LARTIK LETID 27
“Met To Lespwar an Zeova”
“Met to lespwar an Zeova; pran kouraz ek ena enn leker for.”—PS. 27:14, NW.
KANTIK 128 Andire Ziska Lafin
REZIME *
1. (a) Ki lesperans Zeova inn donn nou? (b) Ki savedir met nou “lespwar an Zeova”? (Get “Expresion Ki’nn Explike.”)
ZEOVA inn donn tou bann dimounn ki kontan Li enn zoli lesperans. Biento, Li pou fer tristes, maladi, ek lamor disparet net. (Rev. 21:3, 4) Li pou ed bann “bon dimoun” ki ena konfians an Li, pou fer later vinn enn paradi. (Ps. 37:9-11) Ek Li pou fer tou bann dimounn, ki deza ena enn bon lamitie avek Li, vinn pli pros avek Li ankor. Se enn lesperans extraordiner, pa vre! Me kifer nou kapav sir ki bann promes Bondie pou realize? Se parski Zeova touletan tini so bann promes. Alor, nou kapav met nou “lespwar an Zeova.” * (Ps. 27:14, NW) Nou montre ki nou met nou lespwar an Zeova kan nou kontign atann avek pasians ek nou res zwaye ziska ki Zeova realiz so bann promes.—Iza. 55:10, 11.
2. Ki kitsoz Zeova inn fini fer?
2 Zeova inn fini donn bann prev ki Li tini so bann promes. Anou get enn lexanp. Dan liv Revelasion, Zeova ti promet ki dan nou lepok, Li ti pou rasanble bann dimounn ki sorti dan tou nasion, tribi, ek lang, ek ki zot ti pou servi Li dan linite. Sa bann dimounn-la form parti enn group ki apel “gran lafoul.” (Rev. 7:9, 10) Mem si dan sa group-la ena tou kalite zom, fam, ek zanfan, ek ki zot viv lor later antie, zot form enn sel fami kot ena lape ek linite. (Ps. 133:1; Zan 10:16) Sa gran lafoul-la bien aktif dan predikasion bonn nouvel. Zot touletan pre pou partaz zot lesperans ar ninport kisannla ki ekout zot. (Mat. 28:19, 20; Rev. 14:6, 7; 22:17) Si to form parti dan sa gran lafoul-la, sirman to lesperans dan bann promes Zeova ena boukou valer pou twa!
3. Ki kitsoz Satan anvi fer nou krwar?
3 Satan pa anvi ki to ena enn lespwar pou lavenir. Li anvi fer twa krwar ki Zeova pa gagn to traka ek ki Li pa pou tini so bann promes. Si Satan reisi fer nou perdi lespwar, nou pou dekouraze ek nou kapav mem aret servi Zeova. Kouma nou pou trouve dan sa lartik-la, Satan inn esey fer Zob perdi lespwar, ek li’nn esey fer li aret servi Zeova.
4. Ki nou pou examine dan sa lartik-la? (Zob 1:9-12)
4 Dan sa lartik-la, nou pou get bann metod ki Satan inn servi pou esey fer Zob aret servi Zeova. (Lir Zob 1:9-12. *) Nou pou gete osi seki nou kapav aprann ar lexanp Zob, ek kifer nou bizin touletan rapel ki Zeova kontan nou ek ki Li pou realiz so bann promes.
SATAN ESEY FER ZOB PERDI LESPWAR
5-6. Ki ti ariv Zob dan zis enn tigit letan?
5 Zob ti ena enn zoli lavi ek li ti ena enn bon lamitie avek Zeova. Li ti bien ris, li ti ena enn gran fami, ek zot tou ti ere. (Zob 1:1-5) Me dan enn sel zour, Zob ti perdi preske tou seki li ti ena. Pou koumanse, li ti perdi so bann dibien. (Zob 1:13-17) Apre sa, tou so bann zanfan ti mor. Esey mazinn so lapenn! Bann paran bien tris kan enn parmi zot bann zanfan mor. Alor, mazine seki Zob ek so madam ti resanti kan zot ti aprann ki zot dis zanfan ti mor, enn lakaz ti kraz lor zot. Nou konpran kifer Zob ti extra sagrin, li ti desir so linz, ek li ti zet so lekor anba!—Zob 1:18-20.
6 Apre sa, Satan ti fer Zob gagn enn maladi ki bien degoutan ek ki ti fer li bien soufer. (Zob 2:6-8; 7:5) Avan ki tousala arive, Zob ti enn kikenn ki ti bien respekte dan so landrwa. Bann dimounn ti vinn rod konsey avek li. (Zob 31:18) Me asterla, zot ti inior li. So bann frer, so bann kamarad, ek mem so bann serviter ti rezet li!—Zob 19:13, 14, 16.
Boukou Temwin azordi kapav konpran seki Zob ti resanti kan li ti gagn bann leprev (Get paragraf 7) *
7. (a) Pou ki rezon Zob ti panse li ti pe soufer, me ki li pa ti fer? (b) Parey kouma nou trouve lor zimaz, ki leprev bann Kretien kapav gagne azordi?
7 Satan ti anvi fer Zob krwar ki li ti pe soufer parski li ti perdi faver Zeova. Par exanp, Satan ti servi enn divan bien for pou kraz lakaz kot bann zanfan Zob ti pe manze ansam. (Zob 1:18, 19) Li ti osi fer dife sorti depi lesiel pou detrir tou bann troupo Zob ek osi bann serviter ki ti pe okip sa bann troupo-la. (Zob 1:16) Parski divan ek dife ti sorti dan lesiel, Zob ti panse ki se Zeova ki ti avoy sa. Ek akoz sa, Zob ti panse ki li ti fer Zeova ankoler. Me kanmem sa, Zob pa ti abandonn Zeova. Li ti kone ki, pandan plizir lane, Zeova ti donn li boukou bon kitsoz. Alor, li ti dir ar limem ki, si li aksepte bann bon kitsoz ki Bondie donn li, li bizin osi aksepte bann move kitsoz ki Bondie donn li. Li ti dir: “Ki nom Zeova kontign gagn louanz.” (Zob 1:20, 21; 2:10) Mem si Zob ti perdi so bann dibien, so bann zanfan, ek so lasante, li ti res fidel anver Zeova. Me Satan pa ti ankor fini ar li!
8. Ki Satan ti fer apre?
8 Apre sa, Satan ti servi trwa dimounn, ki swadizan ti bann kamarad Zob, pou fer Zob santi ki li pa vo nanye. Sa bann zom-la ti dir ki Zob ti pe soufer parski li ti fer boukou move kitsoz. (Zob 22:5-9) Zot ti osi esey fer li krwar ki, ninport ki kantite bon kitsoz ki li ti fer, so bann zefor pa ti ena valer pou Zeova. (Zob 4:18; 22:2, 3; 25:4) An realite, zot ti esey fer Zob krwar ki Bondie pa kontan li, ki Li pa gagn so traka, ek ki sa pa servi nanye ki Zob servi Li. Zot bann parol ti kapav fer Zob panse ki li pena okenn lespwar.
9. Ki kitsoz ti ed Zob pou res for ek pou ena kouraz?
9 Mazinn sa senn-la. Zob pe asiz dan lasann, ek li pe extra soufer. (Zob 2:8) So bann kamarad pe kontign dir li ki li enn move dimounn, ek ki tou seki li’nn fer pena okenn valer. Sey mazine kouma sa ti difisil pou Zob pou andir so bann leprev! Anplis, so leker ti pe extra fermal parski li ti fek perdi so dis zanfan. Kan sa trwa zom-la ti pe koz avek Zob, o-koumansman Zob pa ti dir nanye. (Zob 2:13–3:1) Kitfwa zot ti panse ki, si Zob ti pe res trankil, se parski li ti pou abandonn Zeova. Me zot ti ena tor! Enn moman, kitfwa Zob inn lev so latet, li’nn get zot dan zot lizie, ek li’nn dir zot: “Ziska mo mor, mo pou kontign res fidel ar Bondie!” (Zob 27:5) Mem si li ti pe soufer sa kantite-la, ki kitsoz ti ed Zob pou res for ek pou ena kouraz? Mem si kitfwa li ti bien dekouraze, zame Zob pa ti perdi lespwar ki Bondie ti pou soulaz li. Li ti kone ki, mem si li mor, Zeova ti pou resisit li.—Zob 14:13-15.
KOUMA NOU KAPAV IMIT ZOB?
10. Ki nou kapav aprann ar Zistwar Zob?
10 Zistwar Zob montre nou ki Satan pa kapav fors nou pou aret servi Zeova, ek ki Zeova konn tou seki pe pase dan nou lavi. Zistwar Zob kapav ansegn nou bann lezot leson bien inportan osi. Anou get sertin leson ki nou kapav aprann ar lexanp Zob.
11. Ki pou arive si nou kontign fer Zeova konfians? (Zak 4:7)
11 Lexanp Zob montre nou ki, si nou kontign fer Zeova konfians, nou pou kapav andir ninport ki leprev ek nou pou kapav reziste kont bann latak Satan. Ki pou arive lerla? Labib dir nou ki Satan pou sove ek li pou al lwin ar nou.—Lir Zak 4:7.
12. Kouma lesperans rezireksion ti donn Zob lafors pou kontign andire?
12 Nou bizin ena enn lafwa for dan lesperans rezireksion. Kouma nou’nn trouve dan lartik avan, si nou per lamor, Satan kapav servi sa laper-la pou fer nou aret servi Zeova. Satan ti pretann ki Zob ti pou fer ninport ki kitsoz, mem aret servi Zeova, pou li sap so lavi. Me Satan ti ena tor. Mem kan Zob ti panse ki li ti pre pou mor, li ti res fidel ar Zeova. Li ti reisi andire parski li ti kone ki Zeova bon, ek li ti ena lespwar ki Zeova ti pou rezoud tou so bann problem. Zob ti kone ki, mem si Zeova pa ti rezoud so bann problem kan li ankor vivan, Zeova ti pou resisit li. Zob ti vremem krwar dan rezireksion. Si nou vremem krwar dan rezireksion, nou pou kontign servi Zeova avek fidelite, mem si bann dimounn menas pou touy ou.
13. Kifer nou bizin reflesi bien lor bann metod ki Satan ti servi ar Zob?
13 Nou bizin reflesi bien lor bann metod ki Satan ti servi ar Zob, parski Satan servi mem metod ar nou azordi. Satan ti dir: “Enn dimounn [pa zis Zob] pou donn tou seki li ena pou sap so lavi.” (Zob 2:4, 5) An realite, Satan ti pe rod dir ki nou pa vremem kontan Zeova ek ki nou pou aret servi Li si nou lavi an danze. Satan ti dir osi ki Bondie pa kontan nou, ek ki Li pa trouv bann zefor ki nou fer pou fer Li plezir. Alor, parski nou konn bann metod Satan, nou pa pou les li anbet nou.
14. Ki kitsoz nou aprann lor noumem kan nou gagn bann leprev? Donn enn lexanp.
14 Kan nou gagn bann leprev, nou bizin trouv sa kouma enn lokazion pou aprann plis lor noumem. Bann leprev ki Zob ti gagne, ti ed li pou konn sertin parmi so bann febles, ek pou fer bann sanzman. Par exanp, li ti aprann ki li ti bizin ena plis limilite. (Zob 42:3) Nou osi, nou kapav aprann plis lor noumem kan nou gagn bann leprev. Enn frer ki apel Nikolay * ti al dan prizon mem si li ti ena bann gro problem lasante. Li dir: “Letan ki mo’nn fer dan prizon, inn ed mwa pou trouve lor ki kalite mo bizin travay.” Kan nou konn nou bann febles, nou kapav fer bann sanzman ki bizin.
15. Kisannla nou bizin ekoute, ek kifer?
15 Se Zeova ki nou bizin ekoute, pa nou bann lennmi. Zob ti ekout bien kan Zeova ti koz avek li. Zeova ti poz Zob bann kestion pou fer li reflesi. Li ti poz li bann kestion kouma: ‘Eski se pa mwa ki finn kree tou sa bann kitsoz-la? Alor, mo bien kone tou seki pe pase dan to lavi. Eski to panse ki mo pa kapav pran twa swin?’ Zob ti reponn avek limilite, ek li ti bien rekonesan anver Zeova pou so bonte. Li ti dir: “Mo zorey finn tann koz lor twa, me asterla mo pe trouv twa avek mo lizie.” (Zob 42:5) Kan Zob ti dir sa bann parol-la, kitfwa li ti ankor pe asiz dan lasann, so lekor ti ranpli ar lagal, ek li ti ankor pe plor lamor so bann zanfan. Mem si Zob ti dan sa sitiasion-la, Zeova ti dir li ki Li ti kontan li ek ki li ti ena So faver.—Zob 42:7, 8.
16. Dapre Izai 49:15, 16, ki nou bizin rapel kan nou gagn bann leprev?
16 Azordi osi, bann dimounn kapav insilte nou ek tret nou koumadir nou pa vo nanye. Zot kapav esey gat nou repitasion, ouswa gat repitasion lorganizasion Zeova, ek “koz manti pou dir tou sort kalite move kitsoz lor” nou. (Mat. 5:11, NW) Me gras-a zistwar Zob, nou aprann ki Zeova ena konfians ki nou pou res fidel anver Li, mem kan nou gagn bann leprev. Zeova kontan nou, ek zame Li pa pou abandonn bann ki met zot lespwar an Li. (Lir Izai 49:15, 16. *) Alor, fode pa nou ekout bann mansonz ki bann lennmi Bondie dir lor nou. James ek so fami res Tirki, ek zot finn pas par boukou leprev. James dir: “Nou’nn realize ki, si nou ekout bann mansonz ki bann dimounn dir lor bann serviter Zeova, sa pou dekouraz nou. Alor, nou ti res konsantre lor nou lesperans ek nou ti res bien aktif dan nou servis pou Zeova. Sa finn ed nou pou gard nou lazwa.” Parey kouma Zob, nou ekout Zeova, ek kan nou fer sa, bann mansonz nou bann lennmi pa kapav detrir nou lesperans!
TO LESPERANS POU ED TWA POU ANDIRE
Zeova ti rekonpans Zob pou so fidelite. Apre sa, li ek so madam ti ena enn zoli lavi (Get paragraf 17) *
17. Ki nou kapav aprann ar lexanp bann fidel serviter Zeova ki mansione dan Ebre sapit 11?
17 Zob, li zis enn parmi bann serviter Zeova ki finn res for ek ki finn ena kouraz pandan bann leprev. Dan so let ki li ti ekrir bann Ebre, lapot Pol koz lor bann lezot serviter Zeova ki ti res fidel malgre bann leprev. Li ti apel zot, “enn lafoul temwin.” (Ebre 12:1) Zot ti gagn bann gran leprev, me toutlong zot lavi, zot ti res fidel ar Zeova. (Ebre 11:36-40) Eski zot zefor ek zot landirans ti dan vid? Non! Mem si zot pa’nn trouv Zeova realiz tou so bann promes, zot ti kontign met zot lespwar an Li. Ek parski zot ti sir ki zot ti gagn faver Zeova, zot ti kone ki zot ti pou trouv so bann promes realize. (Ebre 11:4, 5, NW) Zot lexanp kapav ed nou pou ki nou kontign met nou lespwar an Zeova!
18. Ki kitsoz nou bien deside pou fer? (Ebre 11:6)
18 Azordi, nou pe viv dan enn lemond ki pe vinn deplizanpli pir. (2 Tim. 3:13) Satan pe kontign met bann leprev devan bann serviter Zeova. Me ninport ki leprev ki nou gagne, anou res bien deside pou kontign servi Zeova, parski nou sir “ki nou lesperans baze dan Bondie vivan.” (1 Tim. 4:10) Pa bliye ki, mem si Zob ti gagn bann gran leprev, alafin Zeova “finn montre konpasion ek mizerikord pou li.” (Zak 5:11) Alor, parey kouma Zob, anou res fidel anver Zeova, ek nou kapav sir ki Li pou “rekonpans dimoun ki rod li.”—Lir Ebre 11:6.
KANTIK 150 Rod Zeova pou To Delivrans
^ Kan nou mazinn enn kikenn ki’nn andir plizir leprev, souvan nou mazinn Zob. Ki nou kapav aprann ar lexanp sa zom fidel la? Nou aprann ki Satan pa kapav fors nou pou aret servi Zeova. Nou aprann osi ki Zeova konn tou seki pe pase dan nou lavi. Ek parey kouma Zeova ti fer tou bann leprev Zob disparet, biento Li pou fer tou bann kitsoz ki pe fer nou soufer disparet. Si nou montre par nou bann aksion, ki nou vremem sir ki Zeova pou fer sa, nou parmi bann dimounn ki vremem met zot “lespwar an Zeova.”
^ EXPRESION KI’NN EXPLIKE: Mo Ebre ki servi pou “lespwar” vedir “atann” enn kitsoz avek inpasians. Li vedir osi ena konfians an enn kikenn ouswa kont lor li.—Ps. 25:2, 3; 62:5.
^ Zob 1:9-12: “9 Me Satan ti reponn Zeova: ‘Eski pou nanye ki Zob finn ena lakrint pou Bondie? 10 Eski to pa finn mont enn baraz otour li, otour so lakaz ek otour tou seki li ena, pou protez li? To finn beni tou seki li fer, ek so bann troupo finn ogmante partou dan pei. 11 Me pou sanze, avoy to lame, ek detrir tou seki li ena, ek vremem li pou modi twa dan to figir.’ 12 Alor Zeova dir Satan: ‘Gete! Tou seki li ena, li dan to lame. Me selman, fode pa to avans to lame kont li!’ Lerla, Satan ti sorti devan Zeova ek li ti ale.”
^ Finn sanz sertin nom dan sa lartik-la.
^ Izai 49:15, 16; “15 Eski enn fam kapav bliye so tibaba ki ankor pe bwar avek li, ek pena pitie pou garson ki sorti dan so vant? Sa bann fam-la kapav bliye, me mwa mo pa pou bliye twa. 16 Gete! Mo’nn ekrir to nom dan pla mo lame. To bann miray touletan devan mwa.”
