Nopa pilamochtsi The Watch Tower (La Torre del Vigía) tlen kiski ipan junio 1, 1912, kiijtouayaya: “Uelis miakej katli kipouaj ni pilamochtsi kinixmatij maseualmej katli amo tlachiaj”. Ni pilamochtsi nojkia kiijtouayaya onkayaya amatlajkuiloli katli ueliskia kitekiuisej katli amo uelij tlachiaj, uan amo monekiyaya kiixtlauasej. Nojkia kiijtouayaya: “Kema mochijchiua nopa amatlajkuiloli tlen kitekiuisej katli amo tlachiaj kipia puntitos tlen pajpankisa, uan kiampa ika ininmax uelis kipouasej. Miakej katli amo tlachiaj tlauel kipatiitaj nopa kuali tlamachtili pampa kimatij nechka moaxitis miak tlamantli tlen kuali ipan Tlaltipaktli”.

 Kema moijkuilok ni, Jehová itlajtoltemakauaj ya kichijchiuayayaj amatlajkuiloli “ika puntitos” tlen ueliskia kipouasej katli amo tlachiaj maske ipan tlajtoli inglés nojua ayamo eltoya tlajkuiloli ika braille tlen nama motekiuia. Ipan ni tonali nojua mochijchiua amatlajkuiloli tlen uelis kinpaleuis katli amo tlachiaj. Uan motlajtolkuepa ipan kipano 50 tlajtoli. ¿Kenijkatsa mochijchiua?

 Achtoui moneki tikijkuilosej nopa puntitos ipan se amatlajkuiloli ika braille. Michael Millen, katli tlapaleuia Kampa kiitaj tlake tlajkuiloli motekiuis ipan Patterson (Nueva York), kiijtoua: “Achtouia kema titlajkuilouayayaj ika braille tijtekiuiyayaj programas tlen maseualmej momajtokej kitekiuiaj. Maske tijtekiuijkej nopa, amo ueliyaya titlajkuilouaj ika braille ipan sekinok tlajtoli. Nama tijtekiuiaj nopa programa Watchtower Translation System, uan nopa techpaleuia ma titlajkuilokaj ika braille ipan miak tlajtoli. ¡Amo onka seyok tlamantli kej ni!”.

 Ipan amatlajkuiloli tlen mochijchiua ika braille nojkia kiijkuilouaj tlen nesi ipan tlaixkopinkayomej uan amo san kiijkuilouaj tlen kiijtoua nopa amatlajkuiloli. Se neskayotl, ika braille kiampa moixtoma nopa tlaixkopinkayotl tlen nesi ipan ipantsajka nopa amochtli Nochipa xiitsto: “Se tlakatl nejnemi ipan se ojtli kampa onka miak xochitl, tepetl uan tlamimiltipa”. Jamshed, katli amo tlachia uan tlatekipanoua kej tlapaleuijketl uan precursor, kiijtoua: “Na tlauel nijpatiita tlen moijkuiloua kampa nesi tlaixkopinkayomej”.

 Kema tlami kiijkuilouaj se amatlajkuiloli ika braille, kititlanij ipan sekinok kali Betel kampa nojkia kichijchiuaj amatlajkuiloli. Uan motekiuia seyok amatl tlen amo tsayani kema moijkuiloua ika braille yon amo kenijki eli maske miakpa kitekiuiaj nopa amatlajkuiloli. Achtoui kuali kitejtekpichouaj iamayo uan kichijchiuaj kej se cuaderno. Teipa kititlanij ipan tlanechikoli ika sekinok amatlajkuiloli, o tlaj kampa itstok se akajya katli amo tlachia onka se correo kampa amo kininamaj katli amo tlachiaj, uajka nopaya kititlaniliaj. Nojkia tlaj toikniuaj katli amo tlachiaj o amo nelkuali tlachiaj moneki nima kiselisej nopa amatlajkuiloli tlen motekiuis ipan tlanechikoli, uajka kali Betel nima kintitlanilia.

 Kema mochiua nochi ni tlamantli, motekiuia miak tomij uan tonali. Ipan Wallkill (Nueva York), kampa mochijchiua amatlajkuiloli, uejkauaj kichijchiuaj ome Biblias ika braille sanse kej kema kichijchiuaj 50 mil Biblias tlen amo eli ika braille. Nojkia, nopa Biblia ika braille grado 2 ika inglés, kipia 25 volúmenes. a Motekiuia tlauel miak tomij kema mochijchiua se Biblia kej ni, uan amo kej kema mochijchiua se Biblia tlen amo eli ika braille. San ipantsajka se Biblia tlen motekiuia ipan nopa 25 volúmenes ipati nechka 150 dólares.

 ¿Kenijkatsa kiyolmatij katli tlapaleuiaj kema kichijchiuaj nopa amatlajkuiloli? Nadia, katli tlatekipanoua ipan kali Betel tlen Sudáfrica, kiijtoua: “Toikniuaj katli amo tlachiaj o amo nelkuali tlachiaj, ouij kej itstokej. Yeka tlauel niyolpaki nijchiuas nopa tekitl. Uan nimotemachia Jehová tlauel kiniknelia”.

 Tlaj se akajya katli amo tlachia amo ueli kipoua braille, ¿tlake uelis kichiuas? Kipia se keski xiuitl, kikixtijkej se pilamochtsi tlen itoka Aprenda a leer braille. Ni pilamochtsi kiski ika amatl uan ika braille. Uan kuali kichijchijtokej, kiampa uelis sansejko kitekiuisej se katli tlachia uan se katli amo. Ni amatlajkuiloli nojkia kiualika se tlamantli tlen kinpaleuia ma kiijkuilouaj braille uan nojkia kejuak se uitsmalotl. Se akajya katli kineki kiyekos braille uelis kitekiuis ni tlamantli uan kiampa tlajkuilos. Kiampa nima kiilnamikis kenijkatsa moijkuiloua sejse letra uan ika imakpil nima kimatis tlake tlajkuiloli eli.

 ¿Kenijkatsa kinpaleuia amatlajkuiloli ika braille toikniuaj katli amo uelij tlachiaj o katli ayokmo kuali tlachiaj? Ma tikitakaj tlen kipanok Ernst, katli eua Haití. Maske ya nojkia yauiyaya tlanechikoli, amo kipiayaya amatlajkuiloli ika braille. Yeka, kichiuayaya kampeka kitsontekontlalis tlen kiijtoskia kema panoyaya tlaixpa o kema kinekiyaya tlanankilis. Ya kiijtoua: “Nama ayokmo kiampa nechpano. Ueli nimomatlanana uan nitlanankilia kema na nijneki. Nijmati nechikneliaj ipan tlanechikoli. Nama nochi timomachtiaj sanse tlamantli”.

 Jan eli se ueuejtlakatl katli eua Austria uan amo kuali tlachia. Maske kiampa kipano, ya kiyakana tlamachtili Tlen Tematiltia uan Kampa techmachtiaj ika Biblia. Ya kiijtok: “Nopa amatlajkuiloli ika braille tlen kichijchijtokej Jehová itlajtoltemakauaj, nima nijkuamachilia pampa kipia números, nima nijpantia notas uan kiijtoua tlen nesi kampa eltok tlaixkopinkayomej”.

 Ipan Corea del Sur, itstok se precursora katli itoka Seon-ok. Ya amo tlachia uan nojkia amo tlakaki. Achtouia kema yauiyaya ipan tlanechikoli monekiyaya se akajya ma kiitskili imax uan ma kimakpilojolini uan kiampa kimatiyaya tlen moixtomayaya ipan tlanechikoli. Uan nama ya iselti ueli kipoua nopa amatlajkuiloli ika braille. Ya kiijtoua: “Tlauel ouij tijmatis tijpouas sekinok amatlajkuiloli pampa kemantika kipoloua nopa puntitos, chikotik kiijkuilojtokej uan tlauel kanaktsi nopa amatl. Uan tlen kichijchiuaj Jehová itlajtoltemakauaj amo ouij nijpoua pampa kitekiuiaj seyok amatl uan pajpankisa nopa puntitos. Achtouia ueliyaya nijpoua amatlajkuiloli tlaj se akajya nechpaleuiyaya, uan nama noselti ueli nimomachtia. Tlauel nechpaktia nimokualchijchiuas uan nitlanankilis ipan tlanechikoli. Nijpoua nochi amatlajkuiloli tlen nijselia ika braille. ¡Tlauel nechpaktia!”.

 Nopa amatlajkuiloli ika braille, nojkia kiijtoua: “Ni amatl amo monamaka. Ni tlen momoyaua ipan nochi Tlaltipaktli katli tepaleuia ma kikuamachilikaj Biblia, mochiua ika tomij tlen maseualmej temakaj ika nochi ininyolo”. Tlauel tiinmechtlaskamatiliaj pampa intemakaj inmotomij tlen motekiuia ipan toTeotsij itlanechikol uan nojkia inkichiuaj kej nesi ipan donate.dan124.com. Kiampa nochi uelis kiselisej amatlajkuiloli uan nojkia katli amo tlachiaj o amo kuali tlachiaj. ¡Nelnelia tlauel tiinmechtlaskamatiliaj pampa intemakaj inmotomij ika nochi inmoyolo!