BANN chrétien finn gagne l’ordre pou celebré Mémorial la mort Jésus. Sa l’evenement-la appel aussi, “repas [nou] Seigneur.” (1 Corinthiens 11:20) Kifer sa l’evenement-la, li aussi important ki sa? Kan ek couma bizin faire sa?

Jésus Christ ti etabli sa l’evenement special-la en 33 n.l., mem soir ki ti faire Pâque juif. Pâque ti enn fête ki ti faire zis enn fois par an, 14^e jour mois juif Nisan. Pou calcule sa date-la, bann Juif ti bizin attann l’équinoxe printemps. C’est jour kot ena apepré 12 heure-temps li-jour ek 12 heure-temps a-soir. Premier jour mois Nisan ti commencé avek premier nouvelle lune ki ti trouvé dan le ciel apré l’équinoxe. Treize jour plitar, zot ti fête Pâque, apré coucher soleil.

Jésus ti fête Pâque avek so bann zapotre, lerla li ti faire Judas Iscariote allé, ek apré, li ti etabli Repas nou Seigneur. Sa repas-la ti remplace Pâque juif, alors bizin observe sa l’evenement-la zis enn fois par an.

L’Évangile Matthieu dire: “Jésus finn prend enn di-pain, ek apré ki li finn faire enn la-priere pou beni di-pain-la, li finn casse li, ek letan li ti pé donne sa so bann disciple, li finn dire zot: ‘Prend, mangé. Sa, li represente mo lekor.’ Li finn prend aussi enn coupe ek, apré ki li finn faire enn la-priere pou remercié Bondié, li  finn donne zot sa, [ek] li finn dire zot: ‘Boire sa, zot tou, parski sa represente mo “di-sang l’alliance,” ki pou versé pou beaucoup, pou gagne pardon bann peché.’”—Matthieu 26:26-28.

Certain croire ki Jésus ti faire sa di-pain-la vinn so vrai la-chair ek sa di-vin-la vinn so vrai di-sang. Mais lekor Jésus ti encore intact kan li ti offert sa di-pain-la so bann disciple. Eski bann zapotre Jésus ti pé vrai-mem mange so la-chair ek boire so di-sang? Non, si zot ti faire sa, zot ti pou vinn bann cannibale ek zot ti pou desobeir la loi Bondié. (Genèse 9:3, 4; Lévitique 17:10) Dapré Luc 22: 20, Jésus ti dire: “Sa coupe-la represente nouveau l’alliance [ki existé] grace a mo di-sang, ki pou versé pou zot.” Eski sa coupe-la ti vrai-mem vinn “nouveau l’alliance”? Sa ti pou impossible, parski l’alliance li enn l’accord, ou-soit enn contrat, pa enn kitsoz materiel.

Alors, di-pain ek di-vin toulé-deux, zot zis bann symbol. Di-pain represente lekor parfait Jésus. Jésus ti servi enn di-pain ki ti resté apré ki zot ti fini mange repas Pâque. Dan sa di-pain-la pa ti ena okenn levain. (Exode 12:8) La Bible servi levain couma enn symbol peché ou-soit corruption. Alors sa di-pain-la represente lekor parfait ki Jésus ti donne en sacrifice. Sa lekor-la pa ti ena okenn peché.—Matthieu 16:11, 12; 1 Corinthiens 5:6, 7; 1 Pierre 2:22; 1 Jean 2:1, 2.

Di-vin rouge represente di-sang Jésus. Sa di-sang-la donne nouveau l’alliance tou so valeur. Jésus ti dire ki so di-sang ti versé pou gagne “pardon bann peché.” Coumsa bann dimoune kapav vinn pur devant lizié Bondié, ek zot kapav rente dan sa nouveau l’alliance-la avek Jéhovah. (Hébreux 9:14; 10:16, 17) Grace a sa l’alliance, ou-soit contrat-la, 144,000 chrétien fidel kapav al dan le ciel. La-bas zot pou servi en tant ki bann lé-roi ek bann pretre pou ki tou dimoune lor la terre gagne benediction.—Genèse 22:18; Jérémie 31:31-33; 1 Pierre 2:9; Révélation 5:9, 10; 14:1-3.

Kisannla ki bizin prend sa bann l’embleme Mémorial-la? Li logik ki c’est zis bann ki dan nouveau l’alliance—setadir bann ki ena l’esperance pou al vive dan le ciel—ki bizin prend di-pain ek di-vin. L’esprit saint donne zot conviction ki Jéhovah finn choisir  zot couma bann lé-roi ki pou dirigé dan le ciel. (Romains 8:16) Zot aussi dan l’alliance pou enn Royaume avek Jésus.—Luc 22:29.

Ki nou kapav dire pou bann ki ena l’esperance pou vive pou toujours dan Paradi lor la terre? Zot obeir l’ordre Jésus pou assisté Repas nou Seigneur, mais zot zis guetté, zot pa participé. Enn fois par an, apré ki soleil inn al couché le 14 Nisan, bann Témoins de Jéhovah observe Repas nou Seigneur. Mem si pena beaucoup ki dire ki zot ena l’esperance pou al dan le ciel, sa l’evenement-la li important pou tou bann chrétien. Li enn l’occasion kot nou tou, nou kapav reflechi lor l’amour exceptionnel ki Jéhovah ek Jésus Christ finn manifesté.—Jean 3:16.