Hemm Xi Ħadd Wara l-Ħażen Kollu?
“ĦADT b’idejn ix-xitan.” Hekk qal il-kmandant tal-forzi tal-Ġnus Magħquda fl-Irwanda meta qagħad jaħseb dwar kif naqsu milli jwaqqfu l-ġenoċidju li sar f’dak il-pajjiż matul l-1994. Filwaqt li kkummenta fuq is-salvaġġiżmu li ma jitwemminx taʼ dak iż-żmien, xi ħadd ieħor li ra dak li ġara qal: “Jekk xi ħadd għadu jażżarda jaħseb li ma jeżistix Satana, għidlu jiltaqaʼ miegħi ħdejn wieħed mill-oqbra fejn indifnu ħafna nies f’daqqa fl-Irwanda.” Huma atroċitajiet bħal dawn verament xogħol ix-Xitan?
Il-maġġuranza tan-nies ma jqisux il-vjolenza u l-krudeltà li jsiru għal xejn b’xejn bħala x-xogħol taʼ ħlejqa spirtu mill-agħar inviżibbli. Ħafna jaħsbu li affarijiet bħal dawn jiġru minħabba l-ħażen li jinsab fin-natura tal-bniedem u li l-kaġun veru tal-ħażen hu l-istint mill-agħar tagħna stess. Oħrajn ħarġu bit-teorija li grupp taʼ nies għonja u li għandhom il-poter, xi tip taʼ netwerk globali sigriet, ilu jimmanipula lin-nies għal għaxriet taʼ snin sabiex jaħkem lid-dinja. Imbagħad, ovvjament, hemm dawk li jwaħħlu fil-gvernijiet u l-ħakkiema nazzjonali għall-inġustizzja u t-tbatija kollha li jaraw.
Inti x’temmen? Il-ħażen, il-krudeltà, l-atroċitajiet, u t-tbatija għala huma tant mifruxin madwar id-dinja llum minkejja l-isforzi li jsiru biex dawn jiġu kontrollati? Għala jidher li l-umanità donnha għaddejja b’għajnejha magħluqa u b’għaġla fi triq li twassal biex teqred lilha nfisha, waqt li t-twissijiet ripetuti li jingħatawlha jaqgħu fuq widnejn torox? Hemm xi ħadd wara dan kollu? Min tassew jaħkem lid-dinja? It-tweġiba taf tissorprendik.