Ndakai Mauteeko aingi umu nsi yalesya antu ukulapalamana nupya yasikuzumilizya antu aingi kulalongana pamwi. Ya Nte Yakwe Yeova yakalondesya ukuvwila ya kateeka lelo yakalonda nu kutwalilila ukulongana pamwi. Pakuti yakwanisye ukucita vivyo, yakulongana ukuomvya inzila izya pa intaneti wakwe Zoom.

 Pakuti twakwata ukulongana lyonsi, Iumba Ilikatungulula lyazumilizye ukuti yaomvye imisangulo pakuti yakalile ivilongano ma akaunti ya pa Zoom. Cii cazwilizya sana ivilongano ivitanga vikwanisye ukulipila uku ma akaunti ya pa intaneti yano yakalipilisya impiya kutandika ku madola 15 kufika ku madola 20 nanti kucilapo. Ivilongano vii vyaomvyanga ma apu yano yasilipilisya aakazumilizya sile antu yanono kulonganila pamwi nupya asi acingililwe sana. Lelo ndakai ivilongano ivikaomvya ma akaunti ya pa Zoom yano iuvi lyalipila vikaipakizya ukulongana umu nzila icingililwe na antu aingi yakalongana ukuomvya ma akaunti yaa. Ivilongano ukucila pali 65,000 umu mpanga ukucila 170 vikuomvya ma akaunti yayo.

 Icilongano icakuti Kairagi, ica ku Manado, ku North Sulawesi, mu Indonesia, catile ukuomvya ma apu akulonganilapo aula ukulipila nu kutandika ukuomvya akaunti ya pa Zoom ino iuvi lyalipila. Umwina Hadi Santoso walondolwile ukuti: “Na ina kwene na yankazi atamanya ukuomvya utuombelo twa malaiti yakuipakizya sana ukulongana pa mulandu wakuti kusikuputukaputuka.”

 Eluda uwi zina lyakuti Lester Jijón, Jr., uwa mucilongano cakuti Guayacanes Oeste uku Guayaquil, mu Ecuador watile: “Pa mulandu wakuti aina na yankazi yatakwata sana impiya, ngacatalile sana ivilongano vimwi ukulipila uku ma akaunti ya pa Zoom pakuti amu cilongano yonsi yangazanwa uku kulongana. Tukataizya sana iuvi litu pano twakwata akaunti ya pa Zoom ikazumilizya antu aingi ukuzanwa ukukulongana. Fwandi tukaamako na yauze ukwizalonganila pamwi naswe ukwaula ukusakamala icili consi.”

 Eluda uwi zina lyakuti Johnson Mwanza, uwa mucilongano cakuti Ngwerere North ku Lusaka, mu Zambia, walemvile ukuti: “Aina na yankazi aingi yakalanda ukuti ukuomvya akaunti ya pa Zoom ino iuvi lyalipila, kusikutulenga sile ukuyuvwa ukuti twalemana na ina na yankazi lelo kukutulenga ukuyuvwa nu kuti twatemwikwa nupya tukasakamwalwa na Yeova.’”

 Ma akaunti yaa yakazilwe ukuomvya impiya izyali izyakuomvya uku kwazwa aatiyaponelwa na mazanzo. Impiya zizyo zikafuma pa misangulo yakuitemelwa iya mulimo wa mu nsi yonsi. Imisangulo ingi ikasangulwa ukuomvya donate.dan124.com. Tukutaizya pali vino mukaitemelwa ukusangulako imisangulo ikaomviwa nu ku milimo yuze yakwazwilizya aina na yankazi.—2 Kolinto 8:14.