Nou kapav santi nou initil kan enn kamarad pe soufer akoz enn problem lasante mantal. Me nou kapav montre nou kamarad ki kantite nou kontan li kan nou ed li pou fer fas ar so problem lasante mantal. Kouma?

“Bizin rapid pou ekoute.”​—ZAK 1:19.

Enn bann meyer fason pou ed ou kamarad se kan ou ekout li kan li anvi koze. Li pa neseser ki ou fer enn komanter lor tou seki li pe dir. Montre li ki ou pe ekout li ek ki ou gagn so traka. Esey konpran seki li pe resanti ek pa ziz li. Rapel ki li kapav dir bann kitsoz ki li pa vremem panse ek ki li kapav regrete apre.​—Zob 6:2, 3.

‘Koz dan enn fason ki pou konsole.’​—1 TESALONISIEN 5:14.

Ou kamarad kitfwa angwase ouswa santi li initil. Kan ou rasir li ki ou vremem gagn so traka, sa kapav rekonfort li ek ankouraz li, mem si ou pa tro kone ki pou dir li exakteman.

“Enn vre kamarad montre so lamour touletan.”​—PROVERB 17:17.

Ed li dan enn fason pratik. Olie ki ou esey devine ki kitsoz pou ed li, demann li ki ou kapav fer. Si li difisil pou ou kamarad pou explike ki li bizin, esey sigzer enn kitsoz pratik ki zot kapav fer ansam, kouma par exanp, al fer enn ti lamars. Ouswa ou kapav propoze pou  ed li fer so bann komision, pou netwaye ouswa bann lezot ti travay.​—Galat 6:2.

“Ena pasians.”​—1 TESALONISIEN 5:14.

Kitfwa ou kamarad pa touletan anvi koze. Rasir ou kamarad ki ou pou ekout li kan li santi li pre pou koze. Akoz so maladi, ou kamarad kapav dir ouswa fer bann kitsoz ki pou bles ou. Li kapav kennsel bann program ki li ti ena avek ou ouswa li kapav vinn move. Ena pasians ek konpran li kan ou donn li led ki li bizin.​—Proverb 18:24.

“Mo fer sir ki mo enn kamarad lor ki li kapav konte. Mem si mo pena solision pou tou so bann problem, mo esey touletan ekout li. Ena fwa li zis bizin enn kikenn pou ekout li ek sa fer li santi li pli bien.”​—Farrah, a ki ena enn kamarad ki ena problem langwas, depresion ek problem alimanter.

“Enn mo bann kamarad bien zanti ek ankourazan. Li ti invit mwa kot li pou enn bon repa. Li ti telman zanti ki sa ti fasil pou mwa pou dir seki mo ti pe resanti. Sa ti vremem ankouraz mwa!”​—Ha-eun, ki ena depresion.

“Pasians extra inportan. Kan mo madam fer enn kitsoz ki agas mwa, mo esey rapel ki se so maladi ki fer li azir koumsa. Sa ed mwa pou pa ankoler ek pou montre plis konsiderasion anver li.”​—Jacob, ki so madam ena depresion.

“Mo madam ti extra soutenir mwa ek rekonfort mwa. Kan mo sibmerze ar langwas, zame li fors mwa pou fer bann kitsoz ki mo pa anvi fer. Ek akoz sa, ena fwa li pa gagn pou fer bann kitsoz ki li ti pou kontan fer. Lespri sakrifis mo madam ek so zenerozite ena enn gran valer pou mwa.”​—Enrico, ki ena enn problem langwas.