Anij ear ba ñan Adam: “Ilo raan eo kwõj m̦õñã jãne [wõjke eo], kwõnaaj mej otem mej.” (Jenesis 2:17) Enaaj kar ejjel̦o̦k unin kien in ñe Adam en kar baj rũttol̦o̦k wõt im mej. Adam ear jel̦ã bwe el̦aññe ejjab m̦õñã jãn leen wõjke eo innem eban mej.

Ear jab menin aikuj ñan an Adam im Iv m̦õñã jãn wõjke eo kõnke ear lukkuun lõñ kain wõjke ko me rej kalle ilo jikin kallib eo. (Jenesis 2:9) Ilo aerro jab m̦õñã jãn wõjke eo, rippãlele rein renaaj kar kwal̦o̦k aerro pokake Eo ear lel̦o̦k mour ñan erro. Men in enaaj kar bar kwal̦o̦k aerro kile jim̦we im maroñ eo an Anij ñan tõl erro.

Ñan mel̦el̦e etke Adam im Iv rar mej, jej aikuj in etale men ko Setan im Iv rar kõnono ippãn doon kaki. Men kein erro ar kõnono kaki rej bar jelõt kõj aolep. Setan Tepil̦ eo ear kõjerbale juon jedpãnit ñan kwal̦o̦k juon men eriab. Bwebwenato in ilo Baibõl̦ ej ba: “Kiiõ jedpãnit ear jel̦ã m̦on̦ el̦ap jãn aolepen kidu awiia, ko Jeova Anij ear kõm̦anm̦ani. Im ej ba ñan kõrã eo, ‘Em̦ool ke Anij ear ba, Kom̦win jab m̦õñã jãn wõjke otemjej ilo jikin kallib eo?’”​—Jenesis 3:1.

Iv ear uwaake im ba: “Kõm maroñ in m̦õñã jãn leen wõjke ko ilo jikin kallib eo, a jãn leen wõjke eo eol̦apãn jikin kallib eo, Anij ear ba, ‘Kom̦win jab m̦õñã im jab uñũri, bwe kom̦ naaj mej.’” Innem jedpãnit eo ear ba ñane: “Kom̦ jãmin mej otem mej. A Anij ejel̦ã, bwe ilo raan eo kom̦ij m̦õñã jãne, innem mejãmiro renaaj pel̦l̦o̦k, im kom̦ naaj ãinwõt anij ran̦ kõn ami jel̦ã em̦m̦an im nana.” Ilo wãween in, Setan ear ba bwe Jeova ej juon ri-riab im ewõr juon men em̦m̦an ej dãpiji jãn Adam im Iv.​—Jenesis 3:2-5.

Iv ear tõmak men ko ear roñ. Ear kalimjek wõjke eo, im ear lo bwe elukkuun em̦m̦an im ear kõn̦aan m̦õñã jãne! Kõn men in ear kepaakl̦o̦k wõjke eo, bõk jãn leen, im jino an m̦õñã. Innem Baibõl̦ ej ba: “Im ear bareinwõt lel̦o̦k ñan l̦eo pãleen . . . , im ear m̦õñã.”​—Jenesis 3:6.

Joñan in el̦ap an kar Anij bũrom̦õj ke ear loe an ro nejin rejitõnbõro kããlõt ñan jab pokake e! Innem ta eo ear kõm̦m̦ane? Ñan Adam, Jeova ear ba: “Kwõnaaj . . . jepl̦aak ñan bwidej, bwe ar bõk eok jãne; bwe bwidej kwe, im ñan bwidej kwõnaaj jepl̦aak.” (Jenesis 3:17-19) Tokjãn men in, “aolepen raan ko Adam ear mour, ruwatimjuon bukwi jilñuul iiõ, im emej.” (Jenesis 5:5) Adam ear jab etal ñan lañ ak wõnm̦aanl̦o̦k im mour ãinwõt juon jetõb ilo bar juon jikin. Ear jab mour im pãd ilo juon jikin m̦okta jãn an kar Jeova kõm̦anm̦ane jãn bwidej. Innem ke ear mej, ear bar erom bwidej, eo kar kõm̦anm̦ane jãne. Ear mej im jako. El̦ap wõt an kabũrom̦õjm̦õj men in!

Kõn an kar Adam im Iv kããlõt ñan jab pokake Anij, ear jako aerro weeppãn im erro ar luuji kõjatdikdik eo aerro ñan mour indeeo. Ear oktak wãween mour ko aerro; rar oktak im jab weeppãn im jerawiwi. Bõtab jerawiwi eo aerro kõn aerro kar jab pokake Anij ear jab jelõt wõt erro. Ro nejierro rar bar rijjerawiwi. Rom 5:12 ej ba: “Kõn juon wõt armej [Adam], jerawiwi ear del̦o̦ñ ilo lal̦ in im mej ear wal̦o̦k kõn wõt jerawiwi, im mej ear ajeeded ñan aolep armej kõnke er aolep rar jerawiwi.”

Baibõl̦ ej kwal̦o̦k kõn jerawiwi im mej ãinwõt juon “kein kalbubuuk . . . armej otemjej, im veil eo em̦õj erl̦o̦ke ioon ro ri-aelõñ ko otemjej.” (Aiseia 25:7) Kein kalbubu in ej kalbubuuk aolep armej ãinwõt juon mejatoto ebaijin me ejjel̦o̦k juon emaroñ ko jãne. Em̦ool bwe ‘aolep armej rej mej kõn wõt Adam.’ (1 Korint 15:22) Kajjitõk eo in kiiõ me Paul ear kwal̦o̦ke: “Wõn enaaj lo̦mo̦o̦ren eõ jãn ãnbwin in ej tõll̦o̦k eõ ñan mej?” Ewõr ke juon emaroñ?​—Rom 7:24.