¿Uelis nechyolchikauas tlen Biblia kiijtoua?
Tlen Biblia kiijtoua
Kena (Romanos 15:4). Maske miakej maseualmej kiixnamiktokej miak tlaouijkayotl uan amo kuali kiyolmatiyayaj, kiitstokej kenijkatsa kinyolchikajtok se keski textos tlen uala ipan Biblia.
Ipan ni tlamachtili tikitasej se keski textos tlen mitspaleuis kema tikixnamikis:
Se ueyi kuesoli
Salmo 23:4: “Yonke ninemis ipan tsintlayouilotl nechka mikistli, axtleno nikimakasis, pampa ta, toTeko, tiitstok nouaya”.
¿Tlake kiijtosneki? Tlaj timomaijtoua uan tijkaua toTeotsij ma mitsyakana ika Biblia, mitspaleuis amo timajmauis kema tikixnamikis kuesoli.
Filipenses 4:13: “Nochi niueli nijchiua ika nopa chikaualistli tlen [...] nechmaka”.
¿Tlake kiijtosneki? ToTeotsij mitsmakas chikaualistli, kiampa uelis tikixnamikis nochi kuesoli tlen tijpias.
Kema miki se katli tlauel tikiknelia
Eclesiastés 9:10: “Pampa ipan nopa mijkaostotl kampa monechkauia para tias, ayok uelis tijchiuas niyon se tekitl, ayok uelis timoyoliljuis kejatsa tijchiuas se tlamantli tlen kuali”.
¿Tlake kiijtosneki? Katli miktokej ayok tleno kimatij, yeka amo tlaijiyouiaj uan amo tleno uelis techchiuilisej.
Hechos 24:15: “ToTeko kinyolitia tlakamej tlen ya miktokej”.
¿Tlake kiijtosneki? ToTeotsij uelis kinyolkuis tochampoyouaj katli ya mijkej.
Kema tlauel timoyolkokoua
Salmo 86:5: “ToTeko [Jehová], a ta nelia tikuali uan timoketstok timokualtlalijtok para titetlapojpoljuis. Tikiniknelia uan nimantsi tikintlasojtla nochi tlen mitstlajtlaniaj motlapaleuil”.
¿Tlake kiijtosneki? ToTeotsij kintlapojpoljuia katli moyolkuepaj ika nochi ininyolo uan mosentlaliaj ayokmo sampa kichiuasej.
Salmo 103:12: “ToTeko techkixtilik totlajtlakoljuaj uan kitlalik uejka tlen tojuantij. Kena, kitlalik keja iuejkaka kampa kisa tonati uan hasta kampa onkalaki”.
¿Tlake kiijtosneki? Kema toTeotsij techtlapojpoljuia ayokmo techilnamikilia tlen tijchijkej, pampa ya amo kineki techyolkokos yon techtlatsakuiltis. ToTeotsij kejuak tlauel uejka kitlalia totlajtlakoljuaj.
Kema timokuesoua
Salmo 31:7: “Ta tikitstok nochi nokuesol, tikixmajtok nochi tlen nopantitok”.
¿Tlake kiijtosneki? ToTeotsij kiita kema titlaijiyouia uan kikuamachilia nochi tlen tijyolmati maske sekinok amo mitskuamachiliaj.
Salmo 34:18: “ToTeko itstok ininnechka tlakamej tlen mokuesouaj. Uan kinmakixtia tlen mokuesouaj ika inintlajtlakoljuaj”.
¿Tlake kiijtosneki? ToTeotsij kiijtoua kema timokuesos itstos mouaya uan mitspaleuis xikijiyoui nochi tlen mitspanos.
Se kokolistli
Salmo 41:3, TNM: “Jehová kiyolchikauas kema kipias se kokolistli uan uetstos ipan itlapech”.
¿Tlake kiijtosneki? ToTeotsij mitspaleuis kema tijpias se ueyi kokolistli, ya mitsmakas tlaseuilistli, chikaualistli, mitspaleuis tikijiyouis uan mitsmakas tlalnamikilistli, kiampa kuali tijtlapejpenis tlen tijchiuas.
Isaías 33:24: “Tlen itstokej nopano ayok kiijtosej para mokokouaj”.
¿Tlake kiijtosneki? ToTeotsij kiijtojtok teipa ayokmo aka mokokos.
Kema tlauel timotetsopa uan timoyolkuesoua
Salmo 94:19: “NoTeko, kema san nimoyoliljuia tlen miak kuesoli uan san ya nopa nijmati, ta tinechyoltlalia. Tinechchiuilia ma nimotemachi ipan ta uan tinechmaka pakilistli”.
¿Tlake kiijtosneki? Tlaj tijtlajtlanisej toTeotsij ma techpaleui kema tlauel timotetsopaj o timoyolkuesouaj, ya techmakas tlaseuilistli.
1 Pedro 5:7: “Xikiljuikaj toTeko nochi inmokuesol uan xijkauakaj imako, pampa yajaya inmechmokuitlauia”.
¿Tlake kiijtosneki? ToTeotsij kitekipachoua tlen techpano, yeka kineki ma tikiljuikaj nochi tlen tijyolmatij.
Se tlauilankayotl
Salmo 46:9: “Yajaya kiketsa nochi tlateuijkayotl hasta kampa ontlantok nochi Tlaltipaktli”.
¿Tlake kiijtosneki? ToTeotsij iTlanauatijkayo nechka kitlamiltis nochi tlauilankayotl.
Salmo 37:11, 29: “Pero tlakamej tlen moiknonekij iixpa toTeko itstosej ipan nopa kuali tlali uan tlauel pakisej, pampa yajaya kinteochiuas hasta mokauas”. “Tlakamej tlen itstokej xitlauakej iixpa toTeko moaxkatisej nopa tlali tlen yajaya kinmakas, uan nepa itstosej para nochipa”.
¿Tlake kiijtosneki? Maseualmej katli kineltokaj toTeotsij itstosej nochipa ika tlaseuilistli ipan Tlaltipaktli.
Kema mitstekipachoua tlen panos teipa
Jeremías 29:11: “ ‘Na nijmati kuali nopa tlamantli tlen nijsenkajtok para inmojuantij’, kiijtoua toTeko [Jehová]. ‘Nijsenkajtok tlen kuali uan axtlen fiero, para nochi kisas kuali para inmojuantij teipa uan para inkiselisej tlen inkichiaj’ ”.
¿Tlake kiijtosneki? ToTeotsij kintenkauilijtok itekipanojkauaj teipa kuali itstosej ipan Tlaltipaktli.
Apocalipsis 21:4: “ToTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya ipan nopa achtoui Tlaltipaktli”.
¿Tlake kiijtosneki? ToTeotsij kiijtojtok kitsontlamiltis nochi tlen amo kuali tlen onka ipan ni tonali.
a ToTeotsij itoka Jehová (Salmo 83:18). Xijpoua nopa tlamachtili “¿Ajkia eli Jehová?”.
Tlen nojkia mitspaktis tikitas
TLEN TEMATILTIA
¿Kenijkatsa mitspaleuis tijmatis toTeotsij tlauel mitsiknelia?
Biblia techpaleuia ma timotemachikaj ipan nochi tlen toTeotsij kitenkajtok.
TLEN BIBLIA KINANKILIA
¿Tlake mitspaleuis tikijiyouis tlen mitspano?
Biblia uelis mitspaleuis kuali xiitsto ipan ni tonali, uan nojkia mitspaleuis ximotemachi ipan tlen tijchia tijselis teipa.
SEKINOK TLAMACHTILI TLEN KISTIA
Timoyolkuesouaj kema miki katli tikikneliaj
Tlaj mijki se akajya katli tikiknelia, uelis timoiljuia amo aka mitskuamachilia. ToTeotsij kena mitskuamachilia uan uelis mitspaleuis.
TLEN TEMATILTIA
Kema ayokmo tleno tikijiyouiaj
Maske techpano miak tlaouijkayotl, kena uelis tiitstosej ika pakilistli.
TLAMACHTILI TLEN TLAUEL IPATI
¿Kenke toTeotsij kikaua ma onka tlaijiyouilistli?
Miakej maseualmej motlajtlaniaj kenke onka tlaijiyouilistli uan kenke miakej mokualankaitaj. Biblia techyolchikaua pampa kuali kiixtoma kenke titlaijiyouiaj.
TLEN BIBLIA TLAMACHTIA
Xikita kenijkatsa titlamachtiaj
Xijtlajtlani ma mitsmachtikaj ika Biblia uan kiampa tijyekojtias miak tlamantli.