MPANTTA 6
Atthu Ookhwa Anweherera Isiyani?
1. Ihaparini comaana cirivo caatthu ookhwa?
Waaphiyalyaawe Yesu Ubetaniya, waattamenle Ujerusalem, yahovira mahuku macese nakhwaleene mpatthanyaawe eehaniya Lazaru. Yesu ahorwaa wamahiyeniwawe wamoca ni Marta ni Mariya, asirokorawe Lazaru. Woohipica atthu enci yahotakaneela vaava. Unaakhitiri woona utteeliya venci wa Marta ni Mariya ukathi Yesu wanhokolosenryaawe Lazaru ukhala nkumi?—Unsome Joau 11:21-24, 38-44.
Marta aanaacuwela ihapari comaana caatthu ookhwa. Ula aanaacuwela wiira Yehova naarwaa wummweleliha atthu ookhwa wiira yakhale-tho watuniyani.—Unsome Jó 14:14, 15.
2. Inwira isiyani atthu ookhwa?
Nluku ahomwirela Atamu: “Weeva untthupi ni wa ntthupini phinhalaa uhokoleela.”—UPHATTUWACA 3:19.
Apinaatamu apankiye ni ntthupi notthaya. (Uphattuwaca 2:7; 3:19) Hiivano khanihimwena minepa cinkhala nrutthuni wo inama. Nirinaa irutthu yowoonnyaa, phimaana khiivo itthu yomwiirutthuni wihu inkhala ikumi nakhwaka. Nakhwakavale, ukookweehu ciicammo unaakhwa, moopuwelweehu ni uthunkwiihu unaamala. Phimaana, Lazaru khaahimyaale itthu immwirannyaa ntthu ookhwa kontha atthu ookhwa khaneecuwela.—Usome Isaalimu 146:4; Eklesyaste 9:5, 6, 10.
Niireke Nluku nawaatulumu atthu ni mooro yakhwaka? Ibiiblya inhimya wiira atthu ookhwa khaneecuwela, coo unawoonannyaa wiira imootthoni ikhanlee mwaha wowoothiya ni unonnyoholaca awula unrumpula Nluku. Waatulumu atthu ni mooro ikhanlee itthu inonrusa Nluku.—Unsome Jeremiya 7:31.
3. Atthu ookhwa anawoorya wuuluma ni hiiva?
Atthu ookhwa khanooluma ni khaneewa. (Isaalimu 115:17) Masi ahavo malaikha oohiloka anoorya wuulumaca naatthu, yithencaka ukhala atthu akhwale. (2 Peturu 2:4) Yehova naakhottiha umananiha wuulumana atthu ookhwa.—Unsome Deuteronomiyu 18:10, 11.
4. Tipani norwaa uhokoleela ukhala nkumi?
Atthu imiliyawucene akhwale anaarwa uhokoleela ukhala watuniyani. Mpaka ale yahancuwenle Nluku ni yaapanka citthu coonanara anaarwaa wummwelelihiya.—Unsome Luka 23:43; Miteko 24:15.
Ale anhala wummwelelihiya anaarwaa wiitthuca ikhweeli ca Nluku ni anaahala woonihera umwaamini Yesu yantthunelaka. (Apokalipise 20:11-13) Anhala uhokoleela ukhala akumi ni anrwaa upanka citthu comaana anaahala ulawa ukumi woohimala watuniyani.—Usome Joau 5:28, 29.
5. Wummwelela waatthu unnitthuciha isiyani ya Yehova?
Nluku hothoonyihera ukhitirya ukhala nweherero naatthu ookhwa unveleelihawawe mwanawe wiira akhwe nipuro nihu. Coo, wummwelela waatthu unnitthuciha nifento ni iparakha yoonironya inivahalyaawe Yehova. Wanhalaaya wummwelelihiya atthu akhwale, oocivelesa cinene unkumanana tipani?—Unsome Joau 3:16; Arooma 6:23.
