BAIBUL ese lauma tauna Mikael na se herevalaia momo. To, ia e herevalaia negadiai ia na ḡau ta e karaiava. Baibul bukana Daniel ai, Mikael na aneru dikadia e tuari henidia; Iuda bukana ai, ia na Satana ida e hepapahuahu; bona Apokalupo bukana ai, ia na Diabolo mai ena aneru ida e tuari henidia. Mikael na Iehova ena lohia siahuna dainai Dirava inaina e tuari henidia amo ia ladana anina e hahedinaraia, ia ladana anina na “Daika be Dirava Heḡereḡerena?” To, Mikael be daika?

Taunimanima haida ladadia na rua eiava toi. Heḡereḡere, Iakob ladana ta na Israel, bona aposetolo Petro ladana ta na Simona. (Genese 49:1, 2; Mataio 10:2) Una heḡereḡerena, Baibul ese e hahedinaraiamu Mikael na Iesu Keriso ladana ta, una lada na ia do tanobada sema bona guba e lou lao neganai e ḡaukaralaia. Unu ta hereva tomamu badidia mani Baibul ai aita ita.

Aneru Ikwaradia Tauna. Baibul ese Mikael na e gwauraiamu “aneru ikwaradia.” (Iuda 9) Ina hereva anina na “aneru badana.”  Mani a laloa, Mikael na e gwauraia aneru ikwaradia tauna. Una ese e hahedinaraiamu unu bamona aneruna na tamona mo. Momokani, Baibul ai ina hereva “aneru ikwaradia” na aneru tamona mo e herevalaia, to dia aneru momo. Danu, Iesu na aneru ikwaradia dagina e abia. Tesalonika Ginigunana 4:16 (NWT) ese e toreisi lou tauna Lohiabada Iesu Keriso e herevalaia neganai, e gwa: “Lohiabada na mai lolona ida guba amo baine diho, aneru badana mai gadona ida.” Iesu gadona na e gwauraia aneru badana gadona. Una dainai, una siri ese e hahedinaraiamu, Iesu sibona na aneru badana Mikael.

Tuari Oreana Igunalaina Tauna. Baibul na e gwa, “Mikael mai ena aneru ida ese huala . . . mai ena aneru ida e tuari” henidia. (Apokalupo 12:7) Una dainai, Mikael na kamonai aneru oreadia Igunalaidia Tauna. Apokalupo bukana ese danu Iesu na e gwauraia kamonai aneru oreadia Igunalaidia Tauna. (Apokalupo 19:14-16) Bona aposetolo Paulo na e gwa “Lohiabada Iesu” bona “ena aneru siahudia.” (2 Tesalonika 1:7) Una dainai Baibul ese Mikael mai “ena aneru” bona Iesu mai “ena aneru” e herevalaidia. (Mataio 13:41; 16:27; 24:31; 1 Petro 3:22) Baibul sirina ta ese se hahedinaraia gubai kamonai anerudia edia orea na rua​—ta be Mikael ese e gunalaiava bona ma ta be Iesu ese e gunalaiava​—una dainai baita gwau dibamu Mikael na Iesu Keriso, gubai e ḡaukarava neganai una lada e ḡaukaralaiava. *