TLEN BIBLIA KIIJTOUA: “Asis se tonali nojkia kema nochi tlakamej tlen miktokej uan tlen kintlalpachojtokej, [ki]kakisej [Jesús] uan pankisasej” (Juan 5:28, 29).

Jesús kiijtok kema tlanauatis ayokmo aka kitlalpachojtosej. Fernando, katli tikitakej ipan nopa achtoui tlamachtili, kiijtoua: “Tlauel nechpaktik kema nijpojki Juan 5:28 uan 29. Nechnextilik ipan tlake moneki nimotemachis, yeka pejki nijchia ika miak pakilistli ma moaxiti”.

Job kineltokayaya se tonali toTeotsij kiyolkuiskia. Ya kiiljuik toTeotsij: “Tlaj se tlakatl mikis, ¿uelis sampa itstos?”. Uan yaya iselti monankilik: “Mojmostla kema nechchiualtisej ma nitekiti [nopa tonali tlen nimochias kampa nitlalpachojtos], nijchias ma nechmakixtikaj. Ta tinechnojnotsas, uan na nimitsnankilis. Tlauel tijnekiskia tinechitas pampa ta tinechchijki” (Job 14:14, 15, TNM).

Marta katli eliyaya Lázaro iikni, kimatiyaya moyolkuiskiaj katli miktokej. Kema mijki Lázaro, Jesús kiiljuik: “Moikni sampa moyolkuis”. Uan ya kinankilik: “Nijmati moyolkuis sampa kema nochi mijkatsitsij moyolkuisej ipan itlamia tonali”. Uan Jesús kiiljuik: “Na tlen nikinyolitia tlakamej tlen miktokej uan sampa nikinmaka yolistli. Yonke mikis itlakayo se tlen nechneltoka, kipias yolistli yankuik para nochipa” (Juan 11:23-25). Teipa Jesús kiyolkuik Lázaro. Ni technextilia tlen teipa panos. ¡Nelia tlauel tiyolpakisej kema tikinitasej tlauel miakej moyolkuisej ipan nochi Tlaltipaktli!

TLEN BIBLIA KIIJTOUA: Biblia kinextia kema Jesús moyolkuik amo elki sanse kej nopa chikueyij maseualmej katli kinyolkuikej, pampa nopa maseualmej moyolkuikej ipan Tlaltipaktli. Uan kema Jesús moyolkuik Biblia kiijtoua: “Jesucristo yajtok iluikak uan moseuijtok inejma toTeko Dios” (1 Ped. 3:21, 22). ¿San Jesucristo yajki iluikak kema moyolkuik? Achtouia kiniljuijtoya itokilijkauaj: “Kema ya niinmechsenkauilijtos inmochajchaj, uajka sampa niualasok uan niinmechuikas para initstosej nouaya nepa kampa niitstos” (Juan 14:3).

Jesucristo yajki iluikak uan kichiuato tlen monekiyaya uan kiampa kinseliskia se keskij itokilijkauaj. Biblia kiijtoua 144,000 maseualmej yasej iluikak (Apoc. [Rev.] 14:1, 3). Uan, ¿tlake kichiuatij?

 Nopaya kipiasej miak tekitl. Biblia kiijtoua: “Tlateochiualmej uan tlatsejtseloltikej nopa tlakamej tlen achtoui moyolkuisej. Nopa ompa mikistli kampa nopa ueyi tlitl axtleno ueli kinchiuilis. Yajuantij elisej [sacerdotes] para toTeko uan Cristo. Uan nochi nopa tlakamej tlanauatisej iuaya Cristo para mil xiuitl” (Apoc. 20:6). Nochi elisej tlanauatianij uan sacerdotes uan tlanauatisej iuaya Jesús ipan nochi Tlaltipaktli.

TLEN BIBLIA KIIJTOUA: Ipan Biblia uala tlen Pablo kiijtok: “Nojkia nijneltoka toTeko kinyolitia tlakamej tlen ya miktokej, tlen kuajkualmej uan tlen axkuajkualmej. Uan ni tlakamej tlen nikaj itstokej nojkia ya nopa kineltokaj” (Hech. 24:15).

¿Ajkia inijuantij nopa “kuajkualmej”? Ma tikilnamikikaj Daniel katli kichijki tlen xitlauak. Ya eliyaya temachtli uan kema nechka mikiskia toTeotsij kiiljuik: “Timosiajkauas, pero kema asis itlamia tonali, timeuas uan tijselis tlen tijtlantok” (Dan. 12:13). ¿Kanke moyolkuiskia Daniel? Biblia kiijtoua: “Tlakamej tlen itstokej xitlauakej iixpa toTeko moaxkatisej nopa tlali tlen yajaya kinmakas, uan nepa itstosej para nochipa” (Sal. 37:29). Uan Jesús kiijtok: “Xipakikaj inmojuantij tlen axinmoueyimatij ininixtla sekinok. ToTeko inmechaxkatis nochi Tlaltipaktli” (Mat. 5:5). Daniel uan sekinok toTeotsij itekipanojkauaj moyolkuisej uan kiampa sampa itstosej ipan Tlaltipaktli uan uelis itstosej nochipa.

¿Ajkia inijuantij nopa “axkuajkualmej”? Tlauel miakej katli mijkej uan amo kiixmatkej yon amo monejnemiltijkej kej kiijtoua Biblia. Kema moyolkuisej kimatisej ajkia Jehová * uan Jesucristo, uan nojkia uelis kiniknelisej (Juan 17:3). Katli kitekipanosej toTeotsij, itstosej nochipa.

TLEN BIBLIA KIIJTOUA: “ToTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya ipan nopa achtoui Tlaltipaktli” (Apoc. 21:4). “Kema se tlakatl kichijchiuas ichaj, yajaya itstos ipan ichaj [...,] kitokasej xokomekamili, uan yajuantij kikuasej itlajka.” (Is. 65:21.)

¡Nelia tiyolpakis kema kiampa tiitstos ininuaya mochampoyouaj! Yeka ximotlajtlani: ¿Kenke uelis timotemachis nelnelia moyolkuisej mijkatsitsij?