TETAJMEJ
10. Xieli titemachtli
¿TLAKE KIIJTOSNEKI?
Se akajya katli temachtli, tlaneltoka kema kiiljuiaj amo ma kichiua se keski tlamantli, kichiua tlen kiijtoua uan amo istlakati. Kema se telpokatl kiampa kichiua, itatauaj, katli ininuaya kuali mouika uan katli kitekimakaj motemachiaj ipan ya.
¿KENKE TLAUEL MONEKI?
Tlaj tijneki ma mitskauakaj tijchiuas se keski tlamantli, moneki tijnextis tieli temachtli.
“Tlaj tijneki motatauaj ma motemachikaj ipan ta, moneki nochipa tijchiuas tlen mitsiljuiaj uan amo san kema tiitstos ininuaya” (Sarahi).
TLEN BIBLIA TETLAJTOLMAKA: Xijnextikaj kenijkatsa nelnelia inelij (2 Corintios 13:5).
¿TLAKE UELISKIA TIJCHIUAS?
Tlaj tijchiuas tlen tlatsintla kiijtoua, motatauaj motemachisej ipan ta o nojua tlauel motemachisej ipan ta.
Xikijto tlen nelnelia panok. Tlaj tiistlakatis, sekinok amo motemachisej ipan ta. Uan tlaj tikijtos kenijkatsa timokuapolok, sekinok kena motemachisej ipan ta.
“Amo ouij tijmatis tikijtos tlen nelnelia panok kema amo tleno mitschiuilisej, uan tlaj tikijtos tlen melauak maske ueliskia mitsajuasej, ya nopa kichiuas sekinok ma motemachikaj ipan ta” (Caiman).
TLEN BIBLIA TETLAJTOLMAKA: “Tijmatij ipan toyolo para tinemij xitlauak iixpa [toTeotsij] uan keja nopa tijnekiskiaj tijchiuasej nochipa” (Hebreos 13:18).
Xijchiua tlen mitsiljuiaj. Kema ipan Estados Unidos kintlatsintokilijkej maseualmej katli temakaj tekitl, 78% tlen inijuantij kiijtojkej kema se akajya eli temachtli “eli se tlen nopa eyi tlamantli tlen kiitaj kema kitlapejpeniaj ajkia kitekimakasej”. Tlaj nama tijchiua nochi tlen mitsiljuiaj, mitspaleuis teipa.
“Notatauaj kiitaj kema nima nijchiua se tlamantli uan amo pampa nechchiualtiaj. Kema kiampa nijchiua, inijuantij nojua tlauel motemachiaj ipan na” (Sarah).
TLEN BIBLIA TETLAJTOLMAKA: “Kuali nijmati tijchiuas tlen nimitsiljuia. Kena, nelia nijmati onpano tijchiuas nochi tlen nimitstlajtlania” (Filemón 21).
Ximochia. Nima nesi kema se akajya motelpokachiua pampa mopatla itlakayo, uan kema se akajya tlalnamiki amo nima uelis tikitas pampa moneki panos miak tonali.
“Maske motatauaj uan sekinok maseualmej amo nima motemachisej ipan ta, tlaj nochipa tijchiuas tlen mitsiljuiaj, mitspaleuis nojua ma motemachijtiakaj ipan ta” (Brandon).
TLEN BIBLIA TETLAJTOLMAKA: “Xijpiakaj inmoyolo ika nochimej” (Colosenses 3:12).
