Tlen Biblia kiijtoua

 Kema se akajya moatsonpoliuiltia moneki nochi itlakayo kalakis ipan atl. a Biblia kiijtoua miakej maseualmej moatsonpoliuiltijkej (Hechos 2:41). Kiijtoua kema Jesús moatsonpoliuiltik, kalajki nochi itlakayo ipan ueyatl Jordán (Mateo 3:13, 16). Teipa, se tlakatl katli eua Etiopía moatsonpoliuiltik “kampa mantoya atl” inakastla nopa ojtli kampa yauiyaya (Hechos 8:36-40).

 Jesús kiijtok itokilijkauaj moneki moatsonpoliuiltisej (Mateo 28:19, 20). Uan apóstol Pedro nojkia kiampa kiijtok (1 Pedro 3:21).

Ipan ni tlamachtili tikitasej:

•  ¿Tlake kiijtosneki timoatsonpoliuiltis?

•  ¿Tlake kiijtoua Biblia kema kikuaaltiaj o kiteochiuaj se pilkonetsi?

•  ¿Tlake kiijtosneki kema se akajya moatsonpoliuiltia ika itoka toTata, ika iKone uan ika ichikaualis Dios?

•  ¿Eli se tlajtlakoli tlaj se akajya ika ompa moatsonpoliuiltia?

•  Biblia kiijtoua sekinok moatsonpoliuiltijkej

•  Tlen sekinok kineltokaj kema se Cristo itokilijka moatsonpoliuiltia

 Ipan Biblia amo uala nopa tlajtoli “kikuaaltiaj” o “kiteochiuaj” b. Uan amo kiijtoua moneki moatsonpoliuiltisej pilkonetsitsij.

 Biblia amo kiijtoua moneki kinkuaaltisej pilkonetsitsij. Nopaya kiijtoua katli kineki moatsonpoliuiltis moneki kichiuas se keski tlamantli, kej kikuamachilis tlamachtili tlen tlauel ipati tlen uala ipan Biblia uan kichiuas ipan inemilis. Moneki moyolkuepas tlen itlajtlakoljuaj uan ipan se tlamaijtoli kimaktilis inemilis toTeotsij (Hechos 2:38, 41; 8:12). Pilkonetsitsij amo uelij kichiuaj ni tlamantli.

 ¿Tlake kiijtosneki kema se akajya moatsonpoliuiltia ika itoka toTata, ika iKone uan ika ichikaualis Dios?

 Jesús kiniljuik itokilijkauaj: “Xiakaj uan xikinmachtikaj maseualmej [...]. Xikinatsonpoliuiltikaj ika itoka toTata, ika iKone uan ika ichikaualis Dios” (Mateo 28:19, 20). “Ika itoka” kiijtosneki katli moatsonpoliuiltia, kimati Jehová kipia nochi tlanauatili, kitekimakatok iKone uan kimati tlake eli ichikaualis Dios. Se neskayotl, apóstol Pedro kiiljuik se tlakatl katli amo ueliyaya nejnemi: “Ika itoka Jesucristo tlen Nazaret, ximoketsa uan xinejnemi” (Hechos 3:6). Ika tlen kiijtok Pedro kinextik kimatiyaya Jesús kipia tlanauatili, uan kichikauaskia nopa tlakatl.

•   “ToTata”, kineki kiijtos toTeotsij Jehová c. Ya kichijchijki nochi tlen onka, temaka nemilistli uan kipia nochi chikaualistli uan tlanauatili (Génesis 17:1; Apocalipsis 4:11).

•   “IKone” eli Jesucristo, katli temaktilik inemilis para techmakixtis (Romanos 6:23). Uelis timomanauisej tlaj tijkuamachiliaj ya eli katli toTeotsij kitlapejpenijtok para kichiuas tlen mosentlalijtok (Juan 14:6; 20:31; Hechos 4:8-12).

•   “Ichikaualis Dios” eli tlen ika toTeotsij kichiua nochi tlamantli. d ToTeotsij kitekiuik ichikaualis para kichijchiuas nochi, kichijki ma tiitstokaj, kiniljuik iteokamanalojkauaj tlen monekiyaya tematiltisej uan kinmachtik para kichiuasej tlen ya kipaktia (Génesis 1:2; Job 33:4; Romanos 15:18, 19). Ika ichikaualis, toTeotsij kinyakanki katli kiijkuilojkej Biblia uan kiampa kitlalijkej tlen ya moiljuia (2 Pedro 1:21).

 ¿Eli se tlajtlakoli tlaj se akajya ika ompa moatsonpoliuiltia?

 Miakej maseualmej kipatlaj ininreligión. Pero tlaj mokuaaltijkej ipan nopa religión kampa achtouia itstoyaj, ¿eliskia se tlajtlakoli tlaj sampa moatsonpoliuiltiskiaj? Sekij uelis kiijtoskiaj kena, pampa kiilnamikij tlen kiijtoua Efesios 4:5, TNM. Nopaya kiijtoua: “Itstok setsi toTeko, onka setsi tlaneltokilistli, setsi atsonpoliuilistli”. Pero ni versículo amo kiijtosneki se akajya amo uelis sampa moatsonpoliuiltis. ¿Kenke kiampa tikijtouaj?

 Tlen achtoui kiijtoua. Ipan Efesios 4:5 Pablo kinejki kiijtos katli kitekipanouaj toTeotsij moneki sansejko itstosej uan kineltokasej sanse tlamantli tlen Biblia tlamachtia (Efesios 4:1-3, 16). Uelis kiampa itstosej tlaj kitokilisej toTeko Jesucristo; tlaj kineltokaj uan kikuamachiliaj sanse tlamantli tlen Biblia tlamachtia; uan kichiuaj tlen Biblia kiijtoua kema moatsonpoliuiltiaj.

 Apóstol Pablo kiniljuik se keskij katli ya moatsonpoliuiltijtoyaj sampa ma moatsonpoliuiltikaj. Kiampa kiniljuik pampa amo kikuamachilijtoyaj tlen Biblia tlamachtia maske ya moatsonpoliuiltijtoyaj (Hechos 19:1-5).

 Kej kinamiki mochiuas kema se akajya moatsonpoliuiltia. Tlaj se akajya kineki toTeotsij kuali ma kiita kema moatsonpoliuiltia, moneki kuali kikuamachilis tlen Biblia tlamachtia (1 Timoteo 2:3, 4). Kema se akajya moatsonpoliuiltia kej kichiuaj religiones katli amo moyakanaj ika tlen Biblia tlamachtia, toTeotsij amo kiselia nopa maseuali (Juan 4:23, 24). Maske moatsonpoliuiltik ika nochi iyolo, axkimati tlen Jehová “kineki ma kichiuakaj” (Romanos 10:2). Tlaj kineki toTeotsij ma kiseli, moneki momachtis Biblia, kichiuas ipan inemilis tlen kiyekos, motemaktilis ika Dios uan sampa moatsonpoliuiltis. Kema kiampa kichiua se akajya, amo eli se tlajtlakoli pampa kiampa kinamiki mochiuas.

 Biblia kiijtoua sekinok moatsonpoliuiltijkej

 Biblia kiijtoua se keskij moatsonpoliuiltijkej pero amo kiijtosnekiyaya sanse tlamantli kej kema moatsonpoliuiltiyayaj Cristo itokilijkauaj. Ma tikitakaj se keski neskayotl.

 Kema Juan teatsonpoliuiltik. e Juan kinatsonpoliuiltik judíos uan katli amo eliyayaj judíos pampa kiampa kinextiyayaj moyolkueptoyaj tlen inintlajtlakoljuaj kema kiixpanokej nopa Tlanauatili tlen Jehová kinmakatoya israeleuanij ika Moisés. Kema Juan kinatsonpoliuiltik maseualmej, kinpaleuik ma kiixmatikaj uan ma kiselikaj Jesús katli eliskia nopa Mesías (Lucas 1:13-17; 3:2, 3; Hechos 19:4).

 Kema Jesús moatsonpoliuiltik. Kema kiatsonpoliuiltijkej Jesús elki tlauel ipati. Ya amo kipiayaya tlajtlakoli yon tlaixpanotoya (1 Pedro 2:21, 22). Uajka kema Jesús moatsonpoliuiltik amo eliyaya pampa kinekiyaya moyolkuepas uan ‘kitlajtlanis Toteko ma kiyolpajpaka’ (1 Pedro 3:21). Ika tlen kichijki kinextik kinekiyaya kichiuas tlen Jehová kinauatijtoya kema kitekimakak kej Mesías o Cristo. Uan monekiyaya temaktilis inemilis topampa (Hebreos 10:7-10).

 Kinatsonpoliuiltiaj ika ichikaualis Dios. Juan katli teatsonpoliuiltiyaya uan Jesús, kiijtojkej sekij kinatsonpoliuiltiskiaj ika ichikaualis Dios (Mateo 3:11; Lucas 3:16; Hechos 1:1-5). Kiijtojkej kema se akajya moatsonpoliuiltia amo eli sanse kej kema se akajya kiatsonpoliuiltiaj ipan itoka ichikaualis Dios (Mateo 28:19). ¿Kenke kiampa tikijtouaj?

 San se keskij Cristo itokilijkauaj kinatsonpoliuiltijkej ika ichikaualis Dios. Inijuantij kintlapejpenijkej ika ichikaualis Dios para yasej iluikak, elisej sacerdotes uan tlanauatisej iuaya Jesús ipan Tlaltipaktli f (1 Pedro 1:3, 4; Apocalipsis 5:9, 10). Kinnauatisej miakej Cristo itokilijkauaj katli kiselisej nemilistli tlen axkema tlamis ipan Xochimili (Mateo 5:5; Lucas 23:43).

 Kema kiatsonpoliuiltijkej Jesús uan kema mijki. Katli kinatsonpoliuiltiaj ika ichikaualis Dios, nojkia kinatsonpoliuiltiaj ipan “Cristo Jesús” (Romanos 6:3). Uajka, ni tlamantli san kichiuaj katli kintlapejpenijtokej yasej iluikak uan tekichiuasej iuaya Jesús. Kema kinatsonpoliuiltiaj ipan Jesús, nojkia kinextiaj itstosej ipan nopa tlanechikoli tlen Jesús kitlapejpenik. Ya eli kejuak inintsonteko, uan inijuantij elij kejuak itlakayo (1 Corintios 12:12, 13, 27; Colosenses 1:18).

 Katli kintlapejpenijkej yasej iluikak nojkia kinatsonpoliuiltijtokej ipan imikilis Jesús (Romanos 6:3, 4). Sanse kej Jesús, inijuantij mosentlalijtokej kitekipanosej toTeotsij, kineltokasej ika nochi ininnemilis uan amo mosentlalijtokej itstosej nochipa ipan Tlaltipaktli. Kitlamiaxitiaj tlen kiijtosneki moatsonpoliuiltisej ipan imikilis Jesús kema mikij uan peuaj itstokej ipan iluikak kej ángeles (Romanos 6:5; 1 Corintios 15:42-44).

 Kinatsonpoliuiltiaj ika tlitl. Juan kiniljuik katli kitlakakiliyayaj: “Pero [Jesús] inmechatsonpoliuiltis ika ichikaualis Dios uan ika tlitl. Kipixtok imako tlen ika kiajkomajkaua trigo uan kikixtilis itlasolo kampa tlayejyektiaj. Kinechikos itrigo uan kitlalis kampa kiajokui. Uan itlasolo kitlatis ika tlitl tlen amo kema seuis” (Mateo 3:11, 12). Xikilnamiki amo eli sanse kema kiatsonpoliuiltiaj se akajya ika tlitl uan kema kiatsonpoliuiltiaj ika toTeotsij ichikaualis. ¿Tlake kinekiyaya kiijtos Juan ika ni tlamantli?

 Nopa trigo kinixnextia maseualmej katli kitlakakilisej Jesús, kineltokasej uan motemachiaj kinatsonpoliuiltisej ika toTeotsij ichikaualis. Itlasolo nopa trigo kinixnextia maseualmej katli amo kitlakakiliaj Jesús. Inijuantij kinatsonpoliuiltisej ika tlitl, nopa kiijtosneki kintsontlamiltisej (Mateo 3:7-12; Lucas 3:16, 17).