TLAMACHTILI 8
¿Kenke toTeotsij kikaua ma onka tlaijiyouilistli uan tlen amo kuali?
1. ¿Kenijkatsa pejki onka tlen amo kuali?
Ipan nopa miak xiuitl tlen toTeotsij kinkajtok ma tlanauatikaj maseualmej, kinextijtokej amo uelij kisenkauaj kuesoli tlen onka ipan Tlaltipaktli
Kema Satanás kiijtok nopa achtoui istlakatili, pejki onka tlen amo kuali ipan Tlaltipaktli. Maske achtouia eliyaya se kuali iluikaejketl, amo nochipa ‘uelki kiijtok tlen melauak’ (Juan 8:44). Teipa kinejki ma kiueyichiuakaj, maske san toTeotsij kinamiki ma tijueyichiuakaj. Yeka kikajkayajki nopa achtoui siuatl tlen motokaxtik Eva, uan kichijki ma kineltoka ya uan amo toTeotsij. Uan Adán nojkia amo kineltokak toTeotsij. Yeka nama titlaijiyouiaj uan timikij. (Xijpoua Génesis 3:1-6 uan 19).
Kema Satanás kichijki Eva ayokmo ma kineltoka toTeotsij, kiijixnamijki toTeotsij Jehová katli san ya kinamiki tlanauatis. Nama miakej kichiuaj kej Diablo pampa amo kinekij ma kinnauati toTeotsij. Yeka Satanás mochijtok katli “kinnauatia tlakamej [o maseualmej] tlen ni Tlaltipaktli”. (Xijpoua Juan 14:30 uan 1 Juan 5:19).
2. ¿Amo kuali kichijki toTeotsij nopa tlamantli katli onka?
Jehová tlauel kuali kichijtok nochi tlen onka. Yeka nopa achtoui maseualmej uan iluikaeuanij ueltoskiaj kineltokatoskiaj nochi tlen toTeotsij kinnauatiyaya (Deuteronomio 32:4, 5). ToTeotsij techkaua ma tijtlapejpenikaj tijchiuasej tlen kuali o tlen amo kuali. Nopa kichiua ma tijneltokakaj toTeotsij pampa tikikneliaj. (Xijpoua Santiago 1:13-15 uan 1 Juan 5:3).
3. ¿Kenke toTeotsij kikajtok ma onka tlaijiyouilistli?
¿Kenke Jehová kikajtok ma kiijixnamikikaj se keski tonali? Pampa kineki kinextis kenijkatsa yon se tlanauatijketl tlen toTeotsij amo kipaleuia, amo uelis kinpaleuis maseualmej (Eclesiastés 7:29; 8:9). Uan ni kuali nesi ipan nopa 6,000 xiuitl katli panotok, pampa tekichiuanij amo ueltokej kitlamiltiaj tlen amo xitlauak, yon katli temiktiaj, yon uejueyi tlauilankayotl yon kokolistli. (Xijpoua Éxodo 9:16 uan Jeremías 10:23).
ToTeotsij techpaleuis tlaj tijkauasej ma technauati (Isaías 48:17, 18). Jehová nechka kintsontlamiltis tlanauatianij. Uan ipan Tlaltipaktli san itstosej maseualmej katli kipaleuisej iTlanauatijkayo (Isaías 11:9). (Xijpoua Daniel 2:44).
Xikita nopa video ¿Kenke toTeotsij kikaua ma onka tlaijiyouilistli?
4. ¿Tlake uelis tijchiuasej pampa toTeotsij nojua techkajtok ma tiitstokaj?
Satanás kiijtok maseualmej kitekipanouaj toTeotsij san pampa kintlamajmaka. Nama pampa toTeotsij nojua techkajtok ma tiitstokaj, kej timonejnemiltiaj nochi uelis tijnextisej kenijkatsa Diablo san istlakati, uan nojkia tijnextisej tijpaleuiaj san toTeotsij iTlanauatijkayo uan amo maseualmej katli nama tekichiuaj. (Xijpoua Job 1:8-12 uan Proverbios 27:11).
5. ¿Kenijkatsa tijnextiaj tijnekij ma tlanauati toTeotsij?
Ika tlen tijtlapejpeniaj tijchiuasej tijnextiaj tlaj kena o amo tijnekij ma technauati toTeotsij
Achtoui moneki ma tijmatikaj kenijkatsa kineki toTeotsij ma tijueyichiuakaj uan ma tiitstokaj ipan nopa religión katli melauak kampa tlamachtiaj tlen uala ipan Biblia (Juan 4:23). Uan kej kichijki Jesús, tlaj amo timokalakisej ipan política yon amo titlapaleuisej kema onkas uejueyi tlauilankayotl, tijnextisej amo tijnekij ma technauati Satanás. (Xijpoua Juan 17:14).
Satanás kichiua maseualmej ma momekatikaj uan ma kichiuakaj tlen amo kuali. Tlaj amo tijchiuaj nopa, uelis touampoyouaj uan tochampoyouaj techpinajtisej o techkualankaitasej (1 Pedro 4:3, 4). Tlaj techpanoskia nopa, moneki ma timouikakaj ininuaya katli kiikneliaj toTeotsij uan ma tijneltokakaj toTeotsij itlanauatiljuaj. Kej nopa tijnextisej Satanás san istlakatik kema kiijtok amo aka kineltokaskia toTeotsij kema onkaskia tlaouijkayotl. (Xijpoua 1 Corintios 6:9, 10 uan 15:33).
ToTeotsij temachtli kitlamiltis tlaijiyouilistli uan tlen amo kuali pampa ya techiknelia. Katli kinextisej kineltokaj toTeotsij, itstosej nochipa ipan Tlaltipaktli. (Xijpoua Juan 3:16).
