Reegd-y ne sũ-noogo, la y kõt ne y sũur fãa

TÕND yell paka d saasẽ Ba a Zeova sẽn nong-dã. A Gomdã sɩd yet-d lame t’a geta neb nins sẽn maand a raabã yelle. (1 Pɩɛ. 5:7) Bũmb a ye a Zeova sẽn maand tɩ wilgdẽ t’a sɩd geta d yelle, yaa a sẽn kõt-d sõngr buud toor-toor sẽn na yɩl tɩ d tõog n maan a raabã ne d sũy fãa wã. (Ezai 48:17) Sẽn yɩɩd fãa, d sã n wa tar zu-loeese, a Zeova ratame tɩ d sak n deeg sõngr nins a sẽn kõt-dã. Tõog ning a sẽn da kɩt t’a Moiiz taas a nin-buiidã sɩd wilgda rẽ vẽenega.

Tõog kãng pʋgẽ, a Zeova kõo noy “naong rãmbã” bɩ nimbãan-dãmbã sõngr yĩnga. Wala makre, kɩɩbsã, pʋg-kõapã la sãambã. (Maan. 19:9, 10; Tõo. 14:29) A Zeova miime t’a nin-buiidã sʋka, kẽer tõe n wa tara zu-loeese, tɩ b taabã segd n sõng-ba. (Zak 1:27) Woto yĩnga, pa sõmb tɩ ned tõdg sõngr a tẽed-n-taag sẽn dat n kõ-a ye. La baasgo, segdame tɩ d reeg sõngrã ne yam-sõngo.

Wẽnnaam wilgda a Gomdã pʋgẽ me t’a nin-buiidã fãa tara segb toor-toor n tõe n wilg tɩ b yaa kõtba. Tẽeg-y ‘pʋg-kõor ning sẽn yaa naong soabã’ a Zezi sẽn pẽg Zerizalɛm wẽnd-doogẽ wã yelle. (Luk 21:1-4) Vẽenega, pʋg-kõ-kãngã ra rɩta seglg ning a Zeova sẽn dɩk Tõogã pʋgẽ nimbãan-dãmbã sõngr yĩngã nafa. Yaa sɩd t’a ra yaa naong soaba. La baasgo, d sã n gomd a yelle, pa kũun nins nebã sẽn da kõt-a wã yell la d tẽegd ye. Yaa yẽ mengã sẽn kõ wã yell la d tẽegda. A sẽn da yaa kõtã yĩng kɩtame t’a ra tar sũ-noogo, bala wa a Zezi sẽn yeelã, “kũun bee bark n yɩɩd reegre.” (Tʋʋ. 20:35) D sẽn mi rẽ wã, wãn to la d na n maan n yɩ neb sẽn nong n ‘kõt d taaba,’ n paam sũ-noog ning kũun sẽn wat ne wã?—Luk 6:38.

‘Mam na n maana bõe n lebs a Zeova’?

Yɩɩl-gʋlsdã ra soka a meng woto: “Mam na n maana bõe n lebs [a Zeova] bõn-neeb nins fãa bãmb sẽn maan n kõ maamã yĩnga?” (Yɩɩl 116:12) Bõe la a Zeova maan n kõ-a? A Zeova sõng-a-la “toog ne sũ-sãoong” sasa. Sẽn paase, a ‘fãag-a-la ne kũum’ menga. Woto n kɩt t’a baood bũmb a sẽn tõe n maan n dole. Bõe la yɩɩl-gʋlsdã ra tõe n maane? A yeela woto: ‘Mam na n pidsa m kãabsã ne Zusoabã.’ (Yɩɩl 116:3, 4, 8, 10-14) A yãka yam n na n pids bũmb nins fãa a sẽn kãab a Zeova wã.

Yãmb me tõe n maana woto? Wãn-wãna? Yaa y sẽn na n kell n modgd ne y sũur fãa n tũud Wẽnnaam noyã y vɩɩmã pʋgẽ. Bɩ y mao tɩ wakat fãa bɩ yaa a Zeova raabã maaneg n pak-y n yɩɩd sẽn ketã fãa, la y sakdẽ t’a vʋʋsem sõngã wilgd-y sẽn segd bũmb fãa pʋgẽ. (Koɛ. 12:13; Gal. 5:16-18) Yaa sɩd tɩ y pa tõe n dol a Zeova bũmb nins fãa a sẽn maan n kõ-yã yĩng ye. La a sã n ne y sẽn kẽesd y pãngã la y yamã fãa a tʋʋmdã pʋgẽ, ‘kõt-a-la sũ-noogo.’ (Yel. 27:11) Ad  tõnd sẽn paam n tõe n kɩt t’a Zeova sũur yɩ noogã sɩd yaa zu-zẽkr meng n kõ-do!

Sõng-y n tʋm-y tigingã neer yĩnga

Vẽenega, y na n sak n deegame tɩ y sẽn be tigingã pʋgẽ wã tɛka, y paama nafa toor-toore. A Zeova sõng-y-la ne a tigingã maasem tɩ y bãng-a la y bãng a raabã sõma. Y sẽn bãng woto wã, kɩtame tɩ y paam y mens ne ziri nins tũudum a taabã sẽn zãmsd nebã Wẽnnaam la a raabã zugã. (Zã 8:32) Ne tigissã la tigis-kãsemsã “tʋm-tʋmd sẽn tũud sɩd la sẽn tar yamã” sẽn segend n kõt-dã maasem, d paamda bãngr ning sẽn na n kɩt tɩ d wa paam n vɩɩmd tẽngã sẽn na n wa lebg arzãnã zug wakat sẽn pa sate, la d paam d mens ne toog la namsg buud fãa wã. (Mat. 24:45-47) Rẽ yĩnga y tõe n sõda nafa nins fãa y sẽn zoe n paamã, la nafa nins sẽn ket taoorã n sa bɩ? La bõe la yãmb tõe n maan n dol tigingã?

Tʋm-tʋmd a Poll goma tigingã yell n mak-a ne yĩnga, n yeel woto: “[Yaa Kiristã] n tongd yĩngã wilã fãa ne taab tɩ b yɩ neere, n lebg bũmb a yembre. La will fãa sã n maand a tʋʋmd sõma, a sõngda yĩngã fãa tɩ bɩ, la a sõngda a meng ne nonglem.” (Ef. 4:15, 16) Yaa sɩd tɩ yaa kiris-neb nins sẽn paam vʋʋsem sõngã zaeebã la a Poll sẽn yeel woto wã, la kiris-nebã fãa tog n tũu saglg ning a sẽn taas-bã. Sɩd me, tigingã ned kam fãa tõe n sõng n tʋma a nebã fãa neer la b tẽebã bɩʋʋng yĩnga. La wãn-wãn la d tõe n maan rẽ?

Yaa d sẽn na n modgd wakat fãa n kengd d taabã raood la d sõngd-b sẽn na yɩl tɩ b tõog n tũ Wẽnnaam sõma. (Rom 14:19) Bũmb a to me la d tõe n maan n sõng tɩ tigingã b sẽn mak ne yĩngã bɩ. Yaa d sẽn na n wilgd d manesmã ne d tẽed-n-taasã pʋgẽ tɩ d tara zʋg-sõma nins Wẽnnaam vʋʋsem sõngã sẽn kõtã. (Gal. 5:22, 23) Sẽn paase, d tõe n baooda weer n ‘maand nebã fãa yel-sõmde, la neb nins sẽn yaa tõnd ba-biis a Zezi tẽebã yĩngã n yɩɩda.’ (Gal. 6:10; Heb. 13:16) Tigingã neb fãa, rat n yeel tɩ kambã, kom-bɩɩsã la kãsembã fãa tõe n tʋmame n sõng tɩ tigingã neb ne taab nonglmã paase.

D leb n tõe n dɩka d minim, d keelem la d tarem n sõng n moon koe-noogã b sẽn bobl tigingã. A Zezi yeelame tɩ tõnd “deega zaalem.” Woto yĩnga, bõe la d segd n maane? A paasame tɩ d “kõ zaalem.” (Mat. 10:8) Bɩ d mao n sõng n moon Rĩungã koe-noog sẽn fãagd nebã, la d maan karen-biisã ne d pãng tɛka. (Mat. 24:14; 28:19, 20) Rẽ yĩnga yɛl kẽer n kɩt tɩ y pa tõe n tʋm tʋʋm kãngã wʋsg wa y sẽn datã bɩ? Sã n yaa rẽ bɩ y tẽeg pʋg-kõor ning a Zezi sẽn pẽgã yelle. Baa a kũunã sẽn da paood wʋsgã, a Zezi yeelame tɩ yɩɩda nebã fãa rẽndã. Bala, a kõ a sẽn da tõe tɛka.—2 Kor. 8:1-5, 12.

Reegd-y ne yam-sõngo

La yell ning tõe n wa paam-y lame tɩ tigingã neb segd n sõng-yã. Y sã n tar zu-loees tɩ saam-biisã rat n sõng-y bɩ y ra tõdg ye. A Zeova yãka rap sẽn tar minim la b rat a nin-buiidã neere, n kõ-b noor tɩ b ‘rɩlg a tẽedbã,’ rat n yeel tɩ b sõng yãmba, y sã n wa maood ne zu-loees toor-toore. (Tʋʋ. 20:28) Bãng-y tɩ y sã n wa be zu-loees pʋsẽ, tigingã kãsem dãmbã la a neb a taabã tʋll n bels-y lame, n sõng-y la b kogl-yã.—Gal. 6:2; 1 Tes. 5:14.

La y segd n modgame tɩ b sã n wa sõngd-y, bɩ y sak ne yam-sõngo. Wilgd-y tɩ y sũur nooma ne sõngr ning y sẽn paamdã. Ning-y y yamẽ tɩ sõngr ning y tẽed-n-taasã sẽn kõt-yã yaa bark sẽn yit Wẽnnaam nengẽ. (1 Pɩɛ. 4:10) Bõe yĩng tɩ d segd n maan woto? Yaa tɩ tõnd pa rat n yɩ wa dũni kãngã neb wʋsg sẽn yaa zɩ-beoog rãmbã ye.

 Yɩ-y wʋmdb la sakdba

Tʋm-tʋmd a Poll sẽn gʋls Filip saam-biisã lɛtr ningã pʋgẽ, a goma a Tɩmote yell n yeel woto: “Mam ka tar ned ka sẽn tar yam a yembr ne maam sẽn na n ges yãmb yell neer ye.” Dẽ poore, a Poll paasa woto: “Ned kam fãa geta a meng yɛla, la bãmb ka baood bũmb nins sẽn yaa Kirist Zezi rẽnda ye.” (Fil. 2:20, 21) Bɩ d tags a Poll gom-kãensã yelle, la d sok d mens wãn-wãn la tõnd tõe n maan n da wa yɩ neb sẽn get d mens yɛl bala.

D sã n wa tar zu-loɛɛg tɩ tigingã neb na n sõng-do, d pa segd n dat tɩ b rɩk b sẽkã zãng n ges d yell ye. Bõe yĩng tɩ d pa segd n maan woto? D rɩk makr wa d sẽn na n tar d yel-pakr tɩ saam-biig wa kõ-d bũmb n na n sõng-do. Yaa sɩd tɩ d sũur na n yɩɩ noog wʋsgo. La rẽ yĩnga d ra na n sak n tɩ modga saam-biigã t’a kõ-d sɩda? Yaa vẽeneg tɩ ayo. Woto me, baa d saam-biisã sẽn nong-d n sakd n sõngd-d wakat fãa wã, d pa segd n tʋlg tɩ b rɩk b sẽkã fãa n ges d yell ye. D sã n wa maood ne zu-loeese, d pʋd n datame tɩ saam-biisã sã n na n sõng-d bɩ yɩ ne yamleoogo.

Bãng-y tɩ wakat fãa, y yel-pakr sasa, y tẽed-n-taasã na n sak n sõng-y lame. La tõe tɩ sasa ninga, b pa na n tõog n sõng-y wa y sẽn datã ye. La sẽn wa n yaa a soab me bɩ y kell n kɩs sɩd t’a Zeova na n sõng-y-la y yɛlã fãa pʋgẽ wa a sẽn sõng yɩɩl-gʋlsdã.—Yɩɩl 116:1, 2; Fil. 4:10-13.

Woto yĩng bɩ d ra tol n zãgs sõngr buud baa a yembr a Zeova sẽn kɩt tɩ d tõe n paam ye. Sẽn yɩɩd fãa d yel-pakr sasa. (Yɩɩl 55:23) A Zeova rata woto. La a ratame me tɩ d fãa yɩ neb sẽn “kõt ne sũ-noogo.” Bɩ y modgd n ket n kõt wa y sẽn “tags [y] sũur pʋgẽ,” n teend tũudum hakɩkã tɩ zemsd ne y yɛlã sẽn yaa to-to wã. (2 Kor. 9:6, 7) Y sã n maand woto, y na n tõog n yɩɩ neb sẽn deegd ne sũ-noogo, la sẽn kõt ne b sũy fãa me.

[Zĩ-gũbri, seb-neng 32]

“Mam na n maana bõe n lebs [a Zeova] bõn-neeb nins fãa bãmb sẽn maan n kõ maama yĩnga?”—Yɩɩl 116:12

▪ Baood weer n ‘maand nebã fãa yel-sõmde’

▪ Modgd wakat fãa n kengd f taabã raood la f sõngd-ba

▪ Mao n sõngd n moond Rĩungã koe-noog la f maand karen-biisã ne f pãng tɛka