TLAMACHTILI 38
Ma tijpatiitakaj nemilistli
Nochi uelij tijchiuaj miak tlamantli tlen techpaktia o tlen ika timoyolpakiltiaj pampa toTeotsij kichijtok ma tiitstokaj. Uan maske kemantika tijpiaj kuesoli, onka se keski tlamantli tlen kichiua nojua ma tiyolpakikaj. ¿Kenijkatsa uelis tijnextisej tijtlaskamatiliaj Jehová pampa techkaua ma tiitstokaj? Uan, ¿kenke tlauel moneki kiampa tijchiuasej?
1. ¿Kenke moneki tijpatiitasej tonemilis?
Jehová techmakatok nemilistli, yeka moneki tijpatiitasej tonemilis. Ya kinmakatok “yolistli nochi” katli yoltokej pampa kichijchijki nochi tlen onka (Salmo 36:9). ToTeotsij “kinmaka yolistli nochi tlen itstokej. Kena, yajaya kichiua para nochi tlen titlaijiyotilanaj ma titlaijiyotilanakaj” (Hechos 17:25, 28). Uajka, Jehová techmaka nochi tlen techpaleuia ma tiyoltokaj uan nojkia kichiua ma tiyolpakikaj (xijpoua Hechos 14:17).
2. ¿Kenijkatsa uelis tijnextisej tijpatiitaj tonemilis uan ininnemilis sekinok?
Kema ayamo titlakatiyaya, Jehová ya mitsikneliyaya. ToTeotsij kichijki ma moijkuilo tlen David kiijtok kema momaijtok: “Moixteyoljuaj kiitakej kema pejki nimoskaltia iijtiko nonana” (Salmo 139:16, TNM). Ya tlauel kipatiita monemilis (xijpoua Mateo 10:29-31). Jehová tlauel moyolkokoskia tlaj se akajya san kinekiskia momiktis o kimiktiskia seyok (Éxodo 20:13). a Nojkia moyolkokoskia tlaj kiitaskia tijchiuaj tlamantli tlen ueliskia kichiuas ma timikikaj o tlen ueliskia kichiuas sekinok ma mikikaj. Kema timomokuitlauiaj uan amo tijnekij sekinok ma kinpano tlen amo kuali, tijnextiaj tijpatiitaj tonemilis uan nojkia ininnemilis sekinok.
KUALI XIMOMACHTI
Ma tikitakaj se keski tlamantli tlen ika uelis tijnextisej tijpatiitaj nemilistli.
3. Ximomokuitlaui uan kiampa amo timokokos
Tojuantij tijtekiuiaj tonemilis kej Jehová kineki pampa tikiljuijtokej nochipa tijtekipanosej. Uan tijmaktilijtokej tonemilis kej se tlakajkaualistli “tlatsejtseloltik”, yeka moneki kuali timomokuitlauisej. Xijpouakaj Romanos 12:1, 2 uan xijnankilikaj ni tlajtlanili:
-
¿Kenke moneki timomokuitlauis uan kiampa amo timokokos?
-
¿Kenijkatsa uelis tijchiuas?
4. Xijpatiita monemilis uan nojkia ininnemilis sekinok
Biblia kiijtoua amo ma tijchiuakaj yon se tlamantli tlen ueliskia kichiuas ma techpano tlen amo kuali. Xikitakaj nopa VIDEO kampa nesi tlake uelis inkichiuasej uan kiampa amo inmechpanos tlen amo kuali:
Xijpouakaj Proverbios 22:3 uan xikitakaj tlake uelis kichiuas se akajya uan kiampa amo kipanos tlen amo kuali...
-
... ipan ichaj.
-
... kampa tekiti.
-
... kema mauiltia.
-
... kema kinemiltia se carro o kema nopaya yaui.
5. Xijpatiita inemilis se pilkonetsi katli ayamo tlakati
David kiijtok Jehová kiita kenijkatsa moskaltijti se pilkonetsi katli nojua ayamo tlakati. Xijpouakaj Salmo 139:13-17 uan xijnankilikaj ni tlajtlanili:
-
¿Kema kiita Jehová peua inemilis se akajya: kema tlakati o kema inana peua tlanemiltia?
Nopa tlanauatili tlen Jehová kinmakak israeleuanij kinmokuitlauiyaya siuamej katli tlanemiltiyayaj uan ininpilkone katli ayamo tlakatiyaya. Xijpouakaj Éxodo 21:22, 23 uan xijnankilikaj ni tlajtlanili:
-
Tlaj se akajya kimiktiyaya se pilkonetsi katli ayamo tlakatiyaya maske amo san kinekiyaya, ¿kenijkatsa kiitayaya Jehová?
-
Uajka, ¿kenijkatsa kiyolmati Jehová kema se akajya san kineki mokonetlauisos? b
-
Uan ta, ¿kenijkatsa tikita tlen Jehová moiljuia?
Maske se siuatl kipatiita nemilistli, uelis moiljuis moneki mokonetlauisos. Xijpouakaj Isaías 41:10 uan xijnankilikaj ni tlajtlanili:
-
Tlaj se siuatl kiiljuiaj ma mokonetlauiso, ¿ajkia moneki kiiljuis ma kipaleui? ¿Kenke moneki kiampa kichiuas?
TLEN SEKINOK KIIJTOUAJ: “Se siuatl uelis kitlapejpenis tlaj mokonetlauisos o amo, pampa ya tlanemiltia”.
-
¿Tlake mitspaleuia ximotemachi Jehová kipatiita inemilis se siuatl katli tlanemiltia uan nojkia ipilkone katli ayamo tlakati?
TLEN TIMOMACHTIJKEJ
Jehová kichijtok ma tiitstokaj, yeka Biblia kiijtoua moneki tijpatiitasej tonemilis, timomokuitlauisej uan timoiknelisej. Uan nojkia moneki kiampa tijchiuasej ika sekinok ininnemilis.
¿Tlake tijyekok?
-
¿Kenijkatsa tijmatij Jehová kipatiita tonemilis?
-
¿Kenijkatsa kiyolmati Jehová kema se akajya momiktia san pampa kineki o kimiktia seyok?
-
¿Kenke tlauel tijpatiita monemilis?
NOJKIA XIKITA NI
¿Kenijkatsa uelis tijnextisej tijtlaskamatiliaj Jehová pampa techmakatok tonemilis?
¿Kitlapojpoljuia toTeotsij se siuatl katli mokonetlauisok?
“¿Tlake kiijtoua Biblia kema se akajya mokonetlauisoua?” (Tlamachtili ipan jw.org)
Xikita kenijkatsa techpaleuia kuali ma tijtlapejpenikaj tlen ika timoyolpakiltisej kema tijmatij kenijkatsa kiita Jehová tonemilis.
Xikita kenijkatsa Biblia uelis kipaleuis se akajya katli kineki momiktis.
a Jehová kitekipachoua tlen kinpano katli tlauel mokuesouaj (Salmo 34:18). Ya kikuamachilia kenke sekij kinekij momiktisej uan kineki kinpaleuis katli kiampa kiyolmatij. Xikita kenijkatsa tlauel mitspaleuis tlen Jehová kiijtoua ipan nopa tlamachtili “¿Uelis nechpaleuis tlen Biblia kiijtoua tlaj ayokmo nijneki niitstos uan nijneki nimomiktis?”, tlen eltok ipan tlaxeloli “Nojkia xikita ni” tlen uala ipan ni tlamachtili.
b Katli uejkajkia mokonetlauisojkej, amo kinamiki mokuesojtosej pampa Jehová kineki kintlapojpoljuis. Tlaj nojua tijneki tijmatis tlen ni tlamantli, xikita nopa tlamachtili “¿Tlake kiijtoua Biblia kema se akajya mokonetlauisoua?”, tlen eltok ipan tlaxeloli “Nojkia xikita ni” tlen uala ipan ni tlamachtili.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
