KATAK 8
Etke Anij Ej Kõtl̦o̦k An Wõr Nana im Eñtaan?
1. Ekõjkan an kar nana ijjino?
Anij ear kõtl̦o̦k bwe armej ro ren make irooj im tõl er kõnke en kaalikkar bwe armej rejjab maroñ kõm̦adm̦õdi apañ ko aer make
Ear jino wal̦o̦k nana ilo lal̦ in ke Setan ear kwal̦o̦k riab eo m̦oktata. Ilo jinoin, Setan ear juon enjel̦ em̦m̦an bõtab ear “jab jutak ilo m̦ool.” (Jon 8:44) Jidik kõn jidik ear kõn̦aan bwe armej ro ren kabuñ ñan e ilo wãween eo me ej tõllo̦kũn wõt Anij. Setan ear m̦on̦e kõrã eo m̦oktata etan Iv im ear kareel Iv bwe en pokake e im jab Anij. Adam ear kobal̦o̦k ippãn Iv im erro ar jab pokake Anij. Jokãlõt in an Adam ear kõm̦m̦an bwe armej ro ren eñtaan im mej.—Riit Jenesis 3:1-6, 19.
Setan ear jum̦ae jim̦we im maroñ eo an Anij ke ear kareel Iv bwe en jab pokake Anij. Jãn kar iien in, enañin aolep armej ro rar kobal̦o̦k ippãn Setan im jum̦aeik Anij. Rejjab kõn̦aan bwe Anij en tõl er. Eñin unin Setan ej “irooj in lal̦ in.”—Riit Jon 14:30; 1 Jon 5:19, UBS.
2. Ewõr ke likjab ilo menin kõm̦anm̦an ko an Anij?
Aolep menin kõm̦anm̦an ko an Anij rar weeppãn. Ke Anij ear kõm̦anm̦an armej ro im enjel̦ ro, er aolep remaroñ kar pokake Anij ilo ejjel̦o̦k likjab. (Duteronomi 32:4, 5) Anij ear kõm̦anm̦an kõj im letok ñan kõj maroñ eo bwe jen kããlõt ta ko jekõn̦aan kõm̦m̦ani. Mel̦el̦ein men in bwe ewõr ippãd maroñ eo ñan kããlõt el̦aññe jekõn̦aan kõm̦m̦ani men ko rem̦m̦an ak men ko renana. Jo kããlõt ko ad make renaaj lukkuun kaalikkar el̦aññe em̦ool ad yokwe Anij.—Riit Jemes 1:13-15, UBS; 1 Jon 5:3.
3. Etke Anij ej kõtl̦o̦k wõt bwe armej ro ren eñtaan?
Jãn kar tõre eo ilo Iden, Anij ear kõtl̦o̦k bwe ri jum̦ae ro ren wõnm̦aanl̦o̦k wõt im jum̦aeik wãween an tõl. Etke? Kõnke en alikkar bwe armej ro rejjab maroñ lo tõprak el̦aññe Anij ejjab tõl er. (Ekklisiastis 7:29, UBS; 8:9) El̦ak de 6,000 iiõ in an armej ro irooj iooer make. Ejjel̦o̦k juon ri tõl ear maroñ jol̦o̦k tarin̦ae, kowadoñ, nañinmej im jerbal ko renana.—Riit Jeremaia 10:23, UBS; Exodus 9:16, UBS.
Wãween an Anij tõl eoktak jãn armej ro. Ewi wãween? Aolep armej ro me rej mour ium̦win tõl eo an Anij rej lo m̦õn̦õn̦õ im jeraam̦m̦an ilo mour ko aer. (Aiseia 48:17, 18) M̦õttan jidik Jeova enaaj jol̦o̦k aolep kien ko an armej. Armej ro wõt me rej kããlõt Anij bwe en tõl er renaaj jokwe ioon lal̦ in.—Aiseia 11:9; Riit Daniel 2:44.
4. Ta ko jemaroñ kõm̦m̦ani kõn an Anij meanwõd?
Ekkar ñan Setan, ejjel̦o̦k juon armej ej karejar ñan Jeova kõn juon bõro em̦ool. Kokõn̦aan ke kwal̦o̦k bwe naan kein an Setan reriab? Ewõr am̦ maroñ ñan kõm̦m̦ane men in! Kõn an Anij meanwõd, ej letok iien bwe jen make kããlõt wõn eo jekõn̦aan bwe en tõl kõj, Anij ke ak armej. Men ko jej kõm̦m̦ani ilo mour ko ad rej kaalikkar wõn eo em̦õj ad kããlõte bwe en tõl kõj.—Riit Job 1:8-12, UBS; Jabõn Kõnnaan 27:11.
5. Ta ko jen kõm̦m̦ani ñan kaalikkar bwe Anij ej tõl kõj?
Men ko jej kõm̦m̦ani ilo mour ko ad rej kaalikkar el̦aññe jekõn̦aan bwe Anij en tõl kõj
El̦aññe jej kabuñ ñan Anij ilo wãween ko me ej kaalikkartok ilo Baibõl̦ eo, jej kwal̦o̦k ad kããlõt bwe Anij ej tõl kõj. (Jon 4:23) El̦aññe jejjab bõk kun̦aad ilo m̦akũtkũt ko an kien im tarin̦ae ko ãinwõt kar Jesus, eokwe jej kwal̦o̦k bwe Setan ejjab ri tõl eo ad.—Riit Jon 17:14.
Setan ej kõjerbal kajoor eo an ñan kõm̦m̦an bwe armej ro ren l̦õmn̦ak bwe ejjab nana ñan kõm̦m̦ani men ko renana im rettoon. El̦aññe jejjab bõk kun̦aad ilo men kein, ro m̦õttad im ro nukũd remaroñ kajjirere ak jum̦ae kõj. (1 Piter 4:3, 4, UBS) Kõn men in, jej aikuj kããlõt ta eo jen kõm̦m̦ane. Jenaaj ke kobal̦o̦k ippãn ro rej yokwe Anij? Jenaaj ke pokake aolep kien ko an Anij me rej kaalikkar bwe emãlõtlõt im ej yokwe kõj? El̦aññe jej kõm̦m̦ani men kein, jej kaalikkar bwe Setan ear riab ke ear ba bwe ejjel̦o̦k juon enaaj pokake Anij ñe ej iiooni apañ ko.—Riit 1 Korint 6:9, 10; 15:33.
Anij ej yokwe armej ro. Eñin unin jejel̦ã bwe enaaj jol̦o̦k nana im eñtaan. Ro me rej kwal̦o̦k aer tõmak bwe Anij enaaj kõm̦m̦ane men kein renaaj mour ñan indeeo ioon lal̦ in.—Riit Jon 3:16.
