Efesios 6:1-24
6 Konemej, xikintakamatikan namotatuan kemej toTekotsin kineki, porin Dios kiita ke nejon kuali yetok.
2 “Xiktakachiua* mopaj uan momaj”. Yejua nejin yekinika tanauatil tein kiualkui nejin tatiochiualis:
3 “Ijkon kualtsin tinemis uan uejkaua tiyoltos nikan taltikpak”.
4 Tetatmej,* amo xikinkualantikan* namokoneuan, ta keman nankiniskaltijtoskej, xikinmachtikan maj kipatakan tein moneki* uan xikinpaleuikan maj tanemilikan kemej Jehová.*
5 Takeualmej, xikintakamatikan namotekouan ika nochi namoyolo uan semi xikintakachiuakan,* kemej yeskia nankitakamatiskiaj Cristo.
6 Amo xikintakamatikan sayoj keman namechitstokej para maj kuali namechitakan oksekin, ta xitatakamatikan kemej itakeualuan Cristo akin semi mochikauaj kichiuaskej ika nochi ininyolo tein Dios kineki.
7 Xiktekitilikan namoteko ika miak pakilis, kemej yeskia nankitekitiliskiaj Jehová* uan amo namotekouan,
8 porin namejuan nankimatij ke Jehová* namechkepilis nanochin tein yeski taman tein kuali tein nankichiuaj, nanyeskij nantakeualmej oso amo.
9 Uan namejuan akin nankinpiaj takeualmej, no ijkon xikinitakan nochipa, amo xikinmojmoujtikan, porin nankimatij ke yejuan uan namejuan nankipiaj sayoj se namoTeko ne iluikak, uan yejua amo techichikotasojta.*
10 Uan axkan, maj toTekotsin kisentoka namechchikaua ika iueyi chikaualis.
11 Ximotalilikan nochi tein ika se tateuia tein Dios namechmakatok, para uelis nantaxikoskej keman Amokuali kitemos keniuj namechuetsiltis;
12 porin tejuan amo timoteuijtokej iniuan takamej, ta timoteuijtokej iniuan amokuali ejekamej tein yetokej ne iluikak uan yejuan taixyekanaj uan tekiuajtij itech nochi taltikpak kampa tayouayan.
13 Yejua ika, ximotalilikan nochi tein ika se tateuia tein Dios namechmakatok, uan ijkon nantaxikoskej itech tonal keman namechixnamikiskej, uan satepan ke nankichiuaskej nochi tein moneki, nanyekijkatoskej.
14 Yejua ika, xiyekijkatokan uan nochipa ximotalilikan cinturón tein kiixnextia nochi tein melauak, uan ximotalilikan teposkoton tein teyolixtsakua* tein kiixnextia tein kuali yetok
15 uan ximotekaktikan para uelis nankiteixmatiltiskej kuali tanauatilmej* tein kinextia keniuj kuali se mouikas iuan Dios.
16 Amo sayoj nejon, ta no xikuikatinemikan ueyi tepos tein monotsa escudo, tein kijtosneki se takuaujtamatis iuan Dios, tein ika uelis nankiseuiskej nochi koujmej tein xotatokej tein namechtamotilia in Amokuali.
17 No xiknemilikan keniuj Dios namechmakixtis, nejin kemej yeskia namokuataliliskiaj teposkuatsakuiloni, uan xikuikakan machete tein ojkan tenej* tein kitemaka ichikaualis Dios. Nejin yejua itajtol Dios.
18 Uan no, nochipa xikchiujtokan netataujtil uan ximokauakan maj namechixyekana ichikaualis Dios, xikchiujtokan nochi taman netataujtil uan chikauak xiktataujtikan Dios. Yejua ika xiijsatokan* uan nochipa chikauak ximotataujtijtokan ininka nochin akin Dios moinxelouilij.*
19 No ximotataujtikan noka para uelis nikmatis toni nikijtos keman peuas nitajtos uan ijkon amo nimouis nikteixmatiltis kuali tanauatilmej tein kimelauaj tein Dios amo kitematiltijtoya.*
20 Dios nechtitanik para nikteixmatiltis kuali tanauatilmej, yejua ika nitsaktok uan niilpitok* ika cadena. Noka ximotataujtikan para maj amo nimoui ika nitajtos kuali tanauatilmej ijkon kemej moneki.
21 Tíquico, se toknitsin akin takuaujtamach uan kitekitilia toTekotsin namechmatiltis keniuj nietok uan toni nikchiujtok.
22 Namechtitanilia para maj namechilui keniuj tietokej uan para maj namechyolseui.
23 Maj toTajtsin Dios uan toTekotsin Jesucristo kichiuakan maj tokniuan kuali mouikakan iuan Dios, maj motasojtakan uan maj takuaujtamatikan.
24 Maj Dios kinmaka itatiochiualis tein amo technamiki nochin akin yekmelauj kitasojtaj toTekotsin Jesucristo.
Tajtolmelaualismej
^ Oso “Xikpoujkaita”.
^ Nikan kinnojnotstok takamej.
^ Oso “amo xikinyolajxitikan”.
^ Oso “xikinmelauakan”.
^ Oso “xikinpoujkaitakan”.
^ Oso “amo techichikouia”.
^ Oso “teelpantsakua”.
^ Oso “tajtolmej”.
^ Oso “espada”.
^ Oso “xitachixtokan”, “xiixpetantokan”.
^ Oso “chipaujkej iixpan Dios”.
^ Xikonita tein Dios amo kitematiltijtoya.
^ Oso “nitsikaujtok”.
