Ipan xiuitl 2020 onkak miak tlamantli tlen kintlasojsoljuilik toikniuaj uan nojkia pejki kokolistli COVID-19. ¿Tlake kichijkej toikniuaj uan kiampa kinpaleuijkej katli kintlasojsoljuilik se tlenijki?

 Ipan xiuitl 2020, a Katli kinyakanaj tlen kichiuaj sekinok comités tlen Katli kinyakanaj Jehová itlajtoltemakauaj, kiijtojkej ueliskiaj kitekiuisej 28 millones de dólares b uan kiampa kinpaleuiskiaj toikniuaj. Ika ni tomij uelkej kinpaleuiaj toikniuaj katli kintlasojsoljuilik se tlenijki. Kiijtouaj onkak se 200 tlamantli tlen kintlasojsoljuilik, kej kokolistli COVID-19, tlauel chikauak uetski atl ipan África, chikauak tlaajakak, toikniuaj tlen Venezuela amo kipixtoyaj tlen kikuasej uan tlauel tlauajki ipan Zimbabue. Nopa tomij tlen sekinok temakaj ika nochi ininyolo motekiuik kema kikojkej atl, tlakualistli, kampa mokauasej toikniuaj, yoyomitl uan tlen ika mopajtisej. Nojkia kikojkej tlen ika tlapojpouaj, tepostli tlen ika kikualchijchijkej se keski kali uan sekinok tlamantli. Ma tikitakaj kenijkatsa tepaleuijtokej toikniuaj.

 COVID-19. Ipan nochi Tlaltipaktli momoyajtok ni kokolistli, yeka toikniuaj mokokouaj, amo kuali kiyolmatij uan amo kipiaj tlen moneki. Kema toikniuaj kiitaj tlen kinpano sekinok, nima kiniljuiaj Katli kinyakanaj tlen kichiuaj sekinok comités, kiampa nima kinpaleuiaj toikniuaj.

 Ipan nopa xiuitl, Katli tlapaleuiaj kema se tlenijki tetlasojsoljuilia kinpaleuijkej sekinok ma kipiakaj tlen kikuasej, tlen kiisej, tlen ika mopajtisej uan sekinok tlamantli. Ipan se keski altepemej ueuejtlakamej kinpaleuijkej toikniuaj nojkia ma kiselikaj tlen tekichiuanij temakayayaj.

 Maseualmej kiitaj nochi tlen tijchiuaj kema tikinpaleuiaj toikniuaj. Se neskayotl, Field Simwingat, katli kinyakana policías tlen Nakonde (Zambia), kiniljuik toikniuaj: “Tlauel tiinmechtlaskamatiliaj pampa nima inkinpaleuijkej katli tlaijiyouiaj”.

 Amo onka miak tlakualistli ipan Angola. Kema pejki COVID-19 amo onkayaya miak tlakualistli ipan nopa altepetl, yeka tlauel patiyo kinamakayayaj se keski tlamantli. Toikniuaj tlauel ouij kimatkej kikouasej tlen kikuasej.

 Yeka, kali Betel tlen Brasil kinpaleuik toikniuaj tlen Angola uan kintitlanilik se keski tlamantli tlen kikuaskiaj. Amo kinekiyayaj san kej ueli kitekiuisej tomij, yeka toikniuaj kiitakej kenijkatsa kikouaskiaj uan kititlaniskiaj tlakualistli. Toikniuaj kikojkej tlakualistli ika imiaka. Kiampa san motekiuik se 22 dólares kema tlakojkej uan kema kititlankej nopa tlakualistli. Sejse koxtali ietika eliyaya 20 kilos uan kipixtoya arroz, etl uan aceite. Ipan ni tonali kititlantokej 33,544 koxtaltsitsij, se 654 toneladas. Nochi tlen kititlankej uan tlen kipixtoyaj toikniuaj, kinpaleuik se 50,000 maseualmej.

 ¿Kenijkatsa kiyolmatij toikniuaj? Alexandre, katli itstok ipan se pilaltepetsi tlen Angola, kiijtoua: “Nikita Jehová tlauel nechiknelia, amo niitstok noselti uan tlauel nechpatiitaj toikniuaj”. Mariza, se tosiuaikni katli iselti kiniskaltia ikoneuaj, kiijtoua: “Jehová nechtlakakilik. Yeka, tlauel nijtlaskamatilia uan nojkia toikniuaj”.

 Tlauel tlauajki ipan Zimbabue. Ipan xiuitl 2020 tlauel tlauajki ipan Zimbabue, yeka tlauel miakej maseualmej nechka mayankamikij. Uan miakej toikniuaj nojkia amo kipixtoyaj tlen kikuasej.

 Yeka, makuiltij pamitl tlen Katli tlapaleuiaj kema se tlenijki tetlasojsoljuilia kinpaleuijkej toikniuaj ika tlakualistli. Miakej toikniuaj tlapaleuijkej kema kinechikojkej uan kema kitlejkoltijkej tlakualistli ipan carros. c Ipan xiuitl 2020, kitekiuijkej 691,561 dólares kema kinmakakej tlakualistli kipano 22,700 maseualmej.

 Ipan se keski altepemej toikniuaj ayokmo kipixtoyaj tlen kikuasej. Yeka, kema toikniuaj kinmakakej se keski tlamantli, kitlaskamatilijkej Jehová uan sekinok kiueyichijkej ika uikatl.

 Ipan se altepetl, omej tosiuaikniuaj katli ayokmo kipixtoyaj ininueue, yajkej kampa mosentilijkej miakej maseualmej tlen ininaltepe pampa kiijtojkej se keski maseualmej tlen nopa ONG (organización no gubernamental) kinpaleuiskiaj ika se keski tlamantli. Kema asitoj kampa mosentilijtoyaj pejkej kamanaltij tlen política, uan kiijtojkej tlaj kichiuaskiaj se keski tlamantli kinmakaskiaj tlen ika mopanoltisej, yeka tosiuaikniuaj kiijtojkej amo kiseliskiaj. Kema kistejkej pejkej kintlaijiljuiaj uan kiniljuijkej: “Teipa amo xiualakaj xitechtlajtlanilikij tlakualistli”. Kema panok ome semanas toikniuaj asitoj kampa itstoyaj tosiuaikniuaj uan kinmakakej tlakualistli. Toikniuaj nima kinmakatoj tlen ika mopanoltiskiaj, uan amo kej nopa ONG.

 Kema toikniuaj temakakej tlen moneki ipan Zimbabue, maseualmej kuali kamanaltikej tlen Jehová itlanechikol. Ma tikitakaj tlen kipanok Prisca, katli itstok ipan se pilaltepetsi. Maske kipixtoya miak kuesoli pampa tlauel tlauajki, Prisca nochipa tlajtolmoyauayaya miércoles uan viernes, maske ipan nopa tonali monekiyaya tlapoxonisej. Maseualmej kipinajtiyayaj uan kiiljuiyayaj: “¡Tikinmayankamiktis mochampoyouaj pampa titlajtolmoyajtinemi!”. Uajka Prisca kinnankilik: “Jehová amo kema kintlauelkaua itekipanojkauaj”. Kema panok se keski tonali, toikniuaj kiuikilijkej tlakualistli. Sekij ikalnechkauaj tlauel mosentlachilijkej uan kiiljuijkej: “ToTeotsij amo kema mitstlauelkajtok. Yeka, nojua tijnekij tijmatisej tlen ya”. Nama chikomej ikalnechkauaj kikakij tlanechikoli ipan radio.

 Tiitstokej ipan itlamia tonali, yeka nojua moneki tikijiyouisej se tlenijki tlen techtlasojsoljuilia (Mat 24:3, 7). Tlauel tijtlaskamatij pampa intemakaj tlen inkipiaj uan nojkia pampa intemakaj tomij ika nochi inmoyolo ipan donate.dan124.com. Ika nopa tomij nojua uelis tikinpaleuisej toikniuaj katli tlaijiyouiaj.