Katak Jãn Naan In Anij

Ta eo Enaaj Wal̦o̦k ilo Raan in Ekajet eo an Anij?

Katak in ej uwaake jet kajjitõk ko me bõlen ekkã am̦ kajjitõk kaki. Im ej kwal̦o̦k eoon ta ko kwõmaroñ lo uwaak in kajjitõk kein ie ilo Baibõl̦. Ri Kõnnaan ro an Jeova renaaj lukkuun m̦õn̦õn̦õ in kõmel̦el̦eik uwaak kein ñan eok.

1. Ta in Raan in Ekajet eo an Anij?

Ãinwõt an wal̦o̦k ilo pija in tuanmoon̦, eñin l̦õmn̦ak eo an elõñ armej kõn Raan in Ekajet eo an Anij. Rej l̦õmn̦ak bwe ilo Raan in Ekajet eo, elõñ bilien armej ro renaaj jutak im̦aan tũroon eo an Anij im enaaj ekajete er ekkar ñan men ko rar kõm̦m̦ani m̦okta. Innem, ro rar kõm̦m̦ani men ko rem̦m̦an renaaj etal ñan lañ ak ro rar kõm̦m̦ani men ko renana renaaj bwil ilo kijeek. Bõtab, Baibõl̦ ej kwal̦o̦k bwe unin an naaj itok Raan in Ekajet eo an Anij ej bwe en lo̦mo̦o̦ren armej ro jãn aer jorrããn im eñtaan kõn men ko renana rej wal̦o̦k ñan er. (Sam 96:​13) Anij ear jitõñ Jijej bwe en Ri Ekajet eo. Im Jijej enaaj jol̦o̦k aolep nana ko me armej rej eñtaan kaki.​—Riit Aiseia 11:​1-5, UBS; Jerbal 17:​31, UBS.

2. Ewi Wãween Raan in Ekajet eo an Anij Enaaj Jol̦o̦k Nana jãn Lal̦ In?

Armej eo m̦oktata, Adam, ear jab pokake Anij. Kõn men in, ear bõktok jerawiwi, eñtaan, im mej ñan aolep ro nejin. (Rom 5:​12) Bõtab, Jijej enaaj jol̦o̦k men kein renana. Ewi wãween? Ilo an naaj kõmour ak kejerkak bilien armej ro rar mej. Bok in Revelesõn ej kwal̦o̦k bwe men in enaaj wal̦o̦k ilo iien eo Jijej Kũraij enaaj irooj ium̦win 1,000 iiõ.​—Riit Revelesõn 20:​4, 11, 12.

Ilo iien in, reban ekajete armej rein ekkar ñan men ko rar kõm̦m̦ani m̦okta jãn aer kar mej. Bõtab, naaj ekajete rein jãn men ko em̦õj jeje ilo “bok ko” renaaj pel̦l̦o̦k, ekkar ñan jerbal ko aer ilo tõre eo renaaj jerkak im mour. Revelesõn jebta 20 ej kwal̦o̦k kõn men in. (Rom 6:​7, UBS) Wõn ro renaaj jerkak jãn mej? Rijjelõk Paul ear ba bwe “ro rem̦m̦an im ro renana, renaaj jerkak jãn mej.” Ñe rein renaaj bar mour, renaaj katak kõn Anij.​—Riit Jerbal 24:​15, UBS.

  3. Ta Men ko Renaaj Wal̦o̦k ilo Raan in Ekajet eo an Anij?

Armej ro rar mej ak rar jab jel̦ã kõn Jeova Anij im rar jab karejar ñan e, renaaj maroñ kiiõ katak kõn Anij. El̦aññe rej kõm̦m̦ani men ko rem̦m̦an, renaaj mour ñan indeeo. Bõtab, enaaj wõr ro reban kõn̦aan katak kõn Anij im oktak. Kõn men in, renaaj mej ñan indeeo.​—Riit Jon 5:​28, 29; Aiseia 26:​10, UBS; 65:​20, UBS.

Aitokõn iien ekajet in enaaj wal̦o̦k ium̦win 1,000 iiõ. Ilo jem̦l̦o̦kin iien in, Jeova enaaj kõm̦m̦an bwe aolep armej ro rar pokake ren weeppãn. (1 Korint 15:​24-28) Eñin jeraam̦m̦an eo enaaj wal̦o̦k ñan aolep armej ro rej pokake! Ilo naaj mãlejjoñ eo ãliktata, Anij enaaj karõl̦o̦k Setan Tepil̦ eo, eo im ear kalbuuj ium̦win 1,000 iiõ. Setan enaaj bar kajjioñ kapo armej ro bwe ren jab karejar ñan Jeova. Ro im reban po ippãn Setan renaaj mour im m̦õn̦õn̦õ ioon lal̦ in ñan indeeo.​—Riit Aiseia 25:8; Revelesõn 20:​7-9.

4. Ta Raan in Ekajet eo Juon an Anij im Enaaj Bõktok Men ko Rem̦m̦an ñan Armej Ro?

Baibõl̦ ej bar kwal̦o̦k kõn juon raan in ekajet me enaaj bõktok jem̦l̦o̦kin jukjuk im pãd in enana. Raan in ekajet in enaaj itok ilo jidimkij ãinwõt kar Ibwijleplep eo ilo raan ko an Noa me ear ko̦kkure aolep armej ro renana. Jej m̦õn̦õn̦õ bwe m̦õttan jidik Anij enaaj ko̦kkure aolep armej ro renana, im armej ro rewãnõk renaaj mour ijin ioon lal̦ ñan indeeo.​​—Riit 2 Piter 3:​6, 7, 13.

Ñan bõk mel̦el̦e ko rel̦l̦apl̦o̦k kõn Raan in Ekajet eo an Anij, lale peij 244-247 ilo bok in, jeje in Ri Kõnnaan ro an Jeova. KATAK KO REM̦OOL JÃN BAIBÕL̦ EO

[Pija ilo peij 16]

“Ekajet Eo An Anij Ãliktata,” Ekkar Ñan Gustave Doré, 1832-1883

[Credit Line]

Engravings by Doré