Tarik 24 Mei, 2022, masira moro marach notimore e taon mar Uvalde, Texas, e piny Amerka. Ka luwore gi gaset mar The New York Times, “ng’at moro ma ne nigi bunde nonego nyithindo 19 kod jopuonje ariyo . . . e skul moro miluongo Robb Elementary.”

 Gima lit en ni timbe mag mahundu kaka mago tinde ng’eny ahinya. Gaset mar USA Today nowacho ni e piny Amerka kende, “timbe kaka mago notimore nyadi 249 e skunde mopogore opogore e higa mokalo, kendo mano ne en kwan mamalo ahinya ma pok nobetiega e higa moro amora chakre 1970.”

 Ang’o momiyo timbe maricho kaka mago timorega? Ere kaka wanyalo nyagore gi timbe kaka mago? Be nitie geno moro amora ni chieng’ moro timbe mag mahundu norum? Muma chiwo dwoko mag penjogo.

•    Muma luongo kinde ma wadakiegi ni “ndalo mag giko,” kinde ma ji mang’eny ne dhi bedo “jo ma onge hera” kendo “jo mager,” ma timo gik maricho ma bwogo ji. Joma kamago ne dhi “medo bedo maricho moloyo.” (2 Timotheo 3:1-5, 13) Mondo iyud weche momedore, som sula ma wacho ni, “Je, Biblia Ilitabiri Mitazamo na Matendo ya Watu Leo?”

 Ji mang’eny penjorega niya, ‘Ang’o momiyo Nyasaye ok nyal geng’o timbe maricho kaka goyo ji gi bunde e skul mondo kik timre?’ Mondo iyud dwoko ma Muma chiwo e wi penjono, som sula ma wacho ni “Gik Maricho Timore ne Joma Beyo​—Ang’o Momiyo?”

•    “Weche duto ma ne ondik chon, ne ondikgi mondo gipuonjwa, mondo . . . kokalo kuom hoch moa e Ndiko, wabed gi geno.”​—Jo-Rumi 15:4.

 Muma chiwo puonj ma nyalo konyi nyagori gi timbe mag mahundu mopong’o pinyni. Mondo iyud weche momedore, ne Amkeni! ma wiye wacho ni “Je, Jeuri Itawahi Kwisha?”

 Nitie paro mabeyo ma jonyuol nyalo tiyogo sama gikonyo nyithindgi mondo ginyagre gi weche maricho ma giwinjo ka ilando e gige fwambo kaka redio kata TV. Mondo iyud parogo ne sula ma wacho ni “Je, Taarifa za Habari Zenye Kuogopesha Zinawaathiri Watoto Wako?”

•    “Obiro golonegi gik ma diyogi kaachiel gi timbe mahundu.”​—Zaburi 72:14.

•    “Ginithedh ligengnigi obed kwer, kendo tongegi obed pand keyo. Oganda ok noting’ ligangla ne oganda machielo, ok ginichak gipuonjre lweny kendo.”​—Mika 4:3.

 Nyasaye biro timo gima osetamo dhano timo. Pinyruodhe mosechung e polo biro golo gige lweny duto, kendo tieko timbe mag mahundu chuth. Mondo ine gik mamoko ma Pinyruodh Nyasaye biro timo, som sula ma wacho ni “Wakati Huo ‘Amani Itakuwa Nyingi.’”