L-​isem Grieg tal-​ktieb Bibliku tar-​Rivelazzjoni, Apokalipsis (apokalissi), ifisser “Kxif” jew “Ħaġa Mgħarrfa.” Dan l-​isem jagħti x’jifhem x’inhi t-​tifsira tar-​Rivelazzjoni—dan il-​ktieb jikxef affarijiet li kienu moħbijin u jagħmel magħruf ġrajjiet li kienu se jiġru ħafna żmien wara li nkiteb. Ħafna mill-​profeziji tiegħu għad iridu jitwettqu.

Ħarsa fuq fuq tal-​ktieb tar-​Rivelazzjoni

•   Introduzzjoni.​—Rivelazzjoni 1:​1-​9.

•   Messaġġi mingħand Ġesù lis-​sebaʼ kongregazzjonijiet.​—Rivelazzjoni 1:10–​3:​22.

•   Viżjoni t’Alla fuq it-​tron tiegħu fis-​sema.​—Rivelazzjoni 4:1-​11.

•   Serje taʼ viżjonijiet, kull waħda twassal għal taʼ warajha:

  •   Sebaʼ siġilli.​—Rivelazzjoni 5:1–​8:6.

  •   Sebaʼ trumbetti, l-​aħħar tlieta jintroduċu tliet gwajijiet.​—Rivelazzjoni 8:7–​14:20.

  •   Sebaʼ bwieqi, kull bieqja fiha kastig li jirrappreżenta ġudizzju mingħand Alla li se jiġi mferraʼ fuq l-​art.​—Rivelazzjoni 15:1–​16:21.

  •   Viżjonijiet tal-​qerda tal-​għedewwa t’Alla.​—Rivelazzjoni 17:1–​20:10.

  •   Viżjonijiet taʼ barkiet t’Alla għas-​sema u l-​art.​—Rivelazzjoni 20:11–​22:5.

•   Konklużjoni.​—Rivelazzjoni 22:​6-​21.

Affarijiet li jgħinuna nifhmu l-​ktieb tar-​Rivelazzjoni

1.   Il-​messaġġ tiegħu hu pożittiv u mhux tal-​biżaʼ jew tat-​twerwir għal dawk li jaqdu lil Alla. Filwaqt li ħafna jassoċjaw il-​kelma “apokalissi” maʼ xi diżastru kbir, il-​ktieb tar-​Rivelazzjoni jibda u jispiċċa billi jgħid li dawk li jaqraw, jifhmu, u japplikaw il-​messaġġ tiegħu se jkun henjin talli jagħmlu dan.​—Rivelazzjoni 1:3; 22:7.

2.   Il-​ktieb tar-​Rivelazzjoni juża ħafna “sinjali,” jew simboli, li m’għandhomx jittieħdu letterali.​—Rivelazzjoni 1:1.

3.   Ħafna karattri u simboli ewlenin fil-​ktieb tar-​Rivelazzjoni jissemmew qabel fil-​Bibbja:

   •   Ġeħova​—“l-​Alla l-​veru fis-​smewwiet” u l-​Ħallieq taʼ kollox.​—Dewteronomju 4:​39; Salm 103:19; Rivelazzjoni 4:​11; 15:3.

   •   Ġesù Kristu​—“il-​Ħaruf t’Alla.”​—Ġwanni 1:​29; Rivelazzjoni 5:6; 14:1.

   •   Satana x-​Xitan​—l-​għadu t’Alla.​—Ġenesi 3:​14, 15; Ġwanni 8:​44; Rivelazzjoni 12:9.

   •   Babilonja l-​Kbira​—bħal Babilonja tal-​qedem (Babel), għadu t’Alla Ġeħova u tan-​nies tiegħu u sors tal-​gideb reliġjuż.​—Ġenesi 11:​2-​9; Isaija 13:​1, 11; Rivelazzjoni 17:​4-​6; 18:​4, 20.

   •   “Il-​baħar”​—il-​bnedmin mill-​agħar li jopponu lil Alla.​—Isaija 57:20; Rivelazzjoni 13:1; 21:1.

   •   Affarijiet li jitqabblu mat-​tabernaklu tal-​qedem li ntuża fil-​qima t’Alla​—inkluż l-​arka tal-​patt, il-​baħar tal-​ħġieġ (vaska biex jinħaslu), il-​gandlieri, l-​offerti tal-​inċens, u artal għal sagrifiċċju.​—Eżodu 25:10, 17, 18; 40:24-​32; Rivelazzjoni 4:​5, 6; 5:8; 8:3; 11:19.

   •   Bhejjem salvaġġi​—jagħtu stampa taʼ gvernijiet umani.​—Danjel 7:​1-​8, 17-​26; Rivelazzjoni 13:​2, 11; 17:3.

   •   Numri li jintużaw b’mod simboliku.​—Rivelazzjoni 1:​20; 8:​13; 13:18; 21:16.

4.   Il-​viżjonijiet japplikaw għal “jum il-​Mulej,” li beda meta twaqqfet is-​Saltna t’Alla fl-​1914 u meta Ġesù beda jaħkem bħala Sultan. (Rivelazzjoni 1:​10) Għalhekk, nistgħu nistennew li t-​twettiq ewlieni tar-​Rivelazzjoni se jkun fi żmienna.

5.   Sabiex nifhmu l-​ktieb tar-​Rivelazzjoni, għandna bżonn l-​istess affarijiet li jgħinuna nifhmu l-​kumplament tal-​Bibbja, inkluż l-​għerf mingħand Alla u l-​għajnuna taʼ dawk li diġà jifhmu s-​suġġett.​—Atti 8:​26-​39; Ġakbu 1:5.