Bann sat domestik bien kontan netway zotmem. Kan li pa pe dormi, enn sat kapav pas enn kar so letan pou netway limem. Zot kapav netway zotmem extra bien parski zot lalang finn fer dan enn fason extraordiner.

 Reflesi lor la: Ena 290 ti korn ki koumadir bann dive lor lalang enn sat. Sa bann korn-la zot vers par deryer ek zot solid parey kouma bann zong. Kan sat-la ramas so lalang, bann kanal ki ena dan sak korn ranpli ar lakras. Kan sat-la pas so lalang lor so lekor, bann korn-la rant dan so bann pwal ek larg lakras lor so lapo.

 Sak zour, enn sat kapav transfer ziska 48 mililit lakras lor so lapo ek so bann pwal. Dan so lakras ena bann anzim ki kapav touy bann mikrob. Anplis, kan so lakras evapore sa permet lekor sat-la pou refrwadi. Ek sa bien inportan parski enn sat pa transpir boukou.

 Kan enn korn may dan enn ne, li fons plis dan pwal sat-la ek lerla, li gagn lafors ki bizin pou larg ne-la. So bann pwint kapav osi amelior sirkilasion disan dan lapo sat-la ek gard li an bonn sante. Bann siantis inn etidie lalang enn sat pou invant enn bros seve. Kan nou servi sa bros seve-la, nou pa bizin servi boukou lafors pou pengn nou seve ek li pli fasil pou netwaye. Anplis, avek sa bros-la li bien fasil pou demel seve. Bann siantis panse ki bann lezot resers lor lalang enn sat pou ed zot pou invant bann kitsoz pou netway pli bien bann sirfas kouma moket. Sa pou ed zot osi pou amelior fason ki met bann medsinn ouswa lezot kitsoz lor enn lapo kot ena bann pwal ouswa seve.

 Ki ou panse? Kan ou get lalang enn sat, ki ou pou dir? Li’nn aparet par limem ouswa eski inn kree sa?