¿Tlake techpaleuis amo tlauel timotekipachosej?
Tlaj nochipa timotekipachojtosej uelis kichiuas ma timokokokaj uan ayokmo ma tiyolpakikaj. Nojkia, uelis kichiuas nojua tlauel ma timotekipachokaj.
Tlen techpaleuis amo tlauel timotekipachojtosej
Amo san xijpojto yon xijtlakakilijto noticias. Amo moneki tijmatisej nochi tlen pano. ¿Kenke? Pampa tlaj nochipa tijtlakakilijtosej tlen pano uelis techmajmatis uan nopa kichiuas nojua tlauel ma timotekipachokaj.
Tlen Biblia kiijtoua: “Kema se tlakatl moyolkuesoua kitlamiltia ichikaualis” (Proverbios 17:22).
“Tlaj tikitaj o tijkakij se kentsi tlen kiijtouaj ipan noticias, teipa uelis tijnekisej tijmatisej nochi tlen panotok. Uan ni amo techpaleuis. Kema amo tlauel nikita noticias, amo tlauel nimotekipachoua” (John).
Ximoiljui ni: ¿Nochipa moneki tikitas noticias uan kiampa tijmatis nochi tlen panotok?
Xijchiua ni: Xikijkuilo nochi tlen moneki tijchiuas, kej: tlake hora moneki timeuas, titlakuas, tijchiuas moteki o tias tikochiti. Tlaj kiampa tijchiuas, mitspaleuis kuali tiitstos uan amo tlauel timotekipachos.
Tlen Biblia kiijtoua: “Aki achtoui moiljuia ika miak cuidado kejatsa kichiuas se tlamantli kipantis para kisas kuali iteki” (Proverbios 21:5).
“Kema pejki momoyaua COVID-19, ayokmo nijchijki kej achtouia uan san nimotonalpolouayaya ika tlamantli tlen amo nechpaleuiyaya. Nijnekiyaya kuali nijtekiuis tonali, yeka nikijkuilok tlen monekiyaya nijchiuas mojmostla” (Joseph).
Ximoiljui ni: ¿Tikijkuilojtok tlen tijchiua mojmostla? Kema tlami sejse tonal, ¿tikitstok nelia mitspaleuijtok tlen tikijkuilok?
Ximoiljui tlen mitspaleuis: Tlaj san timoiljuijtok ipan tlen ueltoskia tijchiua o ipan tlamantli tlen amo kuali tlen teipa panos, kichiuas nojua tlauel ximotekipacho. Yeka, xikilnamiki tlamantli san tlen kuali mitspanotok uan xijtlaskamati.
Tlen Biblia kiijtoua: “Uan nochipa ximotlaskamatikaj” (Colosenses 3:15).
“Kema nijpoua Biblia amo nimoiljuia ipan tlamantli tlen amo kuali tlen pano ipan noticias, san nimoiljuia ipan tlen nechpaleuis. Tlauel nechpaleuijtok kema kiampa nijchiua” (Lisa).
Ximoiljui ni: ¿Nochipa san timoiljuijtok ipan tlamantli tlen amo kuali tlen mitspanotok uan yeka tikilkaua tlen nelnelia ipati?
Ximoiljui ipan tlen kinpaleuis sekinok: Maske uelis kema timotekipachojtos tijnekis tiitstos moselti, xijchiua kampeka timoiljuis kenijkatsa tikinpaleuis sekinok.
Tlen Biblia kiijtoua: “Amo san ximoiljuikaj tlen tlamantli tlen inmechpaleuis. Nojkia ximoiljuikaj tlen kinpaleuis sekinok” (Filipenses 2:4).
“Tiyolpakis kema tikinpaleuis sekinok. Nopa kichiua kuali ma kiyolmatikaj katli tikinpaleuia uan ta amo tlauel timotekipachojtos. Yeka, amo san timoiljuijtos ipan tlen mitstekipachoua” (María).
Ximoiljui ni: ¿Tikixmati se akajya katli ueliskia tijpaleuis? ¿Kenijkatsa ueliskia tijchiuas?
Xijmokuitlaui motlakayo: Xijkua tlen mitspaleuis, xijchiua ejercicio uan xijchiua kampeka kuali tikochis. Tlaj kiampa tijchiuas, tiyolpakis maske tikixnamikis tlaouijkayotl uan amo tlauel timotekipachos.
Tlen Biblia kiijtoua: “Intla tijkualchijchiuas motlakayo, kualtitok” (1 Timoteo 4:8).
“Nokone uan na amo ueli tikisaj tijchiuaj ejercicio kej tijnekiskiaj, yeka tijchiuaj kalijtik. Nopa techpaleuijtok kuali ma tiitstokaj uan nojkia techpaleuijtok kuali ma timouikakaj” (Catherine).
Ximoiljui ni: ¿Nelnelia uelis mitspaleuis tlaj kuali titlakuas uan tijchiuas ejercicio tlaj tijneki kuali tiitstos?
Miakej kichijtokej tlen nikaj kiijtoua, nopa kinpaleuijtok amo tlauel ma motekipachokaj ika se keski tlamantli. ¿Uan tlake nojkia kinpaleuijtok? Inijuantij kimatij uan motemachiaj nelia moaxitis tlen Biblia kiijtoua panos teipa. Xijpoua tlamachtili “¿Tlake kichiuas toTeotsij iTlanauatijkayo?”.
