Smita, * mara taʼ 35 sena f’Dhaka, il-​Bangladexx, kellha r-​reputazzjoni li kienet mara li turi l-​imħabba u li jimpurtaha minn ħaddieħor. In-​nies kienu jafuha bħala mara żagħżugħa miżżewġa bieżla u ferħana li riedet tgħin lil ħaddieħor isir jaf dak li kienet tgħallmet dwar Alla. Kemm kienu xxokkjati tal-​familja u ħbiebha meta ħabta u sabta Smita qabditha marda li ħaditilha ħajjitha f’inqas minn ġimgħa!

James u martu, koppja żagħżugħa li għandhom fuq it-​30 sena, kellhom reputazzjoni simili għal dik taʼ Smita. Darba fir-​rebbiegħa, marru jżuru lil ħbiebhom fil-​Kosta tal-​Punent tal-​Istati Uniti. Qatt ma reġgħu lura darhom fi New York. Meta kienu hemm, kienu involuti f’inċident fatali tat-​traffiku, u ħallew vojt kbir fil-​ħajja taʼ familthom u sħabhom tax-​xogħol.

M’hemmx għalfejn tfittex wisq biex tara li aħna miżgħudin bil-​ħażen u bit-​tbatija. Il-​gwerer joqtlu nies pajżana kif ukoll suldati. Nies innoċenti huma vittmi tal-​kriminalità u l-​vjolenza. Il-​mard qerried u l-​inċidenti fatali jiġru lil kulħadd, għandu kemm għandu żmien u hi x’inhi l-​qagħda tiegħu fil-​ħajja. Id-​diżastri naturali jikinsu komunitajiet sħaħ bla distinzjoni. Il-​preġudizzju u l-​inġustizzja ssibhom kullimkien. Forsi int stess kont vittma xi darba.

Hu naturali li tistaqsi mistoqsijiet bħal dawn:

• Affarijiet ħżiena għala jiġru lil nies tajbin?

• Hu t-​tort t’Alla li jiġru dawn l-​affarijiet?

• Id-​diżastri jseħħu bl-​addoċċ jew huma tort tal-​bnedmin?

• Tistaʼ tkun il-​Karma, jiġifieri, ir-​riżultat tal-​azzjonijiet taʼ xi ħadd f’ħajja oħra fil-​passat, il-​kaġun tat-​tbatija personali?

• Jekk hemm Alla li jistaʼ kollox, għala ma jipproteġix nies tajbin mill-​ħażen?

• Il-​ħajja qatt se tkun ħielsa mill-​ħażen u t-​tbatija?

Biex inwieġbu dawn il-​mistoqsijiet, irridu nifhmu t-​tweġiba għal dawn iż-​żewġ mistoqsijiet bażiċi: Wara kollox, affarijiet ħżiena għalfejn jiġru, u Alla x’se jagħmel?