Jekk niffokaw iżżejjed fuq kemm oħrajn huma differenti minna, aħna nistgħu nikkonkludu li differenzi bħal dawn huma difetti. U fir-​realtà nkunu qed inqisuhom li huma inferjuri minna. Ladarba jibda jkollna din il-​ħarsa negattiva lejn oħrajn, se jkun iktar diffiċli biex nuru l-​empatija. Bin-​nuqqas taʼ empatija tagħna nkunu qed nuru li għandna problema ikbar—il-​preġudizzju.

“Ifirħu maʼ min jifraħ; ibku maʼ min jibki.”—RUMANI 12:15.

Xi jfisser? Dan il-​prinċipju jistaʼ jinġabar fi ftit kliem—uri l-​empatija. L-​empatija hi l-​abbiltà li tpoġġi lilek innifsek minflok ħaddieħor u tħoss dak li jħoss hu.

Meta nħossu għal oħrajn, se nindunaw kemm għandna affarijiet komuni bejnietna. Se nirrealizzaw li l-​persuna tistaʼ tħossha u tirreaġixxi bħalma nagħmlu aħna. Li nħossu għal oħrajn jgħinna naraw kemm il-​bnedmin huma kollha bħal xulxin. Jekk infittxu għal modi kif nies oħrajn huma bħalna, l-​opinjoni tagħna dwarhom se titjieb.

Li nħossu għal oħrajn se jgħinna nirrispettawhom. Anne-​Marie, mis-​Senegal, darba kienet tistmerr lil nies li ħafna kienu jqisuhom taʼ klassi baxxa. Hi tispjega kif l-​empatija għenitha: “Meta rajt kemm dawn in-​nies batew, ħsibt kif kont inħossni jien kieku kont minflokhom. Dan ġegħelni nirrealizza li m’iniex superjuri għal dawn in-​nies. M’għamilt xejn biex inkun aħjar minnhom.” Għalhekk, jekk nipprovaw nifhmu d-​diffikultajiet li għandhom oħrajn, m’aħniex se nikkritikawhom.

Jekk inti tqis lil grupp taʼ nies b’mod negattiv, ipprova ifhem b’liema modi inti simili għalihom. Pereżempju, immaġina kif iħossuhom meta

• jieklu mal-​familja

• jispiċċaw ġurnata xogħol

• iqattgħu l-​ħin mal-​ħbieb

• jisimgħu l-​mużika favorita tagħhom

Imbagħad ipprova immaġina lilek innifsek fis-​sitwazzjoni tagħhom. Saqsi lilek innifsek:

• ‘Kif nirreaġixxi kieku xi ħadd iġegħelni nħossni li ma niswa għalxejn?’

• ‘Kif inħossni kieku oħrajn jiġġudikawni mingħajr ma jafuni?’

• ‘Kieku jien parti mill-​grupp tagħhom, kif nixtieq li oħrajn jittrattawni?’