duto ti kendo tho.—Jo-Rumi 3:23.

8, 9. (a) Nenore ni Satan ne okwedo ang’o? (b) Ang’o momiyo Nyasaye ne ok oketho jo ng’anjogo gikanyono?

 ⁸ Kane Satan omiyo Adam gi Hawa otimo richo ni Nyasaye, kuom adier ne otelo e ng’anjo ne Nyasaye. Ne ojaro yo ma Jehova lochogo. Gima Satan ne wacho en ni: ‘Nyasaye en jaloch marach, owacho miriambo, kendo  otuono joge gik mabeyo. Ok ochuno ni dhano nyaka bed e bwo loch Nyasaye. Ginyalo pogo kendgi gima ber kod gima rach. Kendo gibiro bedo gi ngima maber moloyo ka gin e bwo lochna.’ Ang’o ma Nyasaye ne dhi timo nikech akwede ma ne nyiso achayani? Jomoko neno ni Nyasaye dine onego joma ne ong’anjogo. Kata kamano, be mano dine otieko akwede mar Satan? Be mano ne dhi nyiso ni yo ma Nyasaye lochogo e yo makare?

⁹ Nikech Jehova en ng’at ma ng’ado bura e yo makare, ne ok onyal kethogi aketha dichiel gikanyono. Ne ong’ado ni kinde malach ne dwarore mondo otiek akwede mar Satan e yo manenore maber, kendo manyiso ni Jachien en ja miriambo. Kuom mano, Nyasaye ne ong’ado ni mondo owe dhano odagi e bwo loch margi giwegi kuom kinde ka Satan ema tayogi. Gimomiyo Jehova ne otimo mano kod gimomiyo oweyo kinde malach ahinya mondo okal ka podi ok ong’ado buch wechego, ondiki e Sula 11 mar bugni. Kata kamano, gie sani, onego waket wachni e paro: Be Adam gi Hawa ne ni kare e winjo Satan, ng’at ma nyaka nene podi ok ne otimonegi kata gimoro achiel maber? Be ne en gima kare mondo giyie ni Jehova ma ne omiyogi gik moko duto en ja miriambo makwiny? Ang’o ma ne ditimo in?

10. Inyalo riwo Jehova lwedo nade e tieko akwede mar Satan?

¹⁰ En gima ber mondo waket wechegi e paro nikech waduto waromo gi gik machalo kaka magi e ndalogi. Ee, in kod thuolo mar riwo Jehova lwedo e chiwo dwoko ni akwede mar Satan. Inyalo yie mondo Jehova obed Jaloch mari, kendo mondo inyis ni Satan en jamiriambo. (Zaburi 73:28; Ngeche 27:11) Gima lit en ni mana jo manok e kind dhano tara gi tara modak e piny, ema yiero timo kamano. Mani miyo wapenjo ni, Be en adier ni Muma puonjo ni Satan ema locho e wi pinyni?

11, 12. (a) Tem ma ne otemgo Yesu nyiso nade ni Satan e jaloch mar pinyni? (b) Ang’o kendo manyiso ni Satan e jaloch mar pinyni?

¹¹ Yesu ne onge gi kiawa moro amora ni Satan ema locho e wi pinyni. Kinde moko Satan ne onyiso Yesu e yor hono “pinjeruodhi duto mag piny gi duong’gi.” Bang’ timo mano, Satan ne osingo ni Yesu kama: “Gigi duto anamiyi, kipodho ilama.” (Mathayo 4:8, 9; Luka 4:5, 6) Par ane wachni. Be ne inyalo luong mano ni tem, ka Satan ne ok en jaloch e wi pinjeruodhigi? Yesu ne ok otamore ni sirkande duto mag pinyni gin mag Satan. Adier, Yesu dine otamore wachno ka dine bed ni Satan ok ema mi sirkandegi teko.

¹² Onge kiawa ni Jehova e Nyasaye Manyalo duto, Jachwech mar polo gi piny. (Fweny 4:11) Kata kamano, onge ka ma Muma wacho ni Jehova Nyasaye kata Yesu Kristo e joloch pinyni. Mopogore gi mano, Yesu ne owacho ratiro ni Satan e “jaloch pinyni.” (Johana 12:31; 14:30; 16:11) Muma bende luongo Satan kendo Jachien ni “nyasach pinyni.” (2 Jo Korintho 4:3, 4) Johana, jaote ma ne Jakristo ne ondiko e wi jakwedeni kata Satan niya: “Piny duto obedo e teko mar Ng’a Marachno.”—1 Johana 5:19.

13. Ang’o momiyo piny manyien dwarore?

¹³ Kaka higini medo kalo, e kaka piny bende medo bedo ka ma rach moloyo. Piny opong’ gi jolweny makedo, josiasa ma ok wach adier, jotend din mawuondore, kod jo mahundu ma odhil e timbegi. Piny duto ochopo ka maok nyal loki. Muma wacho ni kinde osekayo machiegni ma Nyasaye biro tiekogo piny marachni e kinde lwenyne mar  Har-Magedon. Mani biro yawo thuolo ni piny manyien makare.—Fweny 16:14-16.

14. En ng’ano ma Nyasaye oyiero mondo obed Jaloch e Pinyruodhe, kendo mano ne okor nade?

¹⁴ Jehova Nyasaye ne oyiero Yesu Kristo mondo obed Jaloch mar Pinyruodhe, kata sirkal mare manie polo. Muma ne okoro kama chon ahinya: “Osenyuolnwa nyathi, osemiyowa wuowi; loch nobedi e luete; mi nyinge miluongego ni . . . Ruodh Kuwe. Lochne gi kuwe ok nowe medore ameda.” (Isaiah 9:6, 7) Yesu ne opuonjo jolupne ni olam kama kaluwore gi wach sirkalni: “Pinyruodhi mondo obi, gi midwaro mondo otimre e piny kaka e polo.” (Mathayo 6:10) Mana kaka wabiro neno bang’e e bugni, Pinyruodh Nyasaye biro golo sirkande duto mag pinyni e kinde mokayo machiegini, kendo enokaw kargi giduto. (Daniel 2:44) Bang’ mano, Pinyruodh Nyasaye biro loko piny obed paradis.

¹⁵ Muma miyowa singo kama: ‘To kaka singruok [mar Nyasaye] obet, warito polo manyien, gi piny manyien, ka ma wach makare odakie.’ (2 Petro 3:13; Isaiah 65:17) Seche moko, ka Muma wuoyo kuom “piny,” owuoyo kuom dhano modak e pinyni. (Chakruok 11:1) Kuom mano, “piny manyien” makare, en oganda mar ji ma Nyasaye oyiego.

16. En mich mane maber ahinya ma Nyasaye nomi jogo moyiego, kendo ang’o manyaka watim mondo omi wayude?

¹⁶ Yesu ne osingo ni e piny manyien mabiro, jogo ma Nyasaye oyiego noyud mich mar “ngima mochwere.” (Mariko 10:30) Yie mondo i el Mumbi e Johana 3:16 kod 17:3, mondo isom gima Yesu ne owacho ni nyaka watim e ka wayud ngima ma nyaka chieng’. Koro som ane ei Muma, gweth mag jogo mabiro yudo mich maberno  mowuok kuom Nyasaye e Paradis mar ndalo mabiro e piny ka.

17, 18. Ang’o momiyo wanyalo bedo gi yie ni kuwe biro bedo kuonde duto e piny?

¹⁷ Richo, lwenje, mahundu, kod gero biro rumo. “Ng’a marach obiro onge . . . To jo mamuol ginicham piny.” (Zaburi 37:10, 11) Kuwe biro betie nikech ‘Nyasaye biro miyo lwenje orum nyaka giko piny.’ (Zaburi 46:9; Isaiah 2:4) Bang’e ‘jo matir ginimew kendo kuwe nobedi mang’eny nyaka dwe nobedi ma onge’—mano tiende ni kuwe manyaka chieng’!—Zaburi 72:7.

¹⁸ Jo malamo Jehova nodag gi kuwe ma onge luoro. Jo-Israel ne dak gi kuwe maonge luoro kane giwinjo chike Nyasaye. (Tim Jo-Lawi 25:18, 19) Donge dak e kuwe machalo kamano e Paradis nobed maber ndi!—Isaiah 32:18; Mika 4:4.

19. Wang’eyo nade ni chiemo nobed mang’eny e piny manyien ma Nyasaye biro kelo?

¹⁹ Kech ok nobedie. Jandik zaburi ne owero kama, “Bel nobedi mang’eny e piny e wi gode madongo.” (Zaburi 72:16) Jehova Nyasaye nogwedh jo makare, kendo ‘piny nochiegi.’—Zaburi 67:6.

20. Ang’o momiyo wanyalo bedo gi yie ni piny duto biro bedo paradis?

²⁰ Pinyni duto nobed paradis. Udi kod puothe mabeyo nobedie e piny ma ne oseketh chon gi dhano ma joricho. (Isaiah 65:21-24; Fweny 11:18) Kaka ndalo medo kalo, kuonde moko ma oseloki e piny ibiro yar nyaka piny duto bed ka ma ber, kendo manyago gik moko ahinya mana kaka puodho mar Eden. Kendo Nyasaye ok nowe ma ok ‘oyawo lwete, mondo oyieng’ gik mangima duto kaka gidwaro.’—Zaburi 145:16.

21. Ang’o manyiso ni kuwe nobedie e kind dhano gi le?

²¹ Kuwe nobedie e kind dhano gi le. Le mag bungu kod  mipidho nochiem kanyachiel. Kata mana nyathi matin ok noluor le ma sani kwiny.—Isaiah 11:6-9; 65:25.

22. Ang’o mabiro timore ni tuoche?

²² Tuoche biro rumo. Yesu, kaka jaloch e pinyruoth ma Nyasaye ochungo e polo, biro chango ji e yo malach moloyo kaka ne otimo kane en e piny ka. (Mathayo 9:35; Mariko 1:40-42; Johana 5:5-9) Bang’e, onge japiny ma nowachi ni, “Atuwo.”—Isaiah 33:24; 35:5, 6.

23. Ang’o momiyo chier biro kelo mor e chunywa?

²³ Joma ne wahero mosetho ibiro chiero gi geno mar dak ma ok githo. Jogo duto ma nindo e tho, kendo ma Nyasaye oketo e pache ibiro chiero. Kuom adier, chier dhi bedo “mar jo makare kod jo ma ok kare.”—Tich Joote 24:15; Johana 5:28, 29.

24. Ineno nade wach dak e Paradis ma nobedie e piny ka?

²⁴ Jogo moyiero puonjore wach Jehova Nyasaye, Jachwech Maduong’, biro bedo gi mor ahinya ndalo mabiro! Yesu ne wuoyo e wi Paradis manobed e piny ka kane osingo kama ni jaricho ma ne otho e bute: “Inibed koda e Paradis.” (Luka 23:43) Dwarore ahinya mondo wapuonjre mang’eny e wi Yesu Kristo nikech gwethgi duto nobi kokalo kuome.