Rosie walanzile ukuti, “Natwalilile ukusakamikwa sana pa vintu ukucila umu cipimo icaloleka kwati nakweti intazi sana fwandi foo.” A malembelo ci amwazwilizye? Ilembelo lyonga a Mateo 6:34 apakati: “Caleka mutasakamala pa vintu vya mutondo, pano uwa mutondo wene ulaisakamala uwisikulu. Amanda yasyacela mumwi.” Rosie walanzile ukuti amazwi yaa yano Yesu walanzile yamwazwilizye ukuta ukusakamikwa pali vino vingacitika mutondo. Walanzile nu kuti, “Natandike ukwika mano pa ntazi zino nakweti, ukwaula ukwikapo masakamika na yauze pa vintu ivitatala vyacitika nupya limwi ivitanga vicitike nu kucitika.”

Yasmine nawe watandike ukulola ukuti amasakamika yatandike ukumucimvya. Walanzile ukuti, “Amanda yamwi nalilanga sana, nupya nafilwanga nu kukasula usiku. Nayuvwile kwati ukwelenganya pa ntazi kwatandike ukundya umupuma.” A malembelo ci aamwazwilizye? Walozizye kuli 1 Petulo 5:7 apakati: “Ikini masakamiko inu pali Leza, pano wene akamusakamala.” Yasmine watile, “Umu kuya kwa nsita, natwalilile ukupepa kuli Yeova, nupya waswike mapepo yane. Nuvwile kwati wantuula icisendo icinyome. Limwi limwi nkatandika ukwelenganya pa ntazi, nomba lyene namanya ivyakucita ndi caya vivyo.”

Umukazyana umwi uwizina lyakuti Isabella walanzile ati: “Nkwelenganya ukuti ukulezyoka ukwa mu wazi pano ya tata nayo kwene yakalezyoka. Nkalalikizya imilimo ala pasi na cino nkucita, nkaikala sile ala nkupuuza nanti ukutamba TV. Kucita vii caipa pano cikalenga umuntu ukutonta sana nu kumulenga ukukana omba ningo imilimo.” Icisinte icamwazwilizye caya pali 2 Timoti 2:15, apakati: “Cita cino ungacita kufikapo pakuti uvwangilwe visuma pa manso yakwe Leza, wa muomvi wino asi na nsonyi pa mulimo wakwe.” Isabella walanzile ukuti, “Ntalondanga Yeova ukuvwa insonyi pa milimo yane pa mulandu nu kulezyoka.” Watandike ukuomba ningo sana.

Kelsey nawe walanzile ati: “Ndi nakwata imilimo ino ndinzile ukuombelapo zuwa zuwa, nalezyokanga iniza mbomba ala kwasyala kasita kanono. Calenganga nalila, ukufilwa ukukasula, nu kusakamikwa sana. Citazipanga.” Ilembelo lya Mapinda 13:16 lyazwile Kelsey ilikati: “Uwamano akacita vyonsi umu kucenjela, lelo iciwelewele cikalangizya uwelewele wakweco apaswe.” Watile ukwelenganya pi lembelo lii kwamwavwile sana walanzile ukuti: “Cikazipa ukulola vino ungaomba nu kutantikila limwi. Nakwata kabuku kakulembamo vino mfwile ukuombelapo, na ci cikangazwa ukukanalalikizya imilimo.”

Ya Kirsten yalanzile ukuti: “Ya wane yantiile, iyansya na ana 4 anono.” I cisinte ci ica mu malembelo icayazwilizye? Aa Mapinda 17:17 apakati: “Cuza, umukundwe insita ili yonsi. Uwina nao uwacani fwandi ndi cakuti asi wakuculila pamwi?” Ya Kirsten yazanyile uwazwilizyo umu cilongano kuli ya kapepa yauze yakwe Yeova. Cali uli? Yalanzile ukuti: “Anji yangazwilizye umu nzila izipusane pusane! Yamwi yansilanga na maluwa pa mulyango. Pa miku itatu, iumba lya yantu lyangazwilizye pamwi na ana yane uku kuukila uku ng’anda yuze. Umuntu wenga wangazwilizye ukuzana incito. Anji yangazwanga lyonsi.”

Ya Delphine atiyalumbulwa mpiti, nayo yacuzile sana pa mulandu nu kuzukilwa. Yalanzile ukuti: “Ndi nalola antu yauze iikala pamwi ni ndupwa zyao nailolanga ukuya nenga nupya nazukilwanga.” Ilembelo lyonga lino lyayazwilizye a Masamu 68:6 apakati: Leza “akalanga umwenyi apakwikala.” Yalondolwile ukuti: “Namanyile ukuti icikomo cii citalozyanga sile uku ng’anda iyakuulwa ndakai. Lelo, nizile iniluka ukuti Leza akatupeela ing’anda ya unkolanya, icifulo icacingililwa umwaya antu atemwa Yeova angatwazwa. Nomba namanyile ukuti ntanga nje apiipi na antu yaayo suka ndi natandikilapo ukupalama kuli Yeova. Fwandi ilembelo lyakwe Masamu 37:4 lyangazwilizye ukucita vivyo, pakati: ‘Walonda ukuzangila muli Yeova, nga nawe alakupeela ivikalonda umwenzo wako.’”

Yasondwelile ukuti: “Nilwike ukuti nalondekwanga ukuya apiipi sana na Yeova. Wazipisya ukucila yonsi. Lyene nalemvile vimwi vino ningaombela pamwi na yauze, pakuti ningandana icuza na antu atemwa Yeova. Nasambilile ukulola ivisuma muli yauze nu kukana sumba mano kuli vino yaluvyanyanga.

Ukuya kwene, ya cuza itu akaombela Leza yatamalilika. Ya Nte Yakwe Yeova nayo yakacula uku ntazi wakwe vino caya uku yantu yonsi. Lelo vino yakasambilila muli Baibo vikayacincizya ukwazwa antu yauze lyonsi sile lino yangakwanisya ukucita vivyo. Ukuya cuza uku yantu ya kwayamo sana mano. Nomba, uzye ivisinte ivyaya muli Baibo vingatwazwa na pa ntazi izitanga zisile ndakai, wakwe ukulwalilila nu kufwilwa?