Nebã fãa ratame tɩ laafɩ be bãmb ne b taabã sʋka. B tʋll n yɩɩ pʋ-peelem dãmb la nin-bʋgsa. La bõe yĩng tɩ d mi n yãt nen-kɛglem tʋʋma, wẽgb la wẽnem buud toor-toore? Radio wã, televiziõ wã pʋgẽ la zĩis a taaba, d wae n wʋmda kibay sẽn sãamd sũur wʋsgo. Ãnd n tusd nebã tɩ b tʋmd tʋʋm-beedã?—Karm-y 1 Zã 5:19.

Wẽnnaam naana ninsaal ne tʋls-wẽns bɩ? Ayo. Wẽnnaam a Zeova naana ninsaal a meng wẽnego, t’a tõe n dɩk a togs-n-taar nonglmã wɛɛngẽ. (Sɩngre 1:27; Zoobe 34:10) La a kõo ned kam fãa sor t’a tõe n yãk a toorẽ yam. D yaab a Ãdem ne a Hawa sẽn yãk yam n maan wẽngã, b pa rɩk Wẽnnaam naoor ye. B lebga neb sẽn pa zems zãnga. Rẽ kɩtame tɩ tõnd yaa neb sẽn pa zems zãng d rogem tɛka, n mi n maand yel-wẽna.—Karm-y Tõod 32:4, 5.

Wẽnnaam ratame tɩ d ra bas tɩ d tʋls-wẽnsã tõog tɩ d maan wẽng ye. (Yel-bũnã 27:11) Rẽ n so t’a wilgd tõnd d sẽn tõe n maan to-to n zãag d mens ne tʋls-wẽnsã, la d sẽn tõe n paam sũ-noog hakɩɩk to-to. La d nan pa tõe n dɩk Wẽnnaam togs-n-taar nonglmã wɛɛngẽ tɩ zems kɛpɩ ye.—Karm-y Yɩɩn-sõamyã 32:8.

Yaa sɩd tɩ rũndã-rũndã, tʋʋm-wẽnsã bee zĩig zãnga. La yaa Wẽnnaam n bas tɩ yaa woto wakat bilf pʋgẽ, sẽn na yɩl tɩ nebã fãa yã rẽ sẽn wat ne zu-loees ninsã. (2 Pɩyɛɛr 3:7-9) La ka la bilfu, dũniyã na n pida ne neb sẽn sakd Wẽnnaam, n vɩ ne sũ-noogo.—Karm-y Yɩɩn-sõamyã 37:9-11.