Naan in kakapilõk ko ilo Baibõl̦ rej jipañ ri pãlele ro em̦õj aer m̦are bwe ren m̦õn̦õn̦õ. Etke? Kõnke naan ko ilo Baibõl̦ rej jãn Jeova Anij. E eo ear karõk ri pãlele ro ruo m̦oktata. Baibõl̦ ej kwal̦o̦k ta ko ri pãlele ro rej aikuj kõm̦m̦ani ñan doon bwe ren maroñ m̦õn̦õn̦õ. Ej bar kwal̦o̦k men ko me ri pãlele ro ren jab kõm̦m̦ani ñan doon bwe en jab jorrããn pãd eo aerro. Bareinwõt, ej katakin ri pãlele ro kõn wãween ko rem̦m̦an remaroñ kõm̦m̦ani ñe rej kõnono ippãn doon.​—Riit Kolosse 3:8-10, 12-14.

L̦eo im lio rej aikuj kautiej doon. El̦aññe erro jim̦or ej kõm̦m̦ani eddo ko aer jãn Anij ãinwõt ri pãlele ro, erro naaj m̦õn̦õn̦õ.​—Riit Kolosse 3:18, 19.

Ri pãlele ro me em̦õj aer m̦are reban jepel el̦aññe rej yokwe doon. Anij ej katakin kõj wãween jemaroñ kwal̦o̦k yokwe ñan doon. Anij im Nejin, Jijej, rej joñak ko rem̦m̦antata kõn yokwe. Yokwe eo aerro ñan ro jet ej kõm̦akũt erro ñan kaarmejjete erro make.​—Riit 1 Jon 4:7, 8, 19.

Ñe l̦eo im lio rej kaorõk pãd eo aerro im watõke bwe ej karõk jãn Anij, reban jepel. Anij ekõn̦aan bwe baam̦le ko ren ippãn doon im jab jepel. Eñin unin ear karõk bwe ro me em̦õj aer m̦are ren mour ippãn doon toon wõt aer mour. Ewõr an ri pãlele ro maroñ ñan kõm̦m̦an bwe pãd eo aer en jab jako. Etke? Kõnke Anij ear kõm̦anm̦an em̦m̦aan im kõrã im kõm̦m̦an bwe ren jejjet ñan doon im ren jipañ doon. Ear bareinwõt kõm̦anm̦an er ilo wãween wõt e. Mel̦el̦ein men in bwe ewõr aer maroñ ñan kwal̦o̦k yokwe, ãinwõt an Anij kwal̦o̦k yokwe.​—Riit Jenesis 1:27; 2:18, 24.