လူတွေဟာ ခေတ်မီတိုးတက်အောင် အမြဲကြိုးစားလုပ်ဆောင်ကြမှာပဲ။ ဒါပေမဲ့ အချင်းချင်း ရိုင်းပင်းကူညီတဲ့ လူ့ဘောင်တစ်ခုကို သူတို့ဘာသာ တည်ဆောက်ဖို့ဆိုတာ ဖြစ်နိုင်ပါ့မလား။ မဖြစ်နိုင်ပါဘူး။ အကြောင်းက ဒီနေ့ခေတ်ကမ္ဘာကြီးမှာ တစ်ကိုယ်ကောင်းဆန်ပြီး လောဘကြီးတဲ့သူတွေနဲ့ပဲ ပြည့်နှက်နေလို့ပါ။ ဒါပေမဲ့ သာယာပျော်ရွှင်တဲ့လူ့မိသားစုကြီးဖြစ်လာအောင် လုပ်ပေးမယ်လို့ ဘုရားသခင် ကတိပြုထားပါတယ်။—၂ ပေတရု ၃:၁၃ ကိုဖတ်ပါ။

အနာဂတ်မှာအချင်းချင်းရိုင်းပင်းကူညီပြီးချစ်မြတ်နိုးကြမယ့် ကမ္ဘာချီလူ့အဖွဲ့အစည်း ဖြစ်ပေါ်လာမယ်လို့ ကျမ်းစာမှာဖော်ပြထားတယ်။ ဒုက္ခပေးမယ့်သူလည်း ရှိတော့မှာမဟုတ်တဲ့အတွက် လူတွေဟာ အေးချမ်းလုံခြုံစွာ နေထိုင်ကြရပါလိမ့်မယ်။—မိက္ခာ ၄:၃၊ ၄ ကိုဖတ်ပါ။

လူတွေကို ဘုရားဖန်ဆင်းတုန်းက တစ်ကိုယ်ကောင်းစိတ်ဆိုတာ မရှိပါဘူး။ ဒါပေမဲ့ ပထမဆုံးလူသားက ဘုရားစကားနားမထောင်ခဲ့တဲ့အတွက် အပြစ်အနာအဆာတွေ၊ တစ်ကိုယ်ကောင်းစိတ်တွေ ပေါ်လာတယ်။ ဒါကြောင့် သူ့ရဲ့သားစဉ်မြေးဆက်တွေဖြစ်တဲ့ ကျွန်ုပ်တို့ဆီမှာလည်း တစ်ကိုယ်ကောင်းစိတ်တွေ ရှိနေရတာဖြစ်တယ်။ ဒါပေမဲ့ ဘုရားက ယေရှုအားဖြင့် လူတွေမှာရှိတဲ့ တစ်ကိုယ်ကောင်းစိတ်တွေ ပပျောက်အောင် လုပ်ဆောင်ပေးပါလိမ့်မယ်။—ရောမ ၇:၂၁၊ ၂၄၊ ၂၅ ကိုဖတ်ပါ။

ယေရှုဟာ ဘုရားသခင်ရဲ့ဆန္ဒအတိုင်း သူ့အသက်ကို စွန့်လွှတ်ခဲ့ပြီး ပထမဆုံးလူသားရဲ့ မနာခံမှုကြောင့် ဖြစ်ပေါ်လာတဲ့ဆိုးကျိုးတွေကို ချေဖျက်ပေးမှာဖြစ်တယ်။ (ရောမ ၅:၁၉) ကောင်းမွန်တဲ့အနာဂတ်ကို ယေရှု ပြုလုပ်ပေးမယ့်အချိန်မှာ တစ်ကိုယ်ကောင်းစိတ်တွေ လုံးဝပပျောက်သွားပါလိမ့်မယ်။—ဆာလံ ၃၇:၉–၁၁ ကိုဖတ်ပါ။