Jehová itlajtoltemakauaj tlamachtiaj uan tlapaleuiaj ipan kipano 200 uejueyi altepemej uan pilaltepetsitsij. Maske kiampa kichiuaj, san ipan 35 altepemej toikniuaj uelij tlapaleuiaj ika tomij uan kiampa uelij kipiaj tlen ika mopanoltisej. Uajka, ¿kenijkatsa kichiuaj nopa sekinok altepemej kampa amo kipiaj miak tomij?

 Katli kinyakanaj Jehová itlajtoltemakauaj kiitaj tlake moneki nojua kichiuasej nochi toikniuaj uan kenijkatsa uelis kinpaleuisej nojua kuali ma tlaneltokatokaj. Yeka, kuali kitekiuiaj tomij tlen temakaj toikniuaj ika nochi ininyolo. Tlaj ipan se kali Betel kiseliaj achi miak tomij, uajka kititlanij ipan seyok kali Betel kampa kinpoloua. Toikniuaj kichiuaj kej kichiuayayaj Cristo itokilijkauaj katli itstoyaj ipan achtoui siglo. Kema inijuantij kiseliyayaj achi miak tlapaleuili, kinmakayayaj sekinok katli kinpolouayaya, kiampa nochi kipixtoyaj tlen ika mopanoltisej (2 Corintios 8:14).

 ¿Kenijkatsa kiyolmatij toikniuaj kema kiseliaj tlen kititlanij sekinok kali Betel? Ipan Tanzania, maseualmej mojmostla san mopanoltiaj ika 2 dólares, yeka nopa tomij tlen kititlankej sekinok kali Betel kitekiuijkej kema kikualchijchijkej nopa kali kampa mosentilia toikniuaj tlen Mafinga. Toikniuaj katli itstokej ipan nopa tlanechikoli kiijtojkej: “Nama nojua tlauel miakej mosentiliaj pampa kikualchijchijkej kampa timosentiliaj. Tlauel tikintlaskamatiliaj toTeotsij itlanechikol uan nochi toikniuaj pampa tlauel techpaleuijkej. Nama tijpixtokej se yejyektsi kali kampa tijueyichiuaj Jehová”.

 Miakej toikniuaj tlen Sri Lanka amo kipiaj tlen kikuasej pampa onka ni ueyi kokolistli COVID-19. Se tlen inijuantij eli tosiuaikni Imara Fernando uan iokichpil Enosh. Maske amo kipiayayaj tlen kikuasej, toikniuaj tlen sekinok altepemej kinpaleuijkej. Yeka, inijuantij kintlajkuiljuilijkej nochi toikniuaj: “Tlauel tikintlaskamatiliaj toikniuaj pampa kinextijkej tlauel techikneliaj ipan ni tonali kema tikixnamikij tlaouijkayotl. Tlauel tiyolpakij pampa tikinpiaj miakej toikniuaj katli elij kej tochampoyouaj. Yeka, tikiljuiaj Jehová nojua ma kinpaleuijtok ipan ni itlamia tonali”.

 Maske toikniuaj kampa ueli itstokej, tlauel kinpaktia temakasej tlen kipiaj. Enosh kichijki se pilkuakajontsi kampa kitlalia tomij tlen ika kinpaleuis sekinok toikniuaj katli amo kipiaj tlen ika mopanoltisej. Tosiuaikni Guadalupe Álvarez nojkia kipaktia temakas tlen kipia. Ya itstok México kampa amo kipiaj miak tlen ika mopanoltisej, uan san se keskij kipiaj se tekitl kampa amo miak kintlaxtlauiaj. Maske amo kipia miak tomij, ya kichiua kampeka tlapaleuis. Guadalupe kiijtoua: “Tlauel nijtlaskamatilia Jehová pampa tlauel techiknelia. Maske amo nitemaka miak tomij kej sekinok, uelis nikinpaleuis toikniuaj katli amo kipiaj tlen ika mopanoltisej”.

 Toikniuaj tlen sekinok kali Betel tlauel yolpakij pampa kinpaleuiaj sekinok kali Betel. Anthony Carvalho, se tlen Katli kiyakanaj Betel tlen Brasil, kiijtoua: “Miak xiuitl sekinok kali Betel techpaleuijkej ika tomij, yeka uelki nojua tlauel titlajtolmoyauaj. Nama ayokmo tiitstokej kej achtouia, yeka tiuelij tikinpaleuiaj sekinok toikniuaj. Toikniuaj kinpaleuiaj sekinok nojkia ma kimatikaj tlen toTeotsij, uan nopa kichiuaj pampa elij Cristo itokilijkauaj”.

 ¿Kenijkatsa Jehová itlajtoltemakauaj kinpaleuiaj sekinok toikniuaj katli kiixnamikij tlaouijkayotl? Kema kitlaliaj tomij kampa kiijtoua kititlanisej kali Betel uan amo kititlanij ipan sekinok kali Betel tlen sekinok altepemej. Kema tiauij ipan tlanechikoli uelis tijtlalisej tomij ipan pilkuakajontsitsij kampa kiijtoua “Obra mundial” o ipan Internet kampa kiijtoua donate.dan124.com. Nochi nopa tomij tlen intemakaj tlauel tlapaleuia.