Be en gima nyiso rieko yie ni ibiro chier jomotho? Jaote Paulo ne onyiso ni bedo gi yie ma kamano en gima nyiso rieko. Roho maler notelone mondiko wechegi: “Ka genowa kuom Kristo en mana mar ngimani kende, wan e joma onego onenwa lit moloyo ji duto. To koro Kristo osechier oa kuom joma otho, en e nyak mokwongo kuom joma osenindo e tho.” (1 Jo-Korintho 15:19, 20) Paulo ne ni gadier ni ibiro chier jomotho. Ne en gadier ma kamano nikech Yesu ne ochier oa kuom jomotho. * (Tich Joote 17:31) Mano e momiyo Paulo nowacho ni Yesu en “nyak mokwongo,” ma tiende ni en e ng’at ma nokwong mi ngima ma nyaka chieng’ bang’ kosechiere. Ka Yesu e nyak mokwongo, nyaka bed ni nitie jomamoko mibiro chier bende.

Nitie gima chielo ma nyalo konyowa bedo gadier ni ibiro chier ji. Jehovah e Nyasaye ma wacho adiera. Muma wacho ni “Nyasaye . . . ok nyal riambo.” (Tito 1:2) Jehova pok oriamboga, kendo ok anoriamb nyaka chieng’. Be Nyasaye nyalo singo ni obiro chiero ji, kendo nyiso ni onyalo timo kamano kuom chiero jomoko matin e kinde mokalo, kae to bang’e olokore? Mano ok nyal timore ngang’!

Ang’o momiyo Jehova biro chiero ji e kinde ma biro? En nikech herane. Ayub nowacho kama: ‘Ka dhano otho, nobed mangima kendo koso? Diluong nyinga e ka daduoki wach: chunyi doher tich mar lueti.’ (Ayub 14:14, 15) Ayub ne ni gadier ni chuny Wuon-gi me polo ne dhi gombo chiere kotho. Be Nyasaye oselokore? Muma dwoko kama: “An Jehova ok alokora.” (Malaki 3:6)  Nyasaye pod gombo chiero jomotho, kendo neno ka gidak e ngima maber mopong’ gi mor. Mano bende e gima janyuol ma jahera ma nyathine otho digomb neno ka timore ne nyathine. En mana ni Nyasaye e ma nigi teko mar timo kamano.—Zaburi 135:6.

Jehova biro miyo Wuode teko mar chiero jomotho, kendo mano biro miyo osiepegi kod wedegi obed mamor sidang’! To Yesu neno nade wach chiero jomotho? Ka ne pok ochiero Lazaro, Yesu noneno lit ma nyimine Lazaro kod osiepegi ne nigo, mi ‘pi wang’e ne ochuer.’ (Johana 11:35) E kinde moro, Yesu noromo gi chi liel ma ne wuok e taon mar Nain, ma noyudo wuode achiel kende otho. Ka Yesu “noneno dhakono, ne okeche mi nowachone niya: ‘We ywak.’” Kae to nochiero wuodeno. (Luka 7:13) Kuom mano, Yesu bende winjo malit ahinya kuom kuyo ma tho kelo. To mano kaka obiro bedo mamor sama oloko kuyo ma ji nigo obed mor mosiko e piny mangima!

Be iselalo ng’at mihero e tho? E kinde ma mano otimore, inyalo paro ni onge gima nyalo tieko tho. Kata kamano nitie gima nyalo tieke, ma en chier ma Nyasaye biro timo kokalo kuom Wuode. Ng’e ni Nyasaye dwaro mondo ine kaka obiro tieko tho. Odwaro ni ibedie kanyo mondo irwak jogi mosechier. Temie paro ka ibet piny gi osiepeni kata wedeni kuchano gik ma ubiro timo e kinde ma biro kung’eyo ni tho koro onge chuth!

Lionel, ma nosewuo kuome e sula motelo nowacho kama: “Bang’e, ne aduogo afwenyo ni ibiro chier jomotho. Ka ne ahango winjo wach chier, ne atamora yie gi puonjno, kendo ne aparo ni ng’at ma nokelona puonjno ne wuonda. To ne asomo Muma, ma afwenyo ni puonjno en adier! Koro an gi siso mar romo kendo gi kwarwa ma notho.”

Be diher yudo weche momedore e wi wach chier? Joneno mag Jehova nyalo konyi ng’eyo e Mumbi gimomiyo gin gadier ni ibiro chier jomotho. *