Labib dir nou dan enn fason bien kler ki Jéhovah ek so Garson, Jésus Christ pou fer an sort ki Satan Lediab aret fer bann dimounn soufer. Labib dir: “Se pou sa rezon-la ki Garson Bondie [Jésus] finn vini dan enn fason vizib, pou detrir bann travay ki Lediab finn fer.” (1 Jean 3:8) Sa lemond kot dimounn touletan pe rod ankor plis, kot ena laenn ek move kitsoz la, pou disparet. An seki konsern “sef sa lemond-la”​—Satan Lediab​—Jésus inn promet ki li pou ‘zet li deor.’ (Jean 12:31) Lerla pou ena enn lemond nouvo, kot pa pou ena linflians Satan, ek later pou vinn enn landrwa kot pou ena lape.​—2 Pierre 3:13.

Me ki pou ariv bann ki teti, bann ki pa’le sanz zot fason azir ek ki persiste pou fer seki pa bon? Dan enn fason bien direk, Labib dir: “Zis bann dimounn drwat pou res lor later, ek bann dimounn ki pa kapav repros zot nanye ki pou res lor la. Me bann move dimounn zot, pou tir zot lor sa later-la; ek bann tret zot, pou ras zot lor la.” (Proverbes 2:21, 22) Fini linflians bann move dimounn! Tigit-tigit, dan sa bann kondision kot ena lape la, bann dimounn obeisan pou libere ar linperfeksion ki zot inn erite.​—Romains 6:17, 18; 8:21.

Me, kouma Bondie pou tir lemal dan sa nouvo lemond-la? Se pa kan li anlev nou liberte pou swazir ek fer nou vinn kouma bann robo. Okontrer, Li pou ansegn bann dimounn obeisan so bann prinsip, ek Li pou ed zot pou abandonn zot bann move panse ek zot bann move aksion.

Ki nou kapav dir konsernan bann katastrof ek bann aksidan ki nou pa atann? Li’nn promet ki biento se so Rwayom, ouswa so gouvernman ki pou pran kontrol later. Lerwa ki Li’nn etabli, setadir Jésus Christ, ena pouvwar pou geri bann malad. (Matthieu 14:14) Jésus ena osi pouvwar pou kontrol bann lafors lanatir. (Marc 4:35-41) Lerla, nou pou nepli soufer akoz “bann moman ek bann levennman ki nou pa atann.” (Ecclésiaste 9:11) Kan Christ pou regne, personn pa pou konn okenn maler.​—Proverbes 1:33.

Ki pou ariv sa bann milyon inosan ki’nn konn enn lamor trazik la? Enn tipe avan ki li relev so kamarad Lazare, Jésus ti dir: “Momem rezireksion ek lavi.” (Jean 11:25) Jésus ena pouvwar pou resisit, ouswa redonn lavi bann ki’nn mor!

Eski ou ti pou kontan viv dan enn lemond kot bann bon dimounn pou nepli soufer? Si wi, alor kifer ou pa fixe lobzektif pou etidie Labib, koumsa ou pou kapav aprann plis lor sa vre Bondie-la ek lor so proze pou bann dimounn? Bann Temwin Jéhovah dan ou landrwa pou bien kontan pou ed ou. Nou invit ou pou pran kontak avek zot ouswa pou ekrir bann ki’nn pibliye sa magazinn-la.